මේජර් ජෙනරාල් සුරේෂ් සලේගේ රැඳවුම් නියෝගය තවදුරටත් දීර්ඝ කිරීමේ සූදානමක්: බිරිඳගෙන් ජනපතිට හදිසි ලිපියක්

*රැඳවුම් නියෝග වෙනුවට අධිකරණ අධීක්ෂණය යටතේ රක්ෂිත බන්ධනාගාරගත කරන ලෙස ඉල්ලීමක්

ත්‍රස්තවාදය වැළැක්වීමේ තාවකාලික විධිවිධාන පනත (PTA) යටතේ අපරාධ පරීක්ෂණ දෙපාර්තමේන්තුව (CID) භාරයේ රඳවාගෙන ප්‍රශ්න කරනු ලබන රාජ්‍ය බුද්ධි සේවයේ (SIS) හිටපු ප්‍රධානී, විශ්‍රාමික මේජර් ජෙනරාල් සුරේෂ් සලේගේ රැඳවුම් නියෝගය (Detention Order) තවත් දින 90ක කාලයකට දීර්ඝ කිරීමට බලධාරීන් සූදානම් වන බව වාර්තා වේ.

කෙසේ වෙතත්, තම සේවාදායකයාගේ බරපතළ හෘද රෝගී තත්ත්වය සැලකිල්ලට නොගෙන, පවතින ත්‍රස්තවාදය වැළැක්වීමේ පනතේ ප්‍රතිපාදන උපයෝගී කරගනිමින් යළිත් රැඳවුම් නියෝග දීර්ඝ කිරීමට පියවර ගතහොත් එය විමර්ශකයන්ගේ අභිප්‍රායන් පිළිබඳ නීතිමය ගැටලු මතු කරන්නක් බව ඔහුගේ නීතිඥවරු පෙන්වා දෙති. විශේෂයෙන්ම, වත්මන් රජය විසින් ත්‍රස්තවාදය වැළැක්වීමේ පනත අහෝසි කර නව රාජ්‍ය ආරක්ෂණ නීති සම්පාදනය කිරීමට පියවර ගනිමින් සිටින පසුබිමක මෙම තත්ත්වය උද්ගතව ඇතැයි ඔවුහු සඳහන් කරති.

බිරිඳගෙන් ජනාධිපතිවරයා වෙත ලිඛිත ආයාචනයක්

මේ අතර, සුරේෂ් සලේගේ බිරිඳ වන එස්.බී.එම්.එස්.සලේ බන්දුසේන විසින් ආරක්ෂක අමාත්‍යවරයා ද වන ජනාධිපති අනුර කුමාර දිසානායක වෙත ඊයේ (අගෝස්තු 20) දින විශේෂ ලිඛිත අභියාචනයක් යොමු කර ඇත.

එම ලිපිය මඟින් ඇය පෙන්වා දෙන්නේ තම සැමියාගේ රැඳවුම් කාලය තවදුරටත් දීර්ඝ නොකර, අධිකරණ අධීක්ෂණය සහිත රක්ෂිත බන්ධනාගාර භාරයට (Remand Custody) පත් කරන ලෙසයි.

රඳවා ගැනීමේ කාලය තුළ සිදුකළ උපවාසයකින් පසු ඔහුගේ සෞඛ්‍ය තත්ත්වය පිරිහී ගිය අතර, ඉකුත් ජුනි 07 වැනිදා කොළඹ ජාතික රෝහලටත්, අනතුරුව ජුනි 27 වැනිදා ජාතික රෝහලේ හෘද රෝග ඒකකයටත් මාරු කර යවා තිබේ. එහිදී සිදුකළ වෛද්‍ය පරීක්ෂණවලින් අනතුරුව, ජීවිත අවදානම කළමනාකරණය කිරීම සඳහා ඔහුගේ හදවතට 'Implantable Cardioverter-Defibrillator' (ICD) උපකරණයක් බද්ධ කිරීමේ සංකීර්ණ ශල්‍යකර්මයකට ද ලක්කර ඇති බව එම ලිපියේ සඳහන් වේ.

ජීවිත ආරක්ෂාව සහ විමර්ශනවලට සහයෝගය දැක්වීම

හෘද සැත්කමකින් පසු පසුවන රෝගියෙකු යළි අපරාධ පරීක්ෂණ දෙපාර්තමේන්තු භාරයට ගැනීමෙන් ඔහුගේ ජීවිතයට සෘජු හා බරපතළ අවදානමක් මතුවිය හැකි බව පෙන්වා දෙන සුරේෂ් සලේ ගේ බිරිඳ , මෙය හුදෙක් රැඳවුම් කොන්දේසි පිළිබඳ ප්‍රශ්නයක් නොව ජීවත්වීමේ අයිතිය හා බැඳුණු මානුෂීය කාරණයක් බව අවධාරණය කරයි.

තවද, නීත්‍යනුකූලව සිදුකරන කිසිදු විමර්ශනයකට බාධා කිරීමේ හෝ එය ප්‍රමාද කිරීමේ කිසිදු අදහසක් තම පවුලේ පාර්ශ්වයට නොමැති බවත්, අධිකරණමය අධීක්ෂණය යටතේ පවතින ඕනෑම නීතිමය පරීක්ෂණයකට පූර්ණ සහයෝගය ලබාදීමට සූදානම් බවත් ඇය ජනාධිපතිවරයා වෙත යොමුකළ ලිපියේ වැඩිදුරටත් දක්වා ඇත.

රාජ්‍ය භාරයේ පසුවන සැකකරුවෙකුගේ සෞඛ්‍ය ආරක්ෂාව තහවුරු කිරීම සහ නීතියේ නිසි ක්‍රියාදාමය ක්‍රියාත්මක කිරීම යන සමබරතාව සුරැකෙන පරිදි මෙම තීරණය ගන්නා ලෙස ඇය ආරක්ෂක අමාත්‍යවරයාගෙන් ඉල්ලා සිටියි.