හිරුණිකාගේ සිරදඬුවම් ඇපෑලට ත්‍රිපුද්ගල විනිසුරු මඩුල්ලක්

අභියාචනාධිකරණ තීන්දුවේ බෙදීමක්

දෙමටගොඩ තරුණයෙකු පැහැරගෙන යාමේ සිද්ධිය සම්බන්ධයෙන් තමන්ට නියම වූ වසර තුනක සිරදඬුවමෙන් නිදොස් කොට නිදහස් කරන ලෙස ඉල්ලා හිටපු පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර ඉදිරිපත් කළ අභියාචනය විභාග කිරීම සඳහා අභියාචනාධිකරණය නව ත්‍රිපුද්ගල විනිසුරු මඩුල්ලක් නම් කළේය.

මෙම අභියාචනය මුලින් විභාග කළ පී. කුමාරන් රත්නම් සහ ප්‍රදීප් හෙට්ටිආරච්චි යන ද්විපුද්ගල විනිසුරු මඩුල්ල අතර අවසන් තීන්දුව සම්බන්ධයෙන් නෛතික මතභේදයක් හටගෙන තිබිණි. විනිසුරුවන් දෙදෙනාගේ ස්ථාවරය බෙදුණු එකක් වූ බැවින්, නෛතික සම්ප්‍රදායට අනුව ඉදිරි පියවර සඳහා ගොනුව අභියාචනාධිකරණයේ සභාපති විනිසුරුවරයා වෙත යොමු කෙරිණි.

ජනවාරි 21 යළි මුල සිට විභාගයට

අභියාචනාධිකරණ සභාපති විනිසුරු රොහාන්ත අබේසූරිය හමුවේ මෙම පෙත්සම අද (නොවැම්බර් 11) කැඳවූ අවස්ථාවේදී, සභාපති විනිසුරුවරයා, පී. කුමාරන් රත්නම් සහ ප්‍රදීප් හෙට්ටිආරච්චි යන විනිසුරුවරුන්ගෙන් සමන්විත පූර්ණ විනිසුරු මඩුල්ලක් ඒ සඳහා නම් කරනු ලැබීය.

ඒ අනුව අදාළ අභියාචනා පෙත්සම ලබන වසරේ ජනවාරි 21 වනදා අලුතින් විභාගයට ගැනීමට දින නියම විය. නඩුව විභාගයට ගත් අවස්ථාවේදී ඇප මත මුදාහැර සිටින හිරුණිකා ප්‍රේමචන්ද්‍ර අධිකරණය හමුවේ පෙනී සිටියාය.

දෙමටගොඩ ඩිෆෙන්ඩර් සිදුවීම හා මහාධිකරණ තීන්දුව

මෙම නඩුවට පාදක වන්නේ 2015 දෙසැම්බර් 21 වැනිදා දෙමටගොඩ ප්‍රදේශයේ වෙළෙඳසලක සේවය කළ අමිල ප්‍රියංක නමැති තරුණයා කළු පැහැති ඩිෆෙන්ඩර් රථයකින් පැහැරගෙන ගොස් අයුතු ලෙස සිරකර තැබීමේ චෝදනාවයි.

කොළඹ මහාධිකරණයේ පැවති නඩු විභාගයේදී ඇයගේ ආධාරකරුවන් අට දෙනා අදාළ චෝදනාවලට වරද පිළිගැනීම නිසා ඔවුන්ට අත්හිටවූ සිරදඬුවම් නියම විය. චෝදනා ප්‍රතික්ෂේප කළ හිරුණිකා ප්‍රේමචන්ද්‍ර දීර්ඝ නඩු විභාගයකට මුහුණ දුන් අතර, අවසානයේ ඇය චෝදනා 18කට වරදකාරිය කරමින් මහාධිකරණය බරපතළ වැඩ සහිත තුන් වසරක සිරදඬුවමක් සහ දඩ නියම කළේය.

අධිකරණයේ නෛතික නියෝජනය

මහාධිකරණ තීන්දුව නීතියට පටහැනි බව පවසමින් එය අවලංගු කරන ලෙස ඉල්ලා විත්තිකාරිය විසින් මෙම අභියාචනය ගොනු කර ඇත.

අධිකරණය හමුවේ විත්තිකාර හිරුණිකා ප්‍රේමචන්ද්‍ර වෙනුවෙන් ජනාධිපති නීතිඥ ශවීන්ද්‍ර ප්‍රනාන්දු පෙනී සිටි අතර, නීතිපතිවරයා වෙනුවෙන් නියෝජ්‍ය සොලිසිටර් ජෙනරාල් ජනක බණ්ඩාර පෙනී සිටියේය.


වැඩිදුර කියවීම සඳහා:
හිරුණිකාගේ සිරදඬුවම් ඇපෑලට බෙදුණු තීන්දුවක්: තීරණය සභාපති විනිසුරුට