පාපොච්චාරණයේ ස්වේච්ඡාභාවය තහවුරු කෙරෙන 'වොයර් ඩයර්' පරීක්ෂණය සැප්තැම්බර් මාසයට
සහරාන් හෂීම් ඇතුළු අන්තවාදී කණ්ඩායම් සමඟ එක්ව 2018 වසරේදී පුත්තලම, වනාතවිල්ලුව ලැක්ටෝස් වත්තේ නීතිවිරෝධී ලෙස ගිනි අවි හා පුපුරන ද්‍රව්‍ය රැස්කර තැබීම සම්බන්ධයෙන් පවරා ඇති නඩුවේ සාක්ෂි විභාගය ලබන සැප්තැම්බර් මස 18 වැනිදා දක්වා කල් තැබීමට කොළඹ විශේෂ ත්‍රිපුද්ගල මහාධිකරණ විනිසුරු මඬුල්ල නියෝග කළේය.
මෙම නඩුව ලාල් රණසිංහ බණ්ඩාර, රශ්මි සිංගප්පුලි සහ චතුරිකා වික්‍රමසේකර යන ත්‍රිපුද්ගල මහාධිකරණ විනිසුරු මඬුල්ල හමුවේ කැඳවනු ලැබීය.
'වොයර් ඩයර්' පරීක්ෂණය සහ නීතිමය පසුබිම
අබු හනීෂා මොහොමඩ් මුසීත් හෙවත් අබු දහිදා ඇතුළු විත්තිකරුවන් හයදෙනෙකුට එරෙහිව නීතිපතිවරයා විසින් මෙම නඩුව පවරා ඇත්තේ අධිචෝදනා 14ක් යටතේය.
නඩුවේ හයවන විත්තිකරු වන මොහොමඩ් රමිෂ් මොහොමඩ් සාජිත් හෙවත් සාජිත් මවුලවි (අබු නජා) විසින් අපරාධ පරීක්ෂණ දෙපාර්තමේන්තුව හමුවේ ලබා දී ඇති ප්‍රකාශය ස්වේච්ඡාවෙන් ලබා දුන් එකක්ද යන්න තීරණය කිරීම සඳහා පැවැත්වෙන ‘වොයර් ඩයර්’ (Voir Dire) විශේෂ මූලික පරීක්ෂණය සඳහා සාක්ෂි විමසීම එදින සිදු කිරීමට නියමිතව තිබිණි.
මහ නඩුව සහ සාක්ෂි විභාගය ගැටගැසුණු අයුරු
කෙසේ වෙතත්, විත්තිය වෙනුවෙන් පෙනී සිටි ජ්‍යෙෂ්ඨ නීතිඥ රුෂ්මි හබීබ් අධිකරණය හමුවේ කරුණු දක්වමින් පෙන්වා දුන්නේ, 2019 පාස්කු ඉරිදා මරාගෙන මැරෙන බෝම්බ ප්‍රහාරයට ආධාර අනුබල දීමේ චෝදනා මත විත්තිකරුවන් 24 දෙනෙකුට එරෙහිව පවරා ඇති පාස්කු මහ නඩුවේ විභාගයද විශේෂ ත්‍රිපුද්ගල මහාධිකරණය හමුවේ පැවැත්වෙන බවයි.
එම නඩුවේද විත්තිකරුවකු වන මෙම හයවන විත්තිකරු අද පෙරවරු 9.00ට එම අධිකරණයට ඉදිරිපත් කිරීමට බන්ධනාගාර නිලධාරීන්ට නියෝග කර ඇති බැවින්, මෙම නඩුවේ සාක්ෂි විභාගය වෙනත් දිනයකට කල් තබන ලෙස නීතිඥවරයා කළ ඉල්ලීම සලකා බැලූ විනිසුරු මඬුල්ල නඩු විභාගය සැප්තැම්බර් 18 වැනිදා දක්වා කල් තැබීය.
වනාතවිල්ලුව වැටලීම සහ පුපුරන ද්‍රව්‍ය තොගය
2018 වසරේදී අපරාධ පරීක්ෂණ දෙපාර්තමේන්තුව විසින් වනාතවිල්ලුව ලැක්ටෝස් වත්තේ සිදුකළ විශේෂ වැටලීමකදී පුපුරන ද්‍රව්‍ය සෑදීමට යොදාගන්නා නයිට්‍රේට්, නයිට්‍රික් අම්ලය සහ යූරියා ඇතුළු රසායනික ද්‍රව්‍ය තොගයක්, ගිනි අවියක් මෙන්ම සජීවී උණ්ඩ 12ක් ඇතුළු උපකරණ රැසක් ආරක්ෂක අංශ භාරයට ගෙන තිබිණි.
ගපූර් මාමා ඇතුළු පාස්කු ප්‍රහාර මහ නඩුවේ චූදිතයන් කිහිපදෙනෙකුම මෙම වනාතවිල්ලුව අවි ගබඩා කිරීමේ නඩුවේද චූදිතයන් ලෙස නම් කර ඇත.
