රාජ්‍ය සංචාර සහ වෙනත් නිල සංචාර අතර රාජ්‍ය තාන්ත්‍රික වෙනස කරළියට
ශ්‍රී ලංකාවේ අටවැනි විධායක ජනාධිපති රනිල් වික්‍රමසිංහ පසුගියදා සිදුකළ මහා බ්‍රිතාන්‍ය සංචාරය එක්සත් රාජධානි රජයේ නොව, තම ආයතනයේ නිල ආරාධනයකට අනුව සිදුවූවක් බව වුල්වර්හැම්ප්ටන් විශ්වවිද්‍යාලය (University of Wolverhampton) යළිදු තහවුරු කර තිබේ.
හිටපු ජනාධිපතිවරයාගේ මෙම සංචාරයේ ස්වභාවය සම්බන්ධයෙන් විවිධ පාර්ශ්ව වෙතින් පළවූ අදහස් හමුවේ, ජාත්‍යන්තර සබඳතා සහ රාජ්‍ය තාන්ත්‍රික සම්මුතීන් තුළ පවතින ‘රාජ්‍ය සංචාරයක්’ (State Visit) සහ ‘නිල සංචාරයක්’ (Official Visit) අතර තාක්ෂණික වෙනස පිළිබඳවද මේ වන විට අවධානය යොමුව ඇත.
රාජ්‍ය සංචාරයක සැබෑ රාජ්‍ය තාන්ත්‍රික අර්ථය
රාජ්‍ය තාන්ත්‍රික සම්ප්‍රදායට අනුව, ‘රාජ්‍ය සංචාරයක්’ යනු රටක රාජ්‍ය නායකයෙකු විසින් තවත් රටක රාජ්‍ය නායකයෙකු වෙත කරනු ලබන ඉහළම පෙළේ විධිමත් ආරාධනයකි. එවැනි සංචාරයකදී අදාළ නායකයා සත්කාරක රටේ ගුවන් තොටුපළට ළඟාවීමේ සිට ආපසු පිටත්ව යන තෙක් සියලුම වියදම්, පූර්ණ රාජ්‍ය ගෞරව සහ ආරක්ෂාව සත්කාරක රජය විසින් සම්පූර්ණයෙන්ම දරනු ලබයි.
එක්සත් රාජධානිය ශ්‍රී ලංකාවට මෙවැනි පූර්ණ රාජ්‍ය සංචාරක අවස්ථාවක් ලබා දී ඇත්තේ එක් වරක් පමණක් වන අතර, ඒ හිටපු ජනාධිපති රණසිංහ ප්‍රේමදාස ගේ පාලන සමයේදීය. මීට අමතරව ඇමරිකා එක්සත් ජනපදය විසින් හිටපු ජනාධිපති ජේ. ආර්. ජයවර්ධන වෙත පූර්ණ රාජ්‍ය සංචාරයක සත්කාරකත්වය පිරිනමා තිබිණි. කලාපීය වශයෙන් ගත්කල, ඉන්දියාව සහ ශ්‍රී ලංකාව අතර මෙවැනි ඉහළ පෙළේ රාජ්‍ය මට්ටමේ ආරාධනා සහ රාජ්‍ය තාන්ත්‍රික පිළිගැනීම් නිරන්තරයෙන් හුවමාරු වේ.
වුල්වර්හැම්ප්ටන් ගමනේ ස්වභාවය
වුල්වර්හැම්ප්ටන් විශ්වවිද්‍යාලය පැහැදිලි කරන්නේ, රනිල් වික්‍රමසිංහ ගේ සංචාරය රාජ්‍ය නායකයෙකුගේ මට්ටමින් සිදුවූ ‘රාජ්‍ය සංචාරයක්’ නොව, අධ්‍යයන හා ශාස්ත්‍රීය ක්ෂේත්‍රයේ ආයතනයක් විසින් නිල වශයෙන් සිදුකරන ලද ‘නිල සංචාරයක්’ (Official/Institutional Visit) බවයි.
ජාත්‍යන්තර සබඳතාවලදී රාජ්‍ය නොවන ආයතන, විශ්වවිද්‍යාල හෝ ජාත්‍යන්තර සංවිධාන විසින් රාජ්‍ය තාන්ත්‍රිකයින් සහ හිටපු නායකයින් වෙත මෙවැනි නිල ආරාධනා පිරිනැමීම සාමාන්‍ය ක්‍රමවේදයකි. ඒ අනුව, මෙම සංචාරයේ වගකීම් සහ අරමුණු සම්පූර්ණයෙන්ම විශ්වවිද්‍යාලයේ ආරාධිත රාමුව තුළ පමණක් සිදුවූවක් බව විශ්වවිද්‍යාල බලධාරීහු වැඩිදුරටත් අවධාරණය කරති.
