අලුත් පරම්පරාව නැතිව දේශපාලන පැවැත්මක් නෑ: රනිල්

පිටකෝට්ටේ 'සිරිකොත' පක්ෂ මූලස්ථානයේ පැවැති එක්සත් ජාතික පක්ෂ කෘත්‍යාධිකාරී මණ්ඩල හමුවේදී හිටපු ජනාධිපතිවරයා පෙන්වා දුන්නේ, ලෝක දේශපාලන ප්‍රවණතා මේ වන විට මුළුමනින්ම වෙනස් වී ඇති බවයි.

පැරණි දේශපාලන සටන්පාඨ සහ වේදිකා විවේචන වෙනුවට පක්ෂයේ සමස්ත ප්‍රතිරූපය නවීනත්වයට ගැළපෙන සේ කඩිනමින් ප්‍රතිව්‍යුහගත විය යුතු බව මෙහිදී සාකච්ඡාවට ලක්විය.

මිලියන අටක තරුණ බලය සහ ඩිජිටල් මාවත

මෙරට අවුරුදු 15ත් 16ත් අතර පසුවන නව පරපුර ඇතුළුව මිලියන අටකට ආසන්න තරුණ ප්‍රජාව සාම්ප්‍රදායික පක්ෂ දේශපාලනය කෙරෙහි විශ්වාසය නොතබන බව හිටපු ජනාධිපතිවරයා සඳහන් කළේය.

ලංකාවේ අරගලය මෙන්ම බංග්ලාදේශයේ දේශපාලන පරිවර්තනයද මෙහෙයවනු ලැබුවේ මෙම තරුණ පරම්පරාවයි.

එක්සත් ජාතික පක්ෂය ඉදිරියට ගෙන යා යුත්තේ ඔන්ලයින් අවකාශය කේන්ද්‍ර කරගනිමින් බව එම තරුණ කණ්ඩායම් ඉදිරිපත් කළ යෝජනාව කාලෝචිත ප්‍රවණතාවක් ලෙස පිළිගත යුතු බව ඔහු පෙන්වා දුන්නේය.

පස් අවුරුදු සීමාවෙන් ඔබ්බට ගිය 25 වසරක සැලැස්මක්

මැතිවරණ ඉලක්ක කරගත් පස් අවුරුදු ප්‍රතිපත්ති ප්‍රකාශ මඟින් රටක් ගොඩනැඟිය නොහැකි බවත්, අලුත් පරපුර බලාපොරොත්තු වන්නේ දීර්ඝකාලීන දැක්මක් බවත් හිටපු ජනාධිපතිවරයා ප්‍රකාශ කළේය.

ජේ.ආර්. ජයවර්ධන සහ ආර්. ප්‍රේමදාස පාලන සමයේ අඛණ්ඩව ක්‍රියාත්මක වූ වසර 17ක ආර්ථික වැඩපිළිවෙළ රට සැලකිය යුතු තැනකට ගෙන ඒමට සමත් වූ ආකාරය ඔහු සිහිපත් කළේය.

වත්මන් ආණ්ඩුවේ පස් අවුරුදු ප්‍රතිපත්ති ප්‍රකාශයට සිදුව ඇති දෙය ජනතාවට දැන් පැහැදිලිව දැකගත හැකි බවත්, ඊට විසඳුමක් ලෙස එජාප හරිත පත්‍රිකාව හරහා වසර 25ක ජාතික සංවර්ධන රාමුවක් යෝජනා කළ බවත් ඔහු පැවසීය.

සභාග දේශපාලනයේ සීමාව සහ තරුණ බලාපොරොත්තු

එක්සත් ජාතික පක්ෂය සහ සමගි ජන බලවේගය එකතු වූ පමණින් මැතිවරණ ජයගත හැකි බවට පළවන මතය යථාර්ථවාදී නොවන බව රනිල් වික්‍රමසිංහ ගේ අදහස විය.

යුද්ධය හෝ කැරලි අත්නොදුටු නව පරපුර එවැනි සාම්ප්‍රදායික සන්ධාන කෙරෙහි අවධානය යොමු නොකරන බවත්, තමන් අපේක්ෂා කළ වෙනස වත්මන් පාලනයෙන් ඉටු නොවීම නිසා ඔවුන් විශාල වශයෙන් රට හැරයාමේ අවදානමක් පවතින බවත් පෙන්වා දෙන ලදී.

තරුණ පරපුර දිනාගැනීම සඳහා එක්සත් ජාතික පක්ෂය තුළ ජෙන්සි සහ මිලේනියල් නියෝජනය සහිත වෙනම කණ්ඩායම් දෙකක් දැනටමත් ක්‍රියාකාරී මට්ටමින් වගකීම් භාරගෙන ඇති බව ඔහු සඳහන් කළේය.

ශ්‍රී ලාංකේය අනන්‍යතාව සහ ථෙරවාදී ආර්ථිකය

සාම්ප්‍රදායික ජාතිකවාදී සීමාවන්ගෙන් ඔබ්බට ගොස් ශ්‍රී ලාංකේය අනන්‍යතාව දෙස අලුත් පරම්පරාව වෙනස්ම කෝණයකින් බලන බව මෙහිදී අවධාරණය කෙරිණි.

බුද්ධාගම ආරක්ෂා කිරීම සම්බන්ධයෙන් වර්තමානයේ මතු වී ඇති ගැටලු පිළිබඳව ගැඹුරින් සිතා බැලිය යුතු බව හිටපු ජනාධිපතිවරයා පෙන්වා දුන්නේය.

රට මුහුණ දී ඇති ආර්ථික හා සමාජීය අභියෝග ජයගැනීම සඳහා ථෙරවාදී ලක්ෂණ සහිත සමාජ වෙළඳ ආර්ථිකයක් ස්ථාපිත කිරීමේ කාලීන අවශ්‍යතාවද ඔහු යළිත් සිහිපත් කළේය.