බදු බර සහ ගොවි ගැටලුවලට විසඳුම් ඉල්ලා විපක්ෂයෙන් ආණ්ඩුවට චෝදනා
ශ්‍රී ලංකාව හරහා සිදුවන සුඛෝපභෝගී වාහන ප්‍රතිඅපනයන වෙළඳපොළ සහ මැදපෙරදිග කලාපීය භූ-දේශපාලනික අර්බුදය හමුවේ මෙරටට උදාවී ඇති ආර්ථික අවස්ථා උපරිමයෙන් ප්‍රයෝජනයට ගන්නා ලෙස ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ රජයට යෝජනා කරයි.
කොළඹදී පැවති ජන හමුවක් අමතමින් මන්ත්‍රීවරයා සඳහන් කළේ, පසුගිය කාලයේ මෙරට දේශපාලන වේදිකාවල දැඩි කතාබහට ලක්වූ සුඛෝපභෝගී වාහන ගෙන්වීම පිළිබඳ සංවාදය වෙනුවට, එමඟින් නිර්මාණය වන ආර්ථික හා සැපයුම් ජාල අවස්ථා කෙරෙහි අවධානය යොමුකිරීම කාලෝචිත බවයි.
ලැම්බෝගිනි සංවාදය සහ ප්‍රතිඅපනයන වෙළඳපොළ
පසුගියදා මෙරට වරායක් හරහා ගමන් කළ සුඛෝපභෝගී වාහන තොගයක් සම්බන්ධයෙන් අදහස් දැක්වූ රාජපක්ෂ, දේශපාලන වාසි තකා චෝදනා එල්ල කිරීම පසෙකලා මෙරට ගුවන් සහ වරාය පර්යන්ත හරහා සිදුවන ප්‍රතිඅපනයන ක්‍රියාවලිය වඩාත් ලිහිල් ප්‍රතිපත්ති යටතේ දිරිමත් කළ යුතු බව පෙන්වා දුන්නේය.
"එදා නාමල්ගේ ලැම්බෝගිනි බානවා කියපු අයගේ ආණ්ඩුව යටතෙත් අද ලැම්බෝගිනි බානවා. හැබැයි අපි මේවා පුද්ගලික දේශපාලන චෝදනා බවට පත් කරගන්නේ නෑ. මැදපෙරදිග අර්බුදයත් එක්ක අපේ වරායවල් සහ ගුවන් තොටුපළවල් වලට නව සැපයුම් වෙළඳපොළක් හැදෙනවා. රජය කළ යුත්තේ ප්‍රතිඅපනයන ප්‍රතිපත්ති ලිහිල් කරලා, ඒ හරහා රටට නව ආයෝජන සහ තරුණයන්ට රැකියා අවස්ථා උදාකර ගැනීමයි."
ජීවන වියදම, බදු ප්‍රතිපත්තිය සහ කෘෂි අර්බුදය
වත්මන් ආර්ථික තත්ත්වය සහ ජනතාව මුහුණ දෙන අභියෝග පිළිබඳව ද මෙහිදී මන්ත්‍රීවරයා සිය අදහස් පළ කළේය. විශේෂයෙන්ම සෘජු හා වක්‍ර බදු ඉහළ යාම හේතුවෙන් දෛනික වැටුප් ලබන්නන්, ව්‍යවසායකයින් සහ සාමාන්‍ය පාරිභෝගිකයා දැඩි පීඩනයකට පත්ව සිටින බව ඔහු පෙන්වා දුන්නේය.
ග්‍රාමීය ආර්ථිකයේ ප්‍රධාන ජීවනාලිය බඳු ගොවි ජනතාව මුහුණ දෙන ගැටලු පිළිබඳව කරුණු දක්වමින්, වී අස්වැන්න නෙළන කාලසීමාවන්හිදී නිසි කළමනාකරණයකින් තොරව සහල් ආනයනය කිරීම නිසා දේශීය ගොවියාගේ නිෂ්පාදනවලට නිසි මිලක් නොලැබෙන බවත්, අනෙක් පසින් නාගරික පාරිභෝගිකයාට ඉහළ මිලකට භාණ්ඩ මිලදී ගැනීමට සිදුව ඇති බවත් ඔහු සඳහන් කළේය. නියමිත වේලාවට පොහොර සහනාධාරය ගොවියා අතට පත් නොවීම කෘෂිකර්මාන්තයේ පසුබෑමට හේතුවක් වී ඇති බව ද ඔහු පැවසීය.
පරිපාලන විනිවිදභාවය සහ ආයෝජන පරිසරය
රාජ්‍ය ආයතනවල මෑතකාලීන පත්වීම්, රේගු නිෂ්කාශන ක්‍රියාවලීන් සහ ආර්ථික පරිපාලනය පිළිබඳ විනිවිදභාවය සම්බන්ධයෙන් ද මන්ත්‍රීවරයා ප්‍රශ්න කළේය. ව්‍යාපාරික ක්ෂේත්‍රයේ පවතින ඉහළ පොලී අනුපාත සහ අනම්‍ය බදු ප්‍රතිපත්ති හේතුවෙන් දේශීය කර්මාන්ත වැසී යාමේ අවදානමක් පවතින බවත්, විදේශ ආයෝජන ආකර්ශනය කර ගැනීමට නම් වෙළඳපොළ හිතකාමී සහ ස්ථාවර ආර්ථික සැලැස්මක් අත්‍යවශ්‍ය බවත් ඔහු අවධාරණය කළේය.
ආගමික නායකයින් සහ මහා සංඝරත්නයේ අවවාද අනුශාසනා කෙරෙහි රජයේ ප්‍රමාණවත් අවධානයක් යොමු විය යුතු බව පෙන්වා දුන් නාමල් රාජපක්ෂ, අතීත දේශපාලන ප්‍රතිවිරෝධතා වෙනුවට නූතන ලෝක ප්‍රවණතාවලට ගැළපෙන ප්‍රතිපත්තිමය වැඩපිළිවෙළක් ඔස්සේ ඉදිරියට යාමට සියලු පාර්ශ්ව එක්විය යුතු බව වැඩි දුරටත් කියා සිටියේය.
