අධිකරණයේ ගෞරවය රැකගැනීමටත්, සත්‍ය අසත්‍යතාව රටට හෙළිකිරීමටත් කඩිනම් පියවර ගැනීමේ අවශ්‍යතාව පෙන්වාදෙයි
ශ්‍රී ලංකාවේ අග්‍රවිනිශ්චයකාර ප්‍රීති පද්මන් සුරසේන සහ ජ්‍යෙෂ්ඨ රාජ්‍ය නිලධාරීන් කිහිපදෙනෙකු සම්බන්ධයෙන් පසුගියදා පාර්ලිමේන්තුවේදී මතු වූ කරුණු මෙන්ම සිවිල් හා මාධ්‍ය ක්ෂේත්‍රයේ පළවූ වාර්තා පිළිබඳව පූර්ණ හා අපක්ෂපාතී විමර්ශනයක් පවත්වන ලෙස ඉල්ලමින් අල්ලස් හෝ දූෂණ චෝදනා විමර්ශන කොමිෂන් සභාව වෙත ඉල්ලීම් ඉදිරිපත් වී තිබේ.
ජාතික වෘත්තීය සමිති සහ සිවිල් පෙරමුණ විසින් මෙම ඉල්ලීම සිදු කර ඇති අතර, පාර්ලිමේන්තු මන්ත්‍රීවරුන් වන රෝහිණී කවිරත්න, දයාසිරි ජයසේකර සහ අජිත් පී. පෙරේරා විසින් පාර්ලිමේන්තු සභාවාරයේදී මතු කරන ලද කරුණු විමර්ශනයට ලක් විය යුතු බව වෘත්තීය සමිති ක්‍රියාකාරික වෛද්‍ය චමල් සංජීව පෙන්වා දෙයි.
වත්කම්, වාහන බලපත්‍ර සහ එක්ස්-ප්‍රෙස් පර්ල් වන්දිය පිළිබඳ ඉල්ලීම
අදාළ සංවිධානය කොමිසමෙන් ඉල්ලා සිටින්නේ අග්‍රවිනිශ්චයකාරවරයා සහ ඔහුගේ පවුලේ සාමාජිකයන්ගේ වත්කම් උපයා ගැනීම්, වත්කම් ප්‍රකාශනවල නිරවද්‍යතාව සහ ‘එක්ස්-ප්‍රෙස් පර්ල්’ (X-Press Pearl) නෞකා ව්‍යසනයෙන් මෙරටට හිමිවිය යුතු පාරිසරික හානි වන්දි ලබා ගැනීමේ ක්‍රියාවලියේ ප්‍රමාදයන් පිළිබඳව නැඟී ඇති චෝදනා සම්බන්ධයෙන් ස්වාධීන පරීක්ෂණයක් සිදුකරන ලෙසයි.
මේ අතර, එක්සත් රාජධානිය පදනම් කරගත් ‘Fair Comment’ ස්වාධීන ගවේෂණාත්මක ආයතනයේ කතුවර ජසීම් ජමීල් විසින්ද 2023 අංක 9 දරන දූෂණ විරෝධී පනත යටතේ අල්ලස් හෝ දූෂණ චෝදනා විමර්ශන කොමිෂන් සභාව වෙත විශේෂ ලිපියක් යොමු කර තිබේ. කොළඹ 07, වෝඩ් පෙදෙසේ සුඛෝපභෝගී නිවාස සංකීර්ණයක පිහිටි රුපියල් මිලියන 185කට අධික වටිනාකමකින් යුතු නිශ්චල දේපළක් පැවරීම සහ රජයේ නිලධාරීන්ට හිමිවන වාහන ආනයන බලපත්‍ර හෝ සහනදායී හිමිකම් තෙවන පාර්ශ්ව වෙත පැවරීමෙන් ලද ප්‍රතිලාභ වත්කම් බැරකම් ප්‍රකාශනවල නිසි පරිදි සඳහන් කර ඇත්දැයි විමර්ශනය කරන ලෙස එමඟින් ඉල්ලා ඇත.
මෙම පැමිණිලි ඉදිරිපත් කළ පාර්ශ්වයන් අවධාරණය කරන්නේ කිසිවෙකු වරදකරුවෙකු ලෙස පූර්ව නිගමනයකට නොඑළඹෙන බවත්, පවතින නීතිමය රාමුව තුළ කරුණු විමර්ශනය කර සත්‍ය කරුණු තහවුරු කර ගැනීම හරහා සමාජයේ පවතින සැකයන් දුරු කරගත හැකි බවත්ය.
රාජ්‍ය මූල්‍ය සහ නෛතික ප්‍රගතිය හෙළිදරව් කිරීමේ වැදගත්කම
අග්‍රවිනිශ්චයකාරවරයා සම්බන්ධ කරුණුවලට අමතරව, මීට පෙර පාර්ලිමේන්තුවේදී සාකච්ඡාවට බඳුන් වූ කන්ටේනර් වංචා, ගල් අඟුරු ආනයනය සහ භාණ්ඩාගාරයට අදාළ මූල්‍ය අක්‍රමිකතා මෙන්ම කථානායකවරයා සහ ජනාධිපති ලේකම්වරයා වෙත එල්ල වූ පැමිණිලි සම්බන්ධයෙන් ද මෙහිදී අවධානය යොමු කර තිබේ. මෙවැනි විමර්ශනවල ප්‍රගතිය ප්‍රමාදයකින් තොරව අධිකරණයට සහ මහජනතාවට හෙළිදරව් කිරීම ආයතනික විනිවිදභාවයට අත්‍යවශ්‍ය බව සිවිල් ක්‍රියාකාරීහු පෙන්වා දෙති.
මේ සම්බන්ධයෙන් අදහස් දක්වමින් සමාජ ක්‍රියාකාරික අචල දිවාකර ප්‍රකාශ කළේ, එක්ස්-ප්‍රෙස් පර්ල් ව්‍යසනයෙන් ශ්‍රී ලංකා රජයට සහ පීඩාවට පත් ධීවර ප්‍රජාවට හිමිවිය යුතු සම්පූර්ණ වන්දි මුදල් කඩිනමින් අයකර ගැනීමට බලධාරීන් මැදිහත් විය යුතු බවයි. ජ්‍යෙෂ්ඨ රාජ්‍ය නිලධාරීන් හෝ වෙනත් පාර්ශ්වයන් සම්බන්ධයෙන් නැඟෙන චෝදනා විධිමත් විමර්ශනයක් හරහා සත්‍ය හෝ අසත්‍ය බව තහවුරු කළ යුතු බවත්, කිසිදු පාර්ශ්වයක් ස්වාධීන පරීක්ෂණවලට ඉහළින් නොසිටිය යුතු බවත් ඔහු සඳහන් කළේය.
අධිකරණයේ ගෞරවය සහ මහජන විශ්වාසය සුරැකීම
ප්‍රජාතන්ත්‍රවාදී පාලන ව්‍යුහයක මූලික කුළුණක් වන අධිකරණ පද්ධතිය කෙරෙහි මහජනතාව තුළ පවතින අචල විශ්වාසය ආරක්ෂා කර ගැනීම උදෙසා මෙවැනි චෝදනා හා සමාජ මාධ්‍ය ඔස්සේ පැතිරෙන කටකතා විධිමත් පරීක්ෂණයකට ලක්වීම අත්‍යවශ්‍ය බව නීති හා සිවිල් ක්ෂේත්‍රයේ ප්‍රවීණයන්ගේ අදහසයි. නිසි විමර්ශනයක් සිදු කිරීමෙන් අනවශ්‍ය අනුමාන කිරීම් සහ සැකයන් පහව යන අතර, ආයතනික පාරදෘශ්‍යභාවය තහවුරු වන බව විශ්ලේෂකයෝ පෙන්වා දෙති.
මුලාශ්‍රය :
