සිංගප්පූරුව ඇතුළුවීමත් තහනම් කරමින් සැකකරු කඩිනමින් පිටුවහල් කෙරේ
කැනඩාවේ රැකියාවක් සඳහා පිටත්ව යාමේ අරමුණින් ව්‍යාජ කැනේඩියානු ගමන් බලපත්‍රයක් භාවිත කළ ශ්‍රී ලාංකිකයෙකු තායිවානයේ තාඕයුවාන් (Taoyuan) ජාත්‍යන්තර ගුවන් තොටුපළේදී එරට ආගමන විගමන නිලධාරීන්ගේ දැලට හසුවී තිබේ.
සිංගප්පූරුවේ සිට තායිවානය හරහා කැනඩාවේ ටොරොන්ටෝ නුවර බලා පියාසර කිරීමට සූදානම් වූ මෙම පුද්ගලයා සතු ලියකියවිලි සම්බන්ධයෙන් ගුවන් සේවා බිම්ගත කාර්ය මණ්ඩලයට (EVA Air) සැකසිතී ඒ පිළිබඳව ආගමන විගමන අංශ දැනුවත් කර ඇත.
කැනඩා ජාතික ගීය සහ ලිපිනය නොදැනීමෙන් හෙළි වූ රහස
නිලධාරීන් විසින් සිදුකළ ප්‍රශ්න කිරීම් හමුවේ සැකකරු මුලදී තම ලියකියවිලි නිවැරදි බව පවසමින් විරෝධය පළ කර තිබේ. කෙසේ වෙතත්, ඔහුගේ අනන්‍යතාව සහ ගමන් බලපත්‍රයේ ආරක්ෂිත සලකුණු පරීක්ෂා කිරීමේදී එය ව්‍යාජ එකක් බව තහවුරු වී ඇත.
විශේෂයෙන්ම, තමන් සතුව තිබූ ගමන් බලපත්‍රයේ සඳහන් ලිපිනය, කැනඩාවේ අගනුවර හෝ කැනේඩියානු ජාතික ගීය පිළිබඳව හෝ කිසිදු කරුණක් ප්‍රකාශ කිරීමට ඔහුට නොහැකි වී ඇත.
ඩොලර් 10,000ක ජාවාරම සහ පසුබිම
වැඩිදුර ප්‍රශ්න කිරීම්වලදී තමන් ශ්‍රී ලාංකිකයෙකු බව පාපොච්චාරණය කළ ඔහු, ජාවාරම්කරුවන් පිරිසකට අමෙරිකානු ඩොලර් 10,000ක මුදලක් ගෙවා මෙම ව්‍යාජ කැනේඩියානු පාස්පෝට් පත ලබාගත් බව පිළිගෙන තිබේ. ඥාතීන්ගෙන් සහ හිතවතුන්ගෙන් ණයට ලබාගත් එම මුදල් පියවීම සඳහා රැකියාවක් සොයා ගැනීමේ අරමුණින් කැනඩාවට යාමට උත්සාහ කළ බවත්, ගුවන් ගමන් සැලසුම් සකස් කර දී ඇත්තේ අදාළ ජාවාරම්කරුවන් බවත් ඔහු සඳහන් කර ඇත.
සිංගප්පූරුවෙන් කොළඹට පිටුවහල් කිරීම
ජාත්‍යන්තර ආගමන විගමන නීතිරීතිවලට අනුව, තායිවාන බලධාරීන් විසින් ඔහුව ඔහු පැමිණි පෙර ගමනාන්තය වූ සිංගප්පූරුව වෙත භාරදෙන ලදී.
මේ පිළිබඳව නිවේදනයක් නිකුත් කරමින් සිංගප්පූරු ආගමන විගමන සහ මුරපොළ අධිකාරිය (ICA) තහවුරු කර ඇත්තේ, අදාළ පුද්ගලයා සිංගප්පූරුවට ඇතුළු වීමට සහ එරටින් පිටවීමට භාවිත කර ඇත්තේ නීත්‍යානුකූල ශ්‍රී ලාංකික ගමන් බලපත්‍රය බවයි. තායිවානයේ සිට සිංගප්පූරුවට භාරදුන් වහාම ඔහු එරටින් පිටුවහල් කර කොළඹ බලා පිටත් කර යවා ඇති අතර, නැවත සිංගප්පූරුවට ඇතුළු වීමද ඔහුට ජීවිතාන්තය දක්වා තහනම් කර තිබේ.
වැඩිදුර තොරතුරු සහ වාර්තා:
තායිවාන සහ සිංගප්පූරු මාධ්‍ය වාර්තා: Mothership.SG වාර්තාව
තායිවාන ගුවන් තොටුපළේදී සිදුවූ මෙම සිදුවීම සහ අදාළ විමර්ශන සම්බන්ධයෙන් තායිවාන මාධ්‍ය නිකුත් කළ අදාළ වීඩියෝවට මෙතනින් පිවිසෙන්න
