ප්‍රතිපත්තිමය යටිතල පහසුකම් සකසද්දී ක්ෂේත්‍රයේ ප්‍රමුඛතා හඳුනාගෙන ජාත්‍යන්තරය දිනාගැනීමට උපක්‍රමික ප්‍රවේශයක්
ආකෘතික පරිවර්තනය සහ AI තාක්ෂණයේ බලපෑම
2030 වසර වන විට ඇමෙරිකානු ඩොලර් බිලියන 5ක ඩිජිටල් අපනයන ආදායමක් ළඟා කර ගැනීමේ ශ්‍රී ලංකාවේ ඉලක්කයට ආර්ථික අස්ථාවරත්වයටත් වඩා ප්‍රබල අභියෝගයක් ලෙස කෘත්‍රිම බුද්ධිය (AI) මතුවෙමින් පවතින බව රජයේ සහ ක්ෂේත්‍රයේ නියෝජිතයෝ පෙන්වා දෙති.
ඩිජිටල් ආර්ථික පිළිබඳ නියෝජ්‍ය අමාත්‍ය ඉංජිනේරු එරංග වීරරත්න සඳහන් කරන්නේ, AI තාක්ෂණයේ සීඝ්‍ර වර්ධනය හේතුවෙන් මෘදුකාංග ඉංජිනේරුවන්ගේ පැය ගණන මත පදනම්ව ආදායම් ලබන (Outsourcing coding hours) ශ්‍රී ලංකාවේ සාම්ප්‍රදායික ව්‍යාපාරික ආකෘතිය (Business Model) පවත්වාගෙන යාම තවදුරටත් ප්‍රායෝගික නොවන බවයි.
කොළඹදී පැවැති "The Road to US$ 5 Billion" ජාතික මාර්ග සිතියම් ඇගයීම් වැඩමුළුවේදී අදහස් දැක්වූ නියෝජ්‍ය අමාත්‍යවරයා, AI මෙවලම් මගින් සංවර්ධකයන්ගේ කාර්යක්ෂමතාව ඉහළ නැංවීම නිසා කෙටි කාලයකින් සහ අඩු ශ්‍රමයකින් ව්‍යාපෘති අවසන් කිරීමට ගෝලීය සමාගම්වලට හැකියාව ලැබී ඇති බව පෙන්වා දුන්නේය. ඒ අනුව පැය ගණනට සේවය අලෙවි කිරීමෙන් ඔබ්බට ගොස් තමන්ගේම මෘදුකාංග නිෂ්පාදන, බුද්ධිමය දේපළ (Intellectual Property) සහ සුවිශේෂී විශේෂඥ දැනුම පදනම් කරගත් විසඳුම් (Specialised Knowledge-based Solutions) ගෝලීය වෙළඳපොළට හඳුන්වා දීමට පියවර ගත යුතුව ඇත.
විශේෂඥ ක්ෂේත්‍ර කෙරෙහි අවධානය යොමු කිරීමේ අවශ්‍යතාව
ශ්‍රී ලංකාව සියලුම තාක්ෂණික ක්ෂේත්‍රයන් හි තරග කිරීමට උත්සාහ කිරීම වෙනුවට ජාත්‍යන්තරව පිළිගත් විශේෂඥතාවක් සහිත නිශ්චිත ක්ෂේත්‍ර 2ක් හෝ 3ක් කෙරෙහි අවධානය යොමු කිරීම වඩාත් ඵලදායී වන බව පර්යේෂණ සහ ප්‍රතිපත්ති විශ්ලේෂණ පෙන්වා දෙයි.
"සැබෑ හැකියාවකින් තොරව සිදුකරන සන්නාමකරණය හුදෙක් ශබ්දයක් පමණයි," යනුවෙන් ප්‍රකාශ කළ නියෝජ්‍ය අමාත්‍යවරයා, 2016 වසරේ සිට පැමිණි විවිධ පාලනයන් යටතේ ඩොලර් බිලියන 5 ඉලක්කය සාක්ෂාත් කර ගැනීමට අපොහොසත් වූයේ නිසි වගවීමක්, මැනිය හැකි ක්‍රියාත්මක කිරීමේ ක්‍රමවේදයක් සහ එකඟතාවක් නොතිබූ බැවින් බව පිළිගත්තේය. එම නිසා බදු, අවදානම් ප්‍රාග්ධනය, ප්‍රාග්ධන සංචලනය සහ රාජ්‍ය ප්‍රසම්පාදන අංශවල නව ප්‍රතිසංස්කරණ හඳුන්වා දෙන අතරම, සැබෑ තාක්ෂණික ප්‍රතිඵල ලබාදීමට පෞද්ගලික අංශයද පෙරමුණ ගත යුතු වේ.
විලෝපිකයන්ගෙන් මිදී වර්ධනය කරා යන ගමන
මෙම අවස්ථාවට එක්වූ ජනාධිපති ඩිජිටල් ආර්ථික පිළිබඳ ප්‍රධාන උපදේශක සහ GovTech ශ්‍රී ලංකා සභාපති ආචාර්ය හාන්ස් විජයසූරිය පෙන්වා දුන්නේ පාස්කු ප්‍රහාරය, කොවිඩ්-19 වසංගතය, ආර්ථික අර්බුදය සහ ගෝලීය දේශපාලනික කැළඹීම් හමුවේ ශ්‍රී ලංකාවේ තොරතුරු තාක්ෂණ ක්ෂේත්‍රය යථා තත්ත්වයට පත්වීමේ ඔරොත්තු දීමේ හැකියාව (Resilience) පෙන්වා දී ඇති බවයි.
කෙසේ වෙතත්, හුදෙක් ඔරොත්තු දීම සහ පැවැත්ම තහවුරු කරගැනීම මත පමණක් සෑහීමකට පත් නොවී, සීඝ්‍ර වර්ධනයක් කරා යා යුතු බව ඔහු අවධාරණය කළේය. ගෝලීය මෘදුකාංග වෙළඳපොළ AI තාක්ෂණය මගින් නැවත අර්ථගන්වන මෙම වකවානුවේදී, සාම්ප්‍රදායික කේතකරණ සේවා සැපයීමේ සිට නවෝත්පාදන අපනයනය දක්වා මාරු වීමට ශ්‍රී ලංකාවට හිමිව ඇත්තේ සීමිත කාලයක් බව ක්ෂේත්‍රයේ විශේෂඥයෝ වැඩිදුරටත් පෙන්වා දෙති.
(සටහන | සම්පත් ධීරසේකර )
මුලාශ්‍රය :
AI Revolution Threatens Sri Lanka’s Software Export Growth Model
