සුළු දඩේ සිරකරුවන් 1,454ක් මුදාගන්න පරිත්‍යාගශීලීන්ට ඇරයුමක්

රුපියල් දසදහසේ ඛේදවාචකය

අධිකරණය නියම කළ සුළු දඩ මුදල් පියවා ගැනීමට ආර්ථික වත්කමක් නොමැතිකමින් සිරදඬුවම් විඳින පිරිස 1,454ක් දක්වා ඉහළ ගොස් ඇති බව අධිකරණ අමාත්‍යාංශයේ නවතම සංඛ්‍යාලේඛන අනාවරණය කරයි.

විපක්ෂ මන්ත්‍රී රෝහිත අබේගුණවර්ධන මතු කළ ප්‍රශ්නයකට පිළිතුරු දෙමින් අධිකරණ හා ජාතික ඒකාබද්ධතා අමාත්‍ය හර්ෂන නානායක්කාර සභාගත කළ කරුණුවලට අනුව, ඉන් 421 දෙනෙකුම සිරගතව සිටින්නේ රුපියල් 10,000ත් 15,000ත් අතර සුළු දඩ මුදලක් ගෙවාගත නොහැකි වීමෙනි.

දඩය නොගෙවීම නිසා සිරබත් කන මෙම රැඳවියන් නඩත්තු කිරීමට රජයට දිනපතා වැයවන පිරිවැය, ඔවුන් ගෙවිය යුතු දඩ මුදල මෙන් කිහිප ගුණයක් වීම මෙරට අධිකරණ පද්ධතිය හමුවේ ඇති බරපතළ ප්‍රතිපත්තිමය ගැටලුවකි.

පිටස්තර මැදිහත්වීම් සඳහා විවෘත මාවතක්

සුදුසුකම් ලත් රැඳවියන් තෝරාගෙන ඔවුන්ගේ දඩ මුදල් බේරුම් කර නිදහස් කරගැනීමේ අවස්ථාව රජයේ සහ රාජ්‍ය නොවන සංවිධානවලට මෙන්ම ඕනෑම පෞද්ගලික ආයතනයකට විවෘතව පවතින බව අමාත්‍යවරයා මෙහිදී පෙන්වා දුන්නේය.

බන්ධනාගාර දෙපාර්තමේන්තුවේ පවතින නෛතික අවශ්‍යතා සපුරාලන්නේ නම් එවැනි පරිත්‍යාගශීලී සමාජ මැදිහත්වීම් සඳහා කිසිදු බාධාවක් හෝ සීමාවක් නොමැති බව ඔහු පැහැදිලි කළේය.

සැකකරුවන් විශාල වශයෙන් රඳවා තැබීමෙන් පැනනැගී ඇති ඉඩකඩ අර්බුදය සමනය කිරීම වෙනුවෙන් 'රිමාන්ඩ් සැකකරුවන් මුදාහැරීමේ පනතේ' (Release of Remand Prisoners Act) නීතිමය විධිවිධාන ක්‍රියාත්මක කිරීම කෙරෙහිද රජයේ අවධානය යොමුව තිබේ.

බන්ධනාගාර තදබදය සංඛ්‍යා ලේඛන ඇසින්

මෙරට බන්ධනාගාර තුළ මේ වන විට රඳවා සිටින සමස්ත පුද්ගල සංඛ්‍යාව 39,019කි. එයින් 28,408 දෙනෙකුම නඩු අසමින් පවතින රිමාන්ඩ් සැකකරුවන් වන අතර, වරදකරුවන් වූ සිරකරුවන් ගණන 10,611කි.

දඩ මුදල් ගෙවාගත නොහැකිව සිරගතව සිටින 1,454 දෙනාගේ දඩ සීමා මෙසේ බෙදී යයි:

* රු. 10,000 - 15,000 අතර: රැඳවියන් 421යි
* රු. 15,000 - 25,000 අතර: රැඳවියන් 220යි
* රු. 25,000 - 50,000 අතර: රැඳවියන් 361යි
* රු. 50,000 - 100,000 අතර: රැඳවියන් 245යි
* රු. ලක්ෂයට වැඩි: රැඳවියන් 207යි

සිරකරුවන් අතුරින් 8,443 දෙනෙකුම වයස අවුරුදු 20ත් 50ත් අතර මෙරට ඵලදායී ක්‍රියාකාරී ශ්‍රම බලකාය නියෝජනය කරන තරුණ හා මැදිවියේ පිරිස් වීම කැපී පෙනෙන තත්ත්වයකි.

වැඩිහිටි රැඳවියන් පිළිබඳ ස්ථාවරය

වයෝවෘද්ධ රැඳවියන්ට සහන සැලසීම පිළිබඳ විපක්ෂ මන්ත්‍රීවරයා කළ විමසීමට ප්‍රතිචාර දැක්වූ අමාත්‍යවරයා, වයස අවුරුදු 70 ඉක්මවීම පමණක් සිරකරුවෙකු නිදහස් කිරීමට නීතිමය පදනමක් නොවන බව අවධාරණය කළේය.

අවුරුදු 68 හෝ 69 දී බරපතළ වරදකට වරදකරු වී සිරගත වන අයෙකුට වයස 70 සම්පූර්ණ වූ වහාම නිදහස ලැබිය නොහැකි බව හෙතෙම පෙන්වා දුන්නේය.

මේ වන විට බන්ධනාගාර තුළ වයස අවුරුදු 70-80 අතර සිරකරුවන් 150ක් සහ 80 ඉක්මවූවන් 11ක් පසුවන අතර, ඔවුන්ගේ සෞඛ්‍ය තත්ත්වය බන්ධනාගාර රෝහල් වාට්ටු මගින් තක්සේරු කර සුදුසු වෛද්‍ය නිර්දේශ මත සහන සැලසීමේ නෛතික ක්‍රියාපටිපාටිය තවදුරටත් පුළුල් කෙරේ.