*අසීරු මොහොතක පෑ මිත්‍රත්වයේ දෑත එක්සත් ජාතීන්ගේ සංවිධානයේ පැසසුමට
නේපාලයට බලපා ඇති විනාශකාරී ගංවතුර සහ නායයෑම් හේතුවෙන් විපතට පත්ව සිටින ජනතාවගේ හදිසි සහන සහ මානුෂීය මෙහෙයුම් කටයුතු වෙනුවෙන් ඇමරිකානු ඩොලර් මිලියනයක (USD 1 Million) මූල්‍ය ආධාරයක් ලබාදීමට ශ්‍රී ලංකා රජය පියවර ගෙන තිබේ.
ජනාධිපති අනුර කුමාර දිසානායක ගේ සෘජු උපදෙස් මත මෙම මුදල් ආධාරය නිදහස් කර ඇති අතර, ආපදාවෙන් ජීවිත අහිමි වූ සහ අවතැන් වූ ජනතාව වෙනුවෙන් ශ්‍රී ලංකා රජයේ සහ මෙරට ජනතාවගේ බලවත් ශෝකය නේපාලය වෙත පළ කර ඇත.
රාජ්‍යතාන්ත්‍රික මට්ටමේ මැදිහත්වීම
දෙරට අතර පවතින දිගුකාලීන ද්විපාර්ශ්වික මිත්‍රත්වය සිහිපත් කරමින්, විදේශ කටයුතු, විදේශ රැකියා සහ සංචාරක අමාත්‍ය විජිත හේරත් නේපාල විදේශ අමාත්‍ය ෂිසිර් ඛනාල් (Shisir Khanal) සමඟ දුරකථනයෙන් ඍජු සාකච්ඡාවක නිරත වී තිබේ. එහිදී ව්‍යසනය හමුවේ ශ්‍රී ලංකාව නේපාලය සමඟ නොසැලී සිටින බව ප්‍රකාශ කළ අමාත්‍යවරයා, අඛණ්ඩ ප්‍රතිසාධන කටයුතුවලදී තවදුරටත් සහාය ලබාදිය හැකි මාර්ග සම්බන්ධයෙන් සොයා බලන බවද තහවුරු කළේය.
දකුණු ආසියානු සහයෝගීතාව අගයමින් UN ඇගයීමක්
ශ්‍රී ලංකාවේ මෙම ක්ෂණික මානුෂීය පියවර එක්සත් ජාතීන්ගේ සංවිධානයේ (UN) විශේෂ ඇගයීමට පාත්‍ර වී ඇත. ශ්‍රී ලංකාවේ එක්සත් ජාතීන්ගේ නේවාසික සම්බන්ධීකාරක මාර්ක්-ඇන්ඩ්‍රේ ෆ්‍රැන්චේ (Marc-André Franche) 'X' පණිවිඩයක් නිකුත් කරමින් සඳහන් කර ඇත්තේ, අහිමිවීම් මෙන්ම අන්‍යයන්ගේ කරුණාව අත්විඳ ඇති රටකින් සිදු වූ මෙම ජීවිතාරක්ෂක මැදිහත්වීම "දකුණු-දකුණු සහයෝගීතාවයේ" (South-South solidarity) විශිෂ්ටතම ආදර්ශයක් බවයි.
