පොළොන්නරුවේ නව ඇත්අතුරු සෙවණින් වන අලි පරපුරට රැකවරණයක්

පැය නවයක මාරක ගමන නිමා වීම

දිවයිනේ සමස්ත අලි ගහනය 7,000කට ආසන්න වන අතර ඉන් 1,300ක් පමණ සැරිසරන්නේ පොළොන්නරුව කලාපයේ වනපෙත් ආශ්‍රිතවයි. දුම්රිය අනතුරු, ගංවතුර සහ ගැටුම් හමුවේ තුවාල ලබන බිළිඳු අලි පැටවුන්ට මෙතෙක් ප්‍රතිකාර පතා දකුණේ උඩවලව දක්වා පැය 7ත් 9ත් අතර දුරක් ගෙවන්නට සිදුවිය.

එම දීර්ඝ ගමනේදී දැඩි කම්පනයට සහ විජලනයට ලක්වීමෙන් අලි පැටවුන්ගේ ජීවිත අවදානම ඉහළ මට්ටමක පැවතිණි.

පොළොන්නරුව දිස්ත්‍රික් ලේකම් සුජන්ත ඒකනායක ගේ මැදිහත්වීමෙන්, වන සංරක්ෂණ දෙපාර්තමේන්තුව සතු කලාහගල හෙක්ටයාර 15ක භූමියක් මේ සඳහා නිල වශයෙන් වෙන් කෙරුණේ එම බාධකය මුළුමනින්ම ඉවත් කරමිනි. මෙහි ප්‍රතිඵලයක් ලෙස අනතුරට පත්වන ඕනෑම සතෙකුට පැයක් හෝ දෙකක් ඇතුළත කඩිනම් පශු වෛද්‍ය ප්‍රතිකාර සහතික කෙරේ.

උපගහන තුන සහ ජාන විද්‍යාත්මක ගැටලුව

මෙම පියවර හුදු සත්ත්ව රෝහලක් පිහිටුවීමට එහා ගිය විද්‍යාත්මක අවශ්‍යතාවක් බව හිටපු වනජීවී අධ්‍යක්ෂ ජනරාල් මෙන්ම අලි පර්යේෂක ආචාර්ය සුමිත් පිළපිටිය ගේ නිරීක්ෂණ මඟින් තහවුරු වේ.

පේරාදෙණිය විශ්වවිද්‍යාලය සහ වනජීවී දෙපාර්තමේන්තුව එක්ව කළ පර්යේෂණ අනුව මෙරට අලි ගහනය උතුරු හා උතුරු මැද, නැගෙනහිර මෙන්ම දකුණ ලෙස ස්වභාවික උපගහන (Sub-populations) තුනකට වෙන්ව පවතී.

උතුරෙන් රැගෙන යන අලි පැටවුන් උඩවලවේදී පුනරුත්ථාපනය කර දකුණේ වනාන්තරවලට මුදාහැරීම හේතුවෙන් එම ස්වභාවික ජාන සමතුලිතතාවට බාධා එල්ල විය. කලාහගල මධ්‍යස්ථානය තුළින් සුවපත් වන සතුන් නැවත උතුරු-මැද නිජබිම්වලටම මුදාහැරීමට හැකිවීම පාරිසරික වශයෙන් සුවිශේෂී ජයග්‍රහණයකි.

ප්‍රදේශවාසීන්ට විවර වන ආර්ථික මාවත්

නව මධ්‍යස්ථානය සත්ත්ව සුබසාධනයට සීමා නොවී, පොළොන්නරුව ප්‍රදේශයේ ග්‍රාමීය ආර්ථිකයටද ඍජු පණක් ලබාදෙනු ඇත.

අලි පැටවුන්ට අවශ්‍ය දෛනික ආහාර සහ ශාක පත්‍ර සැපයීම වෙනුවෙන් ප්‍රදේශවාසීන්ට ස්ථාවර ආදායම් මාර්ග නිර්මාණය වේ.

ඓතිහාසික උරුමයන් සොයා පැමිණෙන දෙස් විදෙස් සංචාරකයින් පරිසර හිතකාමී අත්දැකීමක් ලෙස මෙම පරිශ්‍රය වෙත ආකර්ෂණය කරගැනීමට ද දිස්ත්‍රික් ලේකම් කාර්යාලය සැලසුම් කර ඇත.