මාතර ඓතිහාසික බෝධිරාජයා අබියසදී සුමධුර ධර්ම දේශනාවක් ඊයේ (23) රාත්‍රියේ පැවැත්විණි.
වජිරාරාම විහාරවාසී පූජ්‍ය පණ්ඩිත මීගොඩ සුඛිත ස්වාමීන් වහන්සේ විසින් මෙම ධර්ම දේශනාව පවත්වනු ලැබූ අතර, එහිදී උන්වහන්සේ මංගල සමරවීර මහතාගේ දේශපාලන දැක්ම සහ දුරදක්නා ප්‍රතිපත්ති පිළිබඳවද අදහස් පළ කළහ.එහිදී උන්වහන්සේ සඳහන් කළේ, මංගල සමරවීර මහතා වැනි පුද්ගලයකු අද ජීවත්ව සිටියේ නම්, ඔහුගේ ආර්ථික ප්‍රතිපත්ති සහ මිල සූත්‍රය වැනි ප්‍රතිපත්ති අද රට තුළ ප්‍රායෝගිකව ක්‍රියාත්මක කිරීමට සිදුව ඇති ආකාරය දැකගත හැකි බවයි.
මංගල සමරවීර මහතා දුරදක්නා නුවණින් සකස් කළ ප්‍රතිපත්ති සම්පාදනයන්හි වැදගත්කම අද වන විට වඩාත් පැහැදිලි වී ඇති බවද පූජ්‍ය මීගොඩ සුඛිත හිමියෝ පැවසූහ.තවද, මංගල සමරවීර මහතා ජීවත්ව සිටි සමයේ ඔහු සමීපව ඇසුරු කිරීමට නොහැකි වීම පිළිබඳව තමන් කනගාටු වන බවත්, ඔහුගෙන් ඉගෙන ගැනීමට බොහෝ දේ තිබූ බවත් උන්වහන්සේ සඳහන් කළහ.
මංගල සමරවීර මහතාගේ අභාවයෙන් පසුව ඔහු සතු දැනුම, දේශපාලන දැක්ම සහ ප්‍රතිපත්ති පිළිබඳව වඩාත් ගැඹුරින් අවබෝධ කරගැනීමට හැකි වූ බවද උන්වහන්සේ වැඩිදුරටත් ප්‍රකාශ කළහ.
මෙම පුණ්‍ය කටයුත්ත සඳහා මංගල සමරවීර මහතාගේ සහෝදරිය වන ජයන්ති සමරවීර ගුණවර්ධන මහත්මිය, ඔහුගේ ඥාතිවරියක වන චංචලා ගුණවර්ධන මහත්මිය ඇතුළු මංගල සමරවීර මහතාට ආදරය කළ මාතර ජනතාව විශාල පිරිසක් සහභාගි වූහ.
