*විදේශ ප්‍රේෂණ, සංචාරක පැමිණීම් සහ නිල සංචිත ඉහළට; පෞද්ගලික අංශයේ ණය ගැනුම්වලද ප්‍රබල වර්ධනයක්.
2025 අයවැය හිඟය පරාජය කරමින් රාජ්‍ය ආදායම 27.1%කින් ඉහළට; රාජ්‍ය වියදම් පාලනය කෙරෙයි
ශ්‍රී ලංකා ආර්ථිකයේ මූල්‍ය හා රාජ්‍ය මූල්‍ය අංශයන්හි කැපී පෙනෙන ප්‍රගතියක් පෙන්නුම් කරමින්, 2026 වසරේ මුල් මාස හය (ජනවාරි - ජූනි) සඳහා වන සමස්ත රාජ්‍ය අයවැය ශේෂය රුපියල් බිලියන 9.5 ක අතිරික්තයක් (Surplus) වාර්තා කිරීමට සමත්ව තිබේ.
පසුගිය 2025 වසරේ අදාළ කාල සීමාව තුළ රුපියල් බිලියන 405.6 ක දැවැන්ත අයවැය හිඟයක් (Deficit) වාර්තා වූ පසුබිමක මෙම සාධනීය හැරවුම සිදුව තිබීම විශේෂත්වයකි.
මහ බැංකුව විසින් නිකුත් කරන ලද නවතම ආර්ථික දර්ශක වාර්තාවට අනුව, 2026 ජනවාරි සිට ජූනි දක්වා කාලය තුළ රජයේ ආදායම සහ සහන ආධාර 27.1% කින් ඉහළ ගොස් ඇති අතර, එය රුපියල් බිලියන 2,956.0 ක් ලෙස සටහන් වේ. පසුගිය වසරේ එම කාලය තුළ මෙම ආදායම් අගය පැවතියේ රුපියල් බිලියන 2,325.1 ක් වශයෙනි.
මේ අතර, රජයේ සමස්ත වියදම් සහ ශුද්ධ ණය දීම් 7.9% කින් පමණක් ඉහළ ගොස් රුපියල් බිලියන 2,946.5 ක් දක්වා පාලනය කර ගැනීමට හැකි වී තිබේ.
ශ්‍රී ලංකාවේ විදේශීය මූල්‍ය ශක්තිය තවදුරටත් තහවුරු කරමින්, 2026 ජූලි මාසය අවසන් වන විට මෙරට නිල විදේශ සංචිත ප්‍රමාණය (Gross Official Reserves) ඇමරිකානු ඩොලර් මිලියන 6,591 ක් දක්වා ඉහළ ගොස් ඇති බව මහ බැංකුව පවසයි. මීට මහජන චීන බැංකුව (PBOC) සමඟ ඇති කරගත් මුදල් හුවමාරු (Swap) පහසුකමෙන් ලැබුණු ප්‍රතිලාභ ද ඇතුළත් වේ.
මීට අමතරව, විදේශ රැකියාවල නියුතු ශ්‍රී ලාංකිකයින් විසින් මෙරටට එවනු ලැබූ විදේශ ප්‍රේෂණ (Workers' Remittances) ප්‍රමාණය 2026 ජූලි මාසයේදී ඇමරිකානු ඩොලර් මිලියන 777.6 ක් දක්වා සැලකිය යුතු ලෙස ඉහළ ගොස් ඇත. එය 2026 ජූනි මාසයේ ලැබුණු ඩොලර් මිලියන 695.0 සහ 2025 ජූලි මාසයේ ලැබුණු ඩොලර් මිලියන 697.3 ට වඩා පැහැදිලි වර්ධනයකි.
සංචාරක ක්ෂේත්‍රය ද ඉහළ ප්‍රගතියක් අත්කර ගනිමින් ජූලි මාසය තුළ සංචාරකයින් 196,845 දෙනෙකු මෙරටට පැමිණ ඇති අතර, එය ජූනි මාසයේ පැමිණි සංචාරකයින් 124,551 ට සාපේක්ෂව කැපී පෙනෙන ඉහළ යාමකි.
සමස්ත ආර්ථික ප්‍රගතිය හමුවේ මෙරට කොටස් වෙළඳපොළෙන් ධනාත්මක ප්‍රතිචාර
මෙරට ව්‍යාපාරික හා ආර්ථික ක්‍රියාකාරකම් සක්‍රීය වෙමින් පවතින බව පෙන්වන තවත් සාධකයක් ලෙස, 2026 ජූනි මාසයේදී පෞද්ගලික අංශය වෙත ලබා දුන් ණය ප්‍රමාණය (Credit to the Private Sector) රුපියල් බිලියන 245.3 කින් ඉහළ ගොස් තිබේ. මෙය වාර්ෂික පදනමින් 27.4% ක ප්‍රබල වර්ධනයකි.
බැංකු පද්ධතියෙන් රජය ලබාගත් ශුද්ධ ණය ප්‍රමාණය (Net Credit to the Government) ජූනි මාසයේදී රුපියල් බිලියන 159.4 කින් පහත වැටී ඇති අතර, එමගින් පෞද්ගලික අංශයට වැඩි වශයෙන් ණය පහසුකම් ලබා ගැනීමට බැංකු පද්ධතිය තුළ ඉඩප්‍රස්ථා විවර වී තිබේ.
කෙසේ වෙතත්, 2026 අගෝස්තු 07 දිනෙන් අවසන් වූ සතිය තුළ වාණිජ බැංකු විසින් තම ඉහළම ගනුදෙනුකරුවන්ට ලබාදෙන සාමාන්‍ය බරිත ප්‍රමුඛ පෙළේ ණය පොලී අනුපාතිකය (AWPR) පදනම් ලක්ෂ්‍ය 9 කින් ඉහළ ගොස් 10.76% ක් ලෙස වාර්තා විය. එසේම, වසරේ මේ දක්වා කාලය තුළ ඇමරිකානු ඩොලරයට සාපේක්ෂව ශ්‍රී ලංකා රුපියල 7.6% ක අවප්‍රමාණය වීමක් ද පෙන්වයි.
මෙම සමස්ත ආර්ථික ප්‍රගතිය හමුවේ මෙරට කොටස් වෙළඳපොළ ද ධනාත්මක ප්‍රතිචාර දක්වා ඇති අතර, අගෝස්තු 07 වනදා වන විට සමස්ත කොටස් මිල දර්ශකය (ASPI) 1.14% කින් ඉහළ ගොස් ඒකක 21,370.09 ක් ලෙස සටහන් වී තිබේ.
(සටහන | ජේ.මුණසිංහ)
