කේඩීයූ අර්බුදය: සිසුන් සහ රෝගීන් පත්වුණු බරපතළ අවදානම

ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලය (KDU) මෙරට ආරක්ෂක අංශවල වෘත්තීය අවශ්‍යතා සපුරාලීමට බිහිවූ විශිෂ්ට ආයතනයකි. එහෙත් කාලයත් සමඟ සිවිල් අධ්‍යාපනයට විවෘත වූ මෙම ආයතනය, මේ වන විට නීතිමය පදනම, සම්පත් කළමනාකරණය සහ විගණන විනිවිදභාවය පිළිබඳ ප්‍රබල අභියෝගයකට මුහුණ දී සිටියි.

මෙම පරිපාලන ගැටලු හුදු ලිපිගොනුවලට සීමා නොවී, රටේ සිසුන්ගේ අනාගතයටත්, ප්‍රතිකාර පතන රෝගී ජීවිතවලටත් සෘජුවම බලපෑම් එල්ල කරමින් තිබේ.

1981 නීතිය සහ 2012න් පසු මතු වූ අර්බුදය

1981 අංක 68 දරන පනත මගින් මෙම ආරක්ෂක ඇකඩමිය පිහිටුවීමේදී ගෙවීම් පදනම මත සාමාන්‍ය සිවිල් සිසුන් (Day Scholars) බඳවාගැනීමට පැහැදිලි නෛතික ප්‍රතිපාදන සලසා තිබුණේ නැත. එහෙත් 2012 වසරේ සිට ක්‍රමිකව ගාස්තු අයකරමින් සිවිල් සිසුන් වෛද්‍ය පීඨයට ඇතුළත් කරගැනීම ඇරඹිණි.

වසර 12කට වැඩි කාලයක් නීතිමය රාමුව සංශෝධනය නොකර පවත්වාගෙන ගිය මෙම ක්‍රමවේදය, 2025/2026 වර්ෂය සඳහා දේශීය සිවිල් සිසුන්ට හදිසියේම අහිමි කර දැමීය. එම අවස්ථාව හමුදා කැඩෙට් නිලධාරීන්ට සහ විදේශීය සිසුන්ට පමණක් සීමා කිරීමට පියවර ගැනීමත් සමඟ දේශීය සිසුන්ගේ මාවත ඇහිරී ගියේය.

නීතිමය ගැටලුව නිරාකරණය කරන තෙක් මෙය "තාවකාලික පියවරක්" බව පැවසුව ද, නිශ්චිත විසඳුම් කාලසටහනක් හෝ සංක්‍රාන්ති සැලසුමක් නොමැති වීම පවුල් පිටින් අසරණ කර තිබේ. දේශීයව ඉඩ අහිමි වන දරුවන්ට අධික පිරිවැයක් දරා විදේශගත වීමට සිදුවීමෙන් පෞද්ගලික ආර්ථිකය මෙන්ම රටේ විදේශ විනිමය ද පීඩනයට ලක්වෙයි.

රෝහලේ නීතිමය තත්ත්වය සහ උපකරණ අපතේ යාම

විශ්වවිද්‍යාල ශික්ෂණ රෝහල (UHKDU) ක්‍රියාත්මක විය යුත්තේ රජයේ රෝහල් ආකෘතියක් යටතේද, නැතහොත් පෞද්ගලික ගෙවීම් ආකෘතියක් යටතේද යන්න පිළිබඳව පොදු ව්‍යාපාර පිළිබඳ කාරක සභාව (COPE) ප්‍රශ්න මතු කර තිබේ. සේවා ගාස්තු, කාර්ය මණ්ඩල අනුයුක්ත කිරීම් සහ සාමාන්‍ය ජනතාවට සෞඛ්‍ය සේවා ලබාදීමේ වගකීම නිවැරදිව තීරණය වන්නේ මෙම නීතිමය ස්ථාවරය මතය.

රෝහලේ අකුණු සන්නායක පද්ධතියේ රුපියල් මිලියන 8.44ක වටිනාකමකින් යුත් තඹ පටි මීටර් 2,199ක් සොරකම් කිරීම පිළිබඳව ද විගණන වාර්තාවල අවධානය යොමුව ඇත. විශේෂයෙන් නැතිවූ බව කියන තොග සහ පොලිසිය සොයාගත් ප්‍රමාණ අතර පැහැදිලි පරස්පරතා පැවතීම, අභ්‍යන්තර ඉන්වෙන්ටරි සහ ආරක්ෂක අධීක්ෂණයේ පවතින දුර්වලතා හෙළිදරව් කරන්නකි.

අනෙක් අතට, රුපියල් කෝටි ගණනක් වටිනා අතිනවීන වෛද්‍ය උපකරණ භාවිතයට නොගෙන නිකරුණේ දිරාපත්වීම සහ පුහුණු කාර්ය මණ්ඩල හිඟය නිසා දැඩි සත්කාර සේවා (ICU) සීමාවීම බරපතළ කාරණයකි. මිල අධික යන්ත්‍ර මිලදී ගත්ත ද, ඒවා නඩත්තු කිරීමට සහ ක්‍රියාත්මක කිරීමට නිසි කළමනාකාරිත්වයක් නොමැති වීමෙන් පීඩාවට පත්වන්නේ රෝගීන්ය.

වාණිජ සමාගම් සහ විනිවිදභාවයේ අභියෝගය

විශ්වවිද්‍යාල පරිශ්‍රය හා සම්බන්ධ CARE Technology Lanka සහ CUE Technologies Lanka වැනි වාණිජ සමාගම්වල ගනුදෙනු ද ස්වාධීන අධීක්ෂණයකට ලක්විය යුතු බවට පාර්ලිමේන්තු කාරක සභා අවධාරණය කරයි. රාජ්‍ය සම්පත් හා මහජන අරමුදල් පෞද්ගලික සමාගම් ව්‍යුහයන් සමඟ හමුවන තැන්වලදී පූර්ණ මූල්‍ය විනිවිදභාවය අත්‍යවශ්‍ය සාධකයකි.

නව උපකුලපති එයාර් වයිස් මාර්ෂල් ඉන්දික වික්‍රමසිංහ හමුවේ ඇත්තේ ආයතනය ප්‍රතිසංවිධානය කිරීමේ ප්‍රමුඛ වගකීමකි. සිසුන් බඳවාගැනීමේ පැහැදිලි මාර්ග සිතියමක් ප්‍රකාශයට පත්කිරීම, රෝහලේ මෙහෙයුම් ආකෘතිය නිරවුල් කිරීම සහ මහජන වත්කම් නිසි ලෙස භාවිත වන බව තහවුරු කිරීම, මෙම ප්‍රතිසංස්කරණවල සැබෑ සාර්ථකත්වය මනින නියම මිනුම්දණ්ඩ වනු ඇත.