අභියාචනාධිකරණ ප්‍රාදේශීය මෙහෙයුම් සහ විනිසුරු හිඟයට විසඳුමක් ලෙස ගෙනා කැබිනට් තීරණය
විනිසුරුවරුන්ගේ විශ්‍රාම වයස් සීමාව ඉහළ දැමීම සම්බන්ධයෙන් ආණ්ඩුක්‍රම ව්‍යවස්ථා සංශෝධනයක් ගෙන ඒමට පෙර ඒ පිළිබඳව ප්‍රමාණවත් මහජන හා පාර්ශ්වකරුවන්ගේ පුළුල් සාකච්ඡාවක් පැවැත්විය යුතු බව ශ්‍රී ලංකා කතෝලික රදගුරු සම්මේලනය පවසයි.
විනිසුරුවරුන්ගේ දැනට පවතින ව්‍යවස්ථාපිත විශ්‍රාම වයස් සීමාව සංශෝධනය කිරීම සඳහා රජය ගෙන ඇති කැබිනට් තීරණය සම්බන්ධයෙන් විශේෂ නිවේදනයක් නිකුත් කරමින් රදගුරු සම්මේලනය මේ බව පෙන්වා දී තිබේ.
කැබිනට් තීරණය හා රජයේ පදනම
අධිකරණ පද්ධතියේ පවතින නඩු ප්‍රමාදයන් අවම කිරීම, අධිකරණ සංඛ්‍යාව ඉහළ නැංවීම සහ අභියාචනාධිකරණයේ ප්‍රාදේශීය මෙහෙයුම් ඉදිරියේදී දිවයිනේ ප්‍රධාන නගර කේන්ද්‍ර කරගනිමින් ආරම්භ කිරීමට සැලසුම් කර තිබීම පදනම් කරගනිමින් පළපුරුදු සහ ජ්‍යෙෂ්ඨ විනිසුරුවරුන්ගේ සේවය තවදුරටත් රඳවා ගැනීමේ අරමුණින් අදාළ වයස් සීමාව දීර්ඝ කිරීමට පසුගිය ජූලි මස 27 වැනිදා අමාත්‍ය මණ්ඩල අනුමැතිය හිමිවිය.
දැනට පවතින ව්‍යවස්ථාපිත ප්‍රතිපාදන අනුව ශ්‍රේෂ්ඨාධිකරණ විනිසුරුවරුන් වයස අවුරුදු 65 දී ද, අභියාචනාධිකරණ විනිසුරුවරුන් වයස අවුරුදු 63 දී ද විශ්‍රාම ලබන අතර, එම වයස් සීමාවන් සංශෝධනය කිරීම රජයේ මූලික අවධානයට ලක්ව තිබේ.
අධිකරණයේ ස්වාධීනත්වය සහ බලතල බෙදීම
මේ පිළිබඳව කරුණු දක්වන කතෝලික රදගුරු සම්මේලනය අවධාරණය කරන්නේ, ඕනෑම ව්‍යවස්ථාමය සංශෝධනයකදී අධිකරණයේ ස්වාධීනත්වය, නීතියේ ආධිපත්‍යය මෙන්ම ආණ්ඩුක්‍රම ව්‍යවස්ථාවේ මූලික හරය වන බලතල බෙදීමේ මූලධර්මය ආරක්ෂා වන අයුරින් කටයුතු කිරීම අත්‍යවශ්‍ය කරුණක් බවයි.
ස්වාධීන සහ අපක්ෂපාතී අධිකරණ පද්ධතියක් පැවතීම යුක්තිය පසිඳලීමේ ක්‍රියාවලිය, පුරවැසියන්ගේ මූලික මිනිස් අයිතිවාසිකම් සහ මානව ගරුත්වය ආරක්ෂා කිරීමේ ප්‍රධානතම පදනම බවද එම නිවේදනයේ සඳහන් වේ.
සංශෝධනයක තිබිය යුතු ප්‍රධාන අරමුණු
යෝජිත ව්‍යවස්ථා සංශෝධනයක් ක්‍රියාවට නංවන්නේ නම්, එහි ප්‍රමුඛ අරමුණ විය යුත්තේ අධිකරණයේ ස්වාධීනත්වය තවදුරටත් ශක්තිමත් කිරීම, පළපුරුදු විනිසුරුවරුන්ගේ සේවය කාර්යක්ෂමව රඳවා ගැනීම සහ ක්ෂේත්‍රයේ පවතින නිලධාරී හිඟයට තිරසර විසඳුම් සෙවීම පමණක් බව රදගුරු සම්මේලනය පෙන්වා දෙයි.
ශ්‍රී ලංකා කතෝලික රදගුරු සම්මේලනයේ සභාපති අතිඋතුම් ආචාර්ය හැරල්ඩ් ඇන්තනි පෙරේරා සහ එහි මහලේකම් අතිඋතුම් ආචාර්ය පී. ඇන්ටන් රංජිත් යන රදගුරු හිමිපාණන් වහන්සේලාගේ අත්සනින් යුතුව මෙම නිවේදනය නිකුත් කර ඇත.
