ශ්‍රම වාසනා අරමුදල ඈවර කිරීමේ ක්‍රියාවලියට; රාජ්‍ය මූල්‍ය විනය සහ විනිවිදභාවය තහවුරු කිරීම රජයේ අරමුණයි
පිහිටුවන ලද මූලික පරමාර්ථවලින් බැහැරව කටයුතු කරමින් පවතින සහ අපේක්ෂිත ප්‍රතිඵල අත්පත් කර නොගත් ව්‍යවස්ථාපිත රාජ්‍ය අරමුදල් රැසක් ඈවර කිරීමට හෝ ඵලදායී වෙනත් අරමුදල් සමඟ ඒකාබද්ධ කිරීමට රජය තීරණය කර තිබේ.
මුදල් හා ක්‍රම සම්පාදන නියෝජ්‍ය අමාත්‍ය ආචාර්ය අනිල් ජයන්ත සඳහන් කරන්නේ, රටේ සමස්ත රාජ්‍ය මූල්‍ය කළමනාකරණය විධිමත් කිරීම සහ මූල්‍ය ඒකාග්‍රතාවය තහවුරු කිරීමේ පුළුල් ප්‍රතිසංස්කරණ වැඩපිළිවෙළ යටතේ මෙම පියවර ගන්නා බවයි.
අගමැති ලේකම් කමිටු නිර්දේශ
දැනට ක්‍රියාත්මක වන විවිධ ව්‍යවස්ථාපිත අරමුදල්වල කාර්යසාධනය, මූල්‍ය ශක්‍යතාව සහ ඒවා පිහිටුවීමේ අරමුණු නිසි ලෙස ඉටුවන්නේ ද යන්න පිළිබඳව විමර්ශනය කිරීම සඳහා අග්‍රාමාත්‍ය ලේකම්වරයාගේ ප්‍රධානත්වයෙන් විශේෂ විමර්ශන කමිටුවක් පත් කර තිබිණි. එම කමිටුව විසින් අදාළ අරමුදල්වල ක්‍රියාකාරිත්වය ගැඹුරින් සමාලෝචනය කර ඉදිරිපත් කරන ලද පුළුල් වාර්තාව පදනම් කරගනිමින් මෙම ඈවර කිරීම් සහ ඒකාබද්ධ කිරීම් ක්‍රියාවලිය ක්‍රියාත්මක කිරීමට නියමිතය.
ඇතැම් අරමුදල් වසර ගණනාවක් මුළුල්ලේ ඒවා පිහිටවූ මුල් අරමුණුවලින් සැලකිය යුතු ලෙස බැහැරව විවිධ වියදම් සඳහා යොදාගෙන ඇති බව එම කමිටු නිරීක්ෂණ මගින් අනාවරණය වී ඇතැයි නියෝජ්‍ය අමාත්‍යවරයා පෙන්වා දෙයි.
ශ්‍රම වාසනා අරමුදලට අත්වන ඉරණම
මෙම ප්‍රතිව්‍යුහගත කිරීමේ ක්‍රියාවලියේ මූලික පියවරක් ලෙස, කම්කරු අමාත්‍යාංශය යටතේ පවතින 'ශ්‍රම වාසනා අරමුදල' ඈවර කිරීමට පියවර ගෙන ඇත. 1998 අංක 12 දරන ශ්‍රම වාසනා අරමුදල් පනත යටතේ මෙරට වැඩකරන ජනතාවගේ සුබසාධනය, රැකියා සුරක්ෂිතතාව සහ හදිසි ආපදා අවස්ථාවලදී සහන සැලසීමේ අරමුණින් මෙම අරමුදල ආරම්භ කරන ලද්දකි.
කෙසේ වෙතත්, පසුගිය කාලසීමාව තුළ එම අරමුදල සතු මූල්‍ය සම්පත් සිය මූලික වගකීම්වලින් බැහැරව පාසල් දරුවන්ට බෑග් ඇතුළු උපකරණ බෙදාදීම් වැනි වෙනත් ව්‍යාපෘති සඳහා රුපියල් කෝටි ගණනින් වැය කර ඇති බව විමර්ශන වාර්තාවල සඳහන් වේ. අදාළ කටයුතු සමාජ සුබසාධන ක්‍රියාමාර්ග ලෙස ක්‍රියාත්මක වුව ද, අරමුදල පිහිටුවීමේ නීතිමය පදනම සහ පරමාර්ථ සමග ඒවා ඍජුව නොගැළපෙන බවට මෙහිදී අවධානය යොමු වී තිබේ.
රාජ්‍ය මූල්‍ය විනය සහ ජාත්‍යන්තර ප්‍රමිතීන්
රාජ්‍ය ආදායම් සහ වියදම් කළමනාකරණයේදී විනිවිදභාවය සුරැකීම, රාජ්‍ය අරමුදල් විසිරී පැවතීම අවම කිරීම සහ මහජන මුදල් වඩාත් ඵලදායී ජාතික ප්‍රමුඛතා සඳහා යෙදවීම මෙම ප්‍රතිසංස්කරණවල ප්‍රධාන අපේක්ෂාවයි.
ජාත්‍යන්තර මූල්‍ය ආයතන මෙන්ම මෙරට ආර්ථික විශ්ලේෂකයන් ද දීර්ඝ කාලයක සිට පෙන්වා දී ඇත්තේ ව්‍යවස්ථාපිත ආයතන හා අරමුදල් පාලනයකින් තොරව ව්‍යාප්ත වීමෙන් රාජ්‍ය වියදම් පාලනය සහ මූල්‍ය විගණනය සංකීර්ණ වන බවයි. ඒ අනුව, මෙම සමාලෝචන ක්‍රියාවලිය හරහා අනවශ්‍ය පරිපාලන පිරිවැය අවම කර ගනිමින් ඒකාබද්ධ මූල්‍ය රාමුවක් (Single Treasury / Integrated Fiscal Framework) ශක්තිමත් කිරීමට රජය අපේක්ෂා කරයි.
