ජලයේ විෂ සහිත බවක් නොමැති බව රසායනාගාර පරීක්ෂණවලින් තහවුරු වීමත් සමඟ බෙදාහැරීම් යළි ඇරඹේ.
කැලණි ගඟ ආශ්‍රිත ප්‍රධාන ඇළ මාර්ගයකට රසායනික ද්‍රව්‍යයක් එක්වීමේ අවදානමක් මතුවීමත් සමඟ මහජන සෞඛ්‍ය ආරක්ෂාව වෙනුවෙන් තාවකාලිකව අත්හිටුවූ අඹතලේ සහ බියගම (කැලණි දකුණු ඉවුර) ජල පවිත්‍රාගාරවල කටයුතු යළි සාමාන්‍ය තත්ත්වයට පත්කර තිබේ. ජාතික ජලසම්පාදන හා ජලාපවහන මණ්ඩලය, ආපදා කළමනාකරණ මධ්‍යස්ථානය, මධ්‍යම පරිසර අධිකාරිය සහ ත්‍රිවිධ හමුදාව එක්ව රාත්‍රිය පුරා සිදුකළ ඒකාබද්ධ විමර්ශන හා රසායනාගාර පරීක්ෂණවලින් අනතුරුව ජලයේ කිසිදු විෂ සහිත තත්ත්වයක් නොමැති බව නිල වශයෙන් තහවුරු කර ගැනිණි.
මධ්‍යම රාත්‍රියේ ක්‍රියාත්මක වූ ක්ෂණික පියවර
සිද්ධිය වාර්තා වී ඇත්තේ හෙයියංතුඩුව, පට්ටිවිල ප්‍රදේශයේ කැලණි ගඟට ජලය ගලාබසින ප්‍රධාන ඇළ මාර්ගයක් ආසන්නයෙනි. පෞද්ගලික ආයතනයකට අයත් භූමියක තිබූ රසායනික ද්‍රව්‍ය අඩංගු බැරලයක් අදාළ ඇළ මාර්ගයට වැටී ඇති බවට ප්‍රදේශවාසීන්ගෙන් සහ අදාළ අංශ වෙතින් ඊයේ (24) රාත්‍රී 11:30 ට පමණ ලද තොරතුරු මත වහාම මෙම ආරක්ෂිත ක්‍රියාමාර්ග ගෙන තිබේ.
ජල පිරිපහදු සඳහා ලබාගන්නා අමු ජලයට (Raw Water) කිසියම් අපද්‍රව්‍යයක් මුසුවී ඇත්දැයි පරීක්ෂා කර තහවුරු කරගන්නා තෙක්, පූර්ව ආරක්ෂිත පියවරක් ලෙස කොළඹ සහ තදාසන්න නගර රැසකට ජලය සපයන ප්‍රධාන ජල පවිත්‍රාගාර දෙකෙහිම ක්‍රියාකාරීත්වය මධ්‍යම රාත්‍රියේම තාවකාලිකව නවතා දැමීමට ජලසම්පාදන මණ්ඩලය පියවර ගත්තේය. මෙම තීරණයත් සමඟ කොළඹ නගරය, බත්තරමුල්ල, ශ්‍රී ජයවර්ධනපුර කෝට්ටේ, වැල්ලවත්ත මෙන්ම ගම්පහ, බියගම සහ කැලණිය ඇතුළු ප්‍රදේශ රැසක ජල සැපයුම අද (25) අලුයම තාවකාලිකව ඇණහිටියේය.
විද්‍යාත්මක පරීක්ෂණ සහ රාත්‍රී මෙහෙයුම
අනතුර අනාවරණය වීමත් සමඟ ජාතික ජලසම්පාදන හා ජලාපවහන මණ්ඩලයේ රසායනඥයින් (Chemists) සහ ඉංජිනේරුවරුන් ඇතුළු තාක්ෂණික කණ්ඩායම්, ත්‍රිවිධ හමුදාවේ සහ ආපදා කළමනාකරණ මධ්‍යස්ථානයේ සහයෝගය ඇතිව ක්ෂේත්‍ර පරීක්ෂණ ආරම්භ කළහ. කැලණි ගඟේ සහ අදාළ ඇළ මාර්ගයේ විවිධ ස්ථානවලින් ලබාගත් ජල සාම්පල රසායනාගාර වෙත යොමුකර විශේෂ පරීක්ෂණ මාලාවක් සිදුකරන ලදී.
පරීක්ෂණ ප්‍රතිඵල පිළිබඳව කරුණු පැහැදිලි කළ ආපදා කළමනාකරණ මධ්‍යස්ථානයේ අධ්‍යක්ෂ ප්‍රදීප් කොඩිප්පිලි සඳහන් කළේ, අදාළ රසායනික ද්‍රව්‍ය විෂ රහිත බවට මූලික පරීක්ෂණවලදී අනාවරණය වී ඇති බවත්, පානීය ජලයට හානියක් සිදුවීම වැළැක්වීමට අදාළ සියලු රාජ්‍ය ආයතන ඒකාබද්ධව ක්ෂණිකව ක්‍රියාත්මක වූ බවත්ය.
ජලසම්පාදන මණ්ඩලයේ සභාපතිවරයාගේ ප්‍රකාශය
සිදුවූ තත්ත්වය සහ ගත් ක්‍රියාමාර්ග සම්බන්ධයෙන් අදහස් දැක්වූ ජාතික ජලසම්පාදන හා ජලාපවහන මණ්ඩලයේ සභාපති චන්දන බණ්ඩාර:
"ඊයේ රාත්‍රී 11:30 ට පමණ ජාතික ආපදා කළමනාකරණ මධ්‍යස්ථානයෙන් අපට මේ පිළිබඳ ප්‍රධාන දැනුම්දීම ලැබුණා. ඒ මොහොතේම ජනතාවගේ ආරක්ෂාව වෙනුවෙන් අඹතලේ සහ බියගම ජල පවිත්‍රාගාර තාවකාලිකව ක්‍රියා විරහිත කර ජලය ලබාගැනීම අත්හිටුවීමට අපට සිදු වුණා. මණ්ඩලයේ රසායනඥයින් සහ ඉංජිනේරුවරුන් අදාළ ප්‍රදේශයට ගොස් උදෑසන වන තෙක්ම විවිධ ස්ථානවලින් ජල සාම්පල ලබාගෙන රසායනාගාර හරහා පරීක්ෂා කළා. කැලණි ගඟේ ජලයේ තත්ත්වය සම්පූර්ණයෙන්ම සුරක්ෂිත බව තහවුරු කරගැනීමෙන් පසුවයි පාන්දර 4:30 ට නැවත පවිත්‍රාගාර ආරම්භ කළේ. ජලයට යම් අපද්‍රව්‍යයක් මුසු වුණාද නැද්ද යන්න පිළිබඳ නිශ්චිත තහවුරුවක් ලැබෙන තෙක් මහජන ආරක්ෂාව උදෙසා පිරිපහදු කටයුතු නැවැත්වීමට සිදුවූ අතර, එමගින් ජනතාවට මුහුණපෑමට සිදුවූ අපහසුතාව පිළිබඳව අප කනගාටුව පළ කරනවා."
ජලයේ ගුණාත්මකභාවය මැන බැලීමේ නිත්‍ය පද්ධතිය පිළිබඳවද කරුණු පැහැදිලි කළ සභාපතිවරයා, පිරිපහදුව සඳහා ලබාගන්නා අමු ජලය මෙන්ම පිරිපහදු කර බෙදාහරින ජලයද නිරන්තරයෙන් රසායනාගාර වාර්තා මගින් නිරීක්ෂණය කරන බැවින් කිසියම් අනාරක්ෂිත තත්ත්වයක් වුවහොත් ක්ෂණිකව හඳුනාගැනීමේ හැකියාව පවතින බව පෙන්වා දුන්නේය.
පොලිස් සහ පරිසර අධිකාරී විමර්ශන
මේ සම්බන්ධයෙන් ශ්‍රී ලංකා පොලීසිය සහ මධ්‍යම පරිසර අධිකාරිය ද වෙනම විමර්ශන ආරම්භ කර ඇත. දැනට සිදුකර ඇති මූලික පොලිස් විමර්ශනවලට අනුව, මෙම රසායනික බැරලය කිසිවෙකු විසින් හිතාමතා ජල මාර්ගයට මුදාහැර නොමැති අතර, ඇළ මාර්ගය ආසන්නයේ තිබූ භූමියක දීර්ඝ කාලයක් තබා තිබීම හේතුවෙන් ක්‍රමයෙන් ඇළට පෙරළී ගොස් ඇති බවට තොරතුරු අනාවරණය වී තිබේ.
අද අලුයම 4:30 වන විට පවිත්‍රාගාර යළි ක්‍රියාත්මක කිරීමත් සමඟ කොළඹ නගරය ඇතුළු පහත්බිම් ප්‍රදේශ රැසක ජල සැපයුම සාමාන්‍ය තත්ත්වයට පත් කර ඇති අතර, ජල පීඩනය යථා තත්ත්වයට පත්වීමත් සමඟ උස් බිම් ආශ්‍රිත ප්‍රදේශවලටද කඩිනමින් ජලය ලැබීමට සලස්වා ඇති බව ජලසම්පාදන මණ්ඩලය වැඩිදුරටත් දැනුම් දෙයි.
