හිටපු ජනාධිපති ගෝඨාභය රාජපක්ෂගෙන් ප්‍රකාශයක් සටහන් කරගත් බව පොලිසිය අධිකරණයට දන්වයි
ජනාධිපති වැය ශීර්ෂය යටතේ එකම කාලසීමාවක් තුළ තනතුරු දෙකක් සඳහා වැටුප් හා දීමනා ලබාගැනීමේ සිද්ධියකට අදාළව රක්ෂිත බන්ධනාගාරගත කර සිටින නව ජනතා පෙරමුණේ නායක සුගීෂ්වර බණ්ඩාර ඉදිරිපත් කළ ඇප අයදුම්පත කොළඹ කොටුව මහේස්ත්‍රාත් පසන් අමරසේන අද (25) ප්‍රතික්ෂේප කළේය.
ඒ අනුව සැකකරු ලබන සැප්තැම්බර් මස 09 වැනිදා දක්වා තවදුරටත් රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කළේය.
මධ්‍යම අපරාධ විමර්ශන කාර්යාංශයේ කරුණු දැක්වීම
සිද්ධියට අදාළව මධ්‍යම අපරාධ විමර්ශන කාර්යාංශය අධිකරණය හමුවේ කරුණු දක්වමින් පෙන්වා දුන්නේ 2022 වර්ෂයේදී හිටපු ජනාධිපති ගෝඨාභය රාජපක්ෂගේ පෞද්ගලික ලේකම්වරයෙකු වශයෙන් කටයුතු කරමින් සිටියදී, එම කාලසීමාවේදීම ජනාධිපති ලේකම් කාර්යාලයේ ව්‍යාපෘති අධ්‍යක්ෂ ධුරයක ද කටයුතු කරමින් ජනාධිපති වැය ශීර්ෂය යටතේ වැටුප් ලබාගෙන ඇති බවට විමර්ශනවලදී තොරතුරු අනාවරණය වී ඇති බවයි.
රාජ්‍ය මුදල් අවභාවිත කිරීම සහ මූල්‍ය රෙගුලාසි උල්ලංඝනය කිරීම සම්බන්ධයෙන් වන මෙම විමර්ශනයට අදාළව සැකකරු ඉකුත් ජුනි මස 18 වැනිදා අත්අඩංගුවට ගෙන අධිකරණයට ඉදිරිපත් කිරීමෙන් පසු අඛණ්ඩව රක්ෂිත බන්ධනාගාර භාරයේ පසුවේ.
හිටපු ජනාධිපතිවරයාගෙන් ප්‍රකාශ සටහන් කරගැනීම
මෙම විමර්ශන කටයුතුවල ප්‍රගතිය අධිකරණයට වාර්තා කළ විමර්ශන නිලධාරීන් සඳහන් කළේ අදාළ සිදුවීම සම්බන්ධයෙන් හිටපු ජනාධිපති ගෝඨාභය රාජපක්ෂගෙන් ද ප්‍රකාශයක් සටහන් කරගෙන ඇති බවයි.
විමර්ශන කටයුතු තවදුරටත් පුළුල් ලෙස ක්‍රියාත්මක වන බැවින් සැකකරුට ඇප ලබාදීම විමර්ශනවලට බාධාවක් විය හැකි බවට පොලිසිය කළ පෙන්වාදීම් සහ දෙපාර්ශ්වයේ නීතිඥවරුන් ඉදිරිපත් කළ කරුණු සලකා බැලූ මහේස්ත්‍රාත්වරයා, ඇප ඉල්ලීම ප්‍රතික්ෂේප කරමින් සැකකරු යළි රක්ෂිත බන්ධනාගාරගත කිරීමට නියෝග කරනු ලැබීය.
