2026 වසරේ පළමු කාර්තුව තුළ ශ්‍රී ලංකා ආර්ථිකය සියයට 5.1ක ධනාත්මක වර්ධනයක් අත්කර ගෙන ඇත. පසුගිය 2025 වසරේ පළමු කාර්තුවේදී රුපියල් මිලියන 3,476,664ක් වූ දළ දේශීය නිෂ්පාදිතය (GDP), මෙවර රුපියල් මිලියන 3,652,503ක් දක්වා ඉහළ ගොස් තිබේ.
සරලවම කිවහොත්, රටේ සමස්ත නිෂ්පාදන හා සේවා ආර්ථිකයේ ප්‍රමාණය රුපියලෙන් සහ ශතයෙන් වර්ධනය වී ඇත. මෙය දීර්ඝ කාලීන ආර්ථික පසුබෑමකින් පසු අප ලබන පැහැදිලි සාර්ව ආර්ථික ජයග්‍රහණයකි.
ප්‍රධාන අංශ තුනේ හැසිරීම: කර්මාන්ත ඉදිරියෙන්
මෙම වර්ධනයේ නියමුවා බවට පත්ව ඇත්තේ කර්මාන්ත අංශයයි. කෘෂිකර්ම, කර්මාන්ත සහ සේවා යන ප්‍රධාන ක්ෂේත්‍ර තුනම මෙවර වාර්තා කර ඇත්තේ ධනාත්මක ප්‍රගතියකි.
* කර්මාන්ත අංශය: සියයට 7.2ක කැපී පෙනෙන වර්ධනයක්.
* සේවා අංශය: සියයට 3.4ක ස්ථාවර වර්ධනයක්.
* කෘෂිකර්ම අංශය: සියයට 1.1ක මන්දගාමී නමුත් ධනාත්මක වර්ධනයක්.
නිෂ්පාදන සහ ඉදිකිරීම් ඇතුළු කර්මාන්ත අංශයේ පිබිදීම සමස්ත වේගයට විශාල පණක් දී ඇත. දේශපාලන ස්ථාවරත්වය සහ සැපයුම් දාමයන් යථා තත්ත්වයට පත්වීම මීට ප්‍රධාන හේතු ලෙස ආර්ථික විශ්ලේෂකයෝ පෙන්වා දෙති.
සංඛ්‍යාලේඛන සහ පොළොවේ යථාර්ථය
කෙසේ වෙතත්, සාර්ව ආර්ථිකයේ මෙම සියයට 5.1ක පිම්ම සාමාන්‍ය ජනතාවගේ පසුම්බියට ඍජුවම දැනී තිබේද? ගැටලුව ඇත්තේ එතැනය. ආර්ථික විද්‍යාඥයන් පෙන්වා දෙන්නේ මෙය ‘පහළ පදනමක බලපෑම’ (Low Base Effect) විය හැකි බවයි. එනම්, පසුගිය වසරවල ආර්ථිකය දරුණු ලෙස කඩා වැටී තිබූ බැවින්, කුඩා ප්‍රගතියක් වුවද විශාල වර්ධන ප්‍රතිශතයක් ලෙස දර්ශනය වේ.
රටේ උද්ධමනය පාලනය වී තිබුණද, ජීවන වියදම තවමත් පවතින්නේ ඉහළ මට්ටමකය. එබැවින් මෙම සංඛ්‍යා දත්ත දෙස බලා පමණක් ආර්ථිකය සහමුලින්ම යහපත් වී ඇතැයි නිගමනය කිරීම නොමේරූ වැඩකි. සැබෑ සාර්ථකත්වය රඳා පවතින්නේ මෙම වර්ධනය ඉදිරි කාර්තු කිහිපය තුළදීත් අඛණ්ඩව පවත්වා ගැනීම මතය.
(සටහන : විපුල ගුණසේකර)
