පොලිස්පති ගලවාගැනීමේ මෙහෙයුමට මහේස්ත්‍රාත්වරයාගෙන් නෛතික තිතක්

එක්වරක් දුන් තීන්දුවක් ආපසු හැරවිය නොහැකියි

විනිසුරුවරයෙකු විවෘත අධිකරණයේදී ප්‍රකාශයට පත් කළ නියෝගයක් නැවත වෙනස් කිරීමට හෝ අලුතින් නිකුත් කිරීමට එම විනිසුරුවරයාටම නීතිමය බලයක් නොමැති බව ගම්පහ මහේස්ත්‍රාත් බන්ධුල ගුණරත්න ඊයේ (22) අවධාරණය කළේය.

රජයට එරෙහිව ජෙයරාජ් ප්‍රනාන්දුපුල්ලේ නඩු තීන්දුව පූර්වාදර්ශයක් ලෙස පෙන්වා දෙමින් මහේස්ත්‍රාත්වරයා පෙන්වා දුන්නේ, දැනටමත් ලබා දී ඇති නියෝගයකට පිටින් ගොස් පොලිසියට සහන සැලසීමට මහේස්ත්‍රාත් අධිකරණයකට කිසිදු ඉඩක් නොමැති බවයි.

නීති කොට්ඨාසය හදිසි මෝසමක් දැම්මේ ඇයි?

පොලිස් නීති කොට්ඨාසයේ අධ්‍යක්ෂ පොලිස් අධිකාරී නිලුපුල් සෝමසිංහ ඇතුළු ඉහළ නිලධාරී කණ්ඩායමක් හදිසි මෝසමක් මගින් අධිකරණය හමුවේ පෙනී සිටියේ සුවිශේෂී නෛතික උගුලකට මැදිව සිටියදීය.

අහිංසක පුරවැසියන්ට පදනම් විරහිතව නඩු පැවරීම වළක්වමින් සමස්ත පොලිස් බළකායටම චක්‍රලේඛයක් නිකුත් කරන ලෙස පොලිස්පතිවරයා වෙත නැවත වරක් නියෝගයක් දෙන ලෙස පොලිසිය මෙහිදී ඉල්ලා සිටියේය.

නීති ක්ෂේත්‍රයේ විචාරකයින් පෙන්වා දෙන්නේ, මෙලෙස යළි නියෝගයක් ලබාගැනීම හරහා පොලිස්පතිවරයා මත පැටවී ඇති අධිකරණ අපහාස චෝදනාව මඟහැරීම පොලිසියේ අභිප්‍රාය වූ බවයි.

රුපියල් ලක්ෂයක වන්දියක් ගෙවීමට සිදුවූ නඩු දෙක

මෙම සමස්ත නෛතික අර්බුදයට මුලපිරුවේ ගම්පහ දෙවලපොළ ප්‍රදේශයේ පදිංචි චාමර චතුරංග මාරසිංහ නමැත්තාට එරෙහිව ගොනු වූ ව්‍යාජ නඩු යුගලයයි.

අයිස් සහ හෙරොයින් ළඟ තබාගත් බවට පවසමින් ගම්පහ දූෂණ මර්දන අංශය එකම දිනයේ ගොනු කළ අංක 1743 සහ 1744 දරන නඩු විභාග කළ අධිකරණය, ඒවා සම්පූර්ණයෙන්ම පදනම් විරහිත බව අනාවරණය කරගත්තේය.

අදාළ නිලධාරීන් තිදෙනාට රුපියල් 25,000 බැගින්ද, පොලිස් දෙපාර්තමේන්තුවට රුපියල් ලක්ෂයක මුදලක්ද විත්තිකරුට වන්දි ලෙස ගෙවීමට නියම වූයේ ඉන් අනතුරුවය.

දින නියමයන් මගහරිමින් කළ 'රැවටීම'

පුරවැසියන් දඩයම් කරන මෙවැනි අසත්‍ය නඩු වැළැක්වීම සඳහා සමස්ත දිවයිනම ආවරණය වන චක්‍රලේඛයක් නිකුත් කිරීමට පොලිස්පතිවරයාට මාස පහකට අධික කාලයක් ලබා දී තිබිණි.

එහෙත් එම නියෝගය වෙනුවට බස්නාහිර උතුර භාර නියෝජ්‍ය පොලිස්පතිවරයා සීමිත ප්‍රදේශයකට නිකුත් කළ මාර්ගෝපදේශ පත්‍රිකාවක් අධිකරණයට ඉදිරිපත් කිරීම දැඩි දෝෂදර්ශනයට ලක්විය.

අධිකරණය හෑල්ලුවට ලක් කරමින් නොමඟ යැවීමට තැත් කිරීම තුළින් පොලිස්පතිවරයා අධිකරණයට අපහාස කර ඇති බවට මහේස්ත්‍රාත්වරයා නිගමනය කළේය.

නඩු ගොනුව අභියාචනාධිකරණයට

පොලිස්පතිවරයාට එරෙහිව අධිකරණ අපහාසය යටතේ නඩු පැවරීම සඳහා සම්පූර්ණ නඩු ලිපිගොනුව අභියාචනාධිකරණ සභාපති විනිසුරුවරයා වෙත යොමු කිරීමට මහේස්ත්‍රාත්වරයා පියවර ගත්තේය.

පොලිසියේ ඉල්ලීම ප්‍රතික්ෂේප කළ මහේස්ත්‍රාත්වරයා, අභියාචනාධිකරණයට යොමු කළ එම ලිපිගොනුවේ පිටපතක් පමණක් පොලිස් නීති කොට්ඨාසය වෙත මුදාහරින ලෙස අධිකරණ රෙජිස්ට්‍රාර්වරියට නියෝග කළේය.