රාජ්‍ය සේවයේ පුනරාවර්තන වියදම් සීමා කරමින් යටිතල පහසුකම් සහ ඩිජිටල්කරණයට ප්‍රමුඛතාව
නව රාජ්‍ය මූල්‍ය උපායමාර්ගය සහ නීතිමය පදනම
අර්බුදයෙන් පසු ආර්ථිකය ස්ථාවර කිරීමේ අදියරෙන් ඔබ්බට යමින්, වර්ධනය මූලික කරගත් සංවර්ධන මාර්ගයකට අවතීර්ණ වීම සඳහා ශ්‍රී ලංකාවේ රාජ්‍ය ආයෝජන කළමනාකරණ (PIM) රාමුවේ පුළුල් වෙනසක් සිදුකිරීමට 2027 අයවැය යෝජනා හරහා පියවර ගනිමින් සිටී. වඩාත් විනිවිදභාවයෙන් යුතු සහ නීති රීති පදනම් කරගත් දිගුකාලීන ප්‍රාග්ධන සම්පත් වෙන්කිරීමක් වෙනුවෙන් අලුතින් බලාත්මක කරන ලද රාජ්‍ය මූල්‍ය කළමනාකරණ (PFM) පනත දැඩි ලෙස ක්‍රියාත්මක කිරීමට මෙහිදී පියවර ගෙන ඇත.
මෙම නව මූල්‍ය උපායමාර්ගය යටතේ 2027 අයවැයෙන් ප්‍රාග්ධන වියදම් සඳහා පමණක් රුපියල් ට්‍රිලියන 2 ක මුදලක් වෙන් කිරීමට රජය සැලසුම් කර ඇති අතර, මෙය මෑත ඉතිහාසයේ රාජ්‍ය ආයෝජන වෙනුවෙන් වෙන්කෙරුණු විශාලතම මුදලක් ලෙස සැලකේ.
ජාත්‍යන්තර මූල්‍ය අරමුදලේ ඇගයීම සහ PIP 2026–2030 රාමුව
ජාතික ක්‍රමසම්පාදන දෙපාර්තමේන්තුව විසින් මධ්‍යකාලීන සම්පත් වෙන්කිරීම සහ ව්‍යාපෘති ක්‍රියාත්මක කිරීමේ කාර්යක්ෂමතාව ඉහළ නැංවීම සඳහා "රාජ්‍ය ආයෝජන ව්‍යාපෘති (PIP) 2026–2030" රාමුව දැනටමත් නිල වශයෙන් සක්‍රිය කර ඇති බව මුදල් අමාත්‍යාංශයේ ජ්‍යෙෂ්ඨ නිලධාරියෙකු ප්‍රකාශ කළේය.
"ඵලදායී නැවත ගොඩනැගීම සඳහා මෙන්ම රාජ්‍ය ආයෝජනවල ගුණාත්මකභාවය සහ කාර්යක්ෂමතාව ඉහළ නැංවීම සඳහා රාජ්‍ය ආයෝජන කළමනාකරණ ප්‍රතිසංස්කරණ අත්‍යවශ්‍ය වේ," යැයි ජාත්‍යන්තර මූල්‍ය අරමුදල (IMF) සිය නවතම වාර්තාව මගින් පෙන්වා දී තිබේ. ප්‍රාග්ධන වියදම් නියමිත පරිදි නොකිරීම පිළිබඳ පවතින ගැටලුවලට විසඳුම් ලෙස සම්මත ව්‍යාපෘති ඇගයීම් ක්‍රමවේදයක් සහ රාජ්‍ය ආයෝජන කමිටුව සඳහා විනිවිද පෙනෙන ව්‍යාපෘති තේරීමේ නිර්ණායක හඳුන්වා දීමට නියමිතය.
සාර්ව මූල්‍ය රාමුව සහ ආදායම් ඉලක්ක
නව සාර්ව මූල්‍ය රාමුවට අනුව, රාජ්‍යයේ ප්‍රාථමික වියදම් සීමාව රුපියල් ට්‍රිලියන 5.064 ක් ලෙස නියම කර ඇති අතර, එයින් සියයට 40 කට ආසන්න ප්‍රමාණයක් (රුපියල් ට්‍රිලියන 2 ක්) රාජ්‍ය ආයෝජන සහ උපායමාර්ගික ජාතික යටිතල පහසුකම් වෙනුවෙන් වෙන්කර ඇත. ඉතිරි කොටස පුනරාවර්තන වියදම් සඳහා වෙන්වන අතර, රාජ්‍ය පරිපාලන පිරිවැය දේපොළ දළ දේශීය නිෂ්පාදිතයෙන් (GDP) සියයට 9 ක මට්ටමේ පවත්වා ගැනීමට අපේක්ෂිතය.
2027 රාජ්‍ය මූල්‍ය උපායමාර්ගික ප්‍රකාශනයට (FSS) අනුව, සමස්ත රාජ්‍ය ආදායම සහ ප්‍රදාන රුපියල් ට්‍රිලියන 4.99 ක් (දළ දේශීය නිෂ්පාදිතයෙන් සියයට 15.5 ක්) ලෙසත්, සමස්ත වියදම රුපියල් ට්‍රිලියන 7.19 ක් ලෙසත් ඇස්තමේන්තු කර තිබේ. මෙහි ප්‍රතිඵලයක් ලෙස රුපියල් ට්‍රිලියන 2.2 ක් වන අයවැය පරතරය දළ දේශීය නිෂ්පාදිතයෙන් සියයට 4.5 දක්වා පහත වැටෙනු ඇතැයි පුරෝකථනය කෙරේ.
දේශීය ආදායම් දෙපාර්තමේන්තුව සහ ශ්‍රී ලංකා රේගුව තුළ ස්ථාපිත කෙරෙන ඩිජිටල් නිරීක්ෂණ පද්ධති මගින් බදු එකතු කිරීම් වසරින් වසර සියයට 30.6 කින් වර්ධනය වනු ඇතැයි අපේක්ෂා කෙරේ. 2025 වසරේ වාහන ආනයන බදු මගින් ලබන තාවකාලික ආදායම් පියවා ගනිමින්, 2027 සිට ඉදිරියට දළ දේශීය නිෂ්පාදිතයෙන් සියයට 15 ක මට්ටමක රාජ්‍ය ආදායම පවත්වා ගැනීම රජයේ ඉලක්කයයි.
ඩිජිටල්කරණය, කෘෂිකර්මය සහ අපනයන ක්ෂේත්‍රයේ නව පිම්ම
පරිපාලන ක්‍රියාවලීන් ස්වයංක්‍රීය කිරීම, වංචා දූෂණ අවම කිරීම සහ මහජන සේවාවන් සඳහා පවතින ප්‍රවේශය පුළුල් කිරීම වෙනුවෙන් පුළුල් රාජ්‍ය ඩිජිටල්කරණ වැඩසටහනක් ද අයවැය මගින් ක්‍රියාත්මක කෙරේ.
කෘෂිකාර්මික ක්ෂේත්‍රයේ දී, සාම්ප්‍රදායික සහනාධාර ක්‍රමවේදයන් වෙනුවට සුක්ෂ්ම කෘෂිකර්මාන්තය (Precision farming), බිංදු සම්පේචන පද්ධති සහ ශීතාගාර පහසුකම් යටිතල පහසුකම් සඳහා රාජ්‍ය ප්‍රාග්ධන සම-ආයෝජන හඳුන්වා දීමට සැලසුම් කර ඇත. මීට අමතරව, තේ සහ ඇඟලුම් ක්ෂේත්‍රවල අපනයන තරඟකාරීත්වය ඉහළ නැංවීම සඳහා පර්යේෂණ හා සංවර්ධන බදු සහන, ස්වයංක්‍රීයකරණ ආයෝජන සඳහා වේගවත් ක්ෂයවීම් සහන සහ හරිත නිෂ්පාදන සඳහා දිරිගැන්වීම් ලබාදෙනු ඇත.
රාජ්‍ය අංශයේ විශේෂඥ දැනුමැති තාක්ෂණික නිලධාරීන්ගේ විශ්‍රාම යෑමේ වයස දීර්ඝ කිරීම මගින් බුද්ධි ගලනය වැළැක්වීමට සහ මහා පරිමාණ සංවර්ධන ව්‍යාපෘති අඛණ්ඩව ක්‍රියාත්මක කිරීමේ පද්ධතිමය ධාරිතාව ආරක්ෂා කරගැනීමට ද මෙම ප්‍රතිසංස්කරණ මගින් අවධානය යොමු කර තිබේ.
(සටහන | සම්පත් ධීරසේකර )
මුලාශ්‍රය :
Budget 2027 Drives Sweeping Public Investment Management Overhaul
