ආර්ථික අර්බුදය සහ ජනතා පීඩනය නොසලකා අධිකරණ බලපෑම් වලට මුල්තැන දෙන බවට පාර්ලිමේන්තුවේදී චෝදනා
විනිශ්චයකාරවරුන්ගේ විශ්‍රාම ගැන්වීමේ වයස් සීමාව දීර්ඝ කිරීම සහ යෝජිත 22 වන ආණ්ඩුක්‍රම ව්‍යවස්ථා සංශෝධනය මුල් කරගනිමින් මේ වන විට දේශපාලන හා නීති ක්ෂේත්‍රය තුළ දැඩි සංවාදයක් නිර්මාණය වී තිබේ. අද දින පාර්ලිමේන්තුව අමතමින් ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ආණ්ඩුවේ මෙම ක්‍රියාමාර්ගය දැඩි ප්‍රශ්න කිරීමට ලක් කළේය.
මහා නායක හිමිවරුන් සහ නීතිඥ සංගම් මතය
යෝජිත සංශෝධනයට එරෙහි වන පිරිස් 'හොරුන්' හෝ 'ගැටලු ඇති පුද්ගලයන්' ලෙස ඇතැම් මැති ඇමතිවරුන් හඳුන්වන බව පෙන්වා දුන් මන්ත්‍රීවරයා, ඊට විරෝධය පළ කරන මහා නායක හිමිවරුන්, ශ්‍රී ලංකා නීතිඥ සංගමය මෙන්ම ජාත්‍යන්තර හා කලාපීය නීතිඥ සංවිධානද ඒ ගණයට අයත් වන්නේ දැයි ප්‍රශ්න කළේය.
"මේ විනිශ්චයකාරවරුන්ගේ කාලය දීර්ඝ කිරීමට විරුද්ධ වෙන්නේ හොරු කියලා ඇතැම් මැති ඇමතිවරු කියනවා. එතකොට මහා නායක හාමුදුරුවොත් හොරුද? මේ රටේ නීතිඥ සංගමය, එක්සත් ජාතීන්ගේ සංවිධානය, පොදුරාජ්‍ය මණ්ඩලීය නීතිඥ සංගමය, ආසියාතික නීතිඥ සංගමය ඒ හැමෝමත් හොරුද? ආණ්ඩුව නියෝජනය කරන පාර්ශ්වවල නීතිඥවරුනුත් මීට එරෙහිව අදහස් දක්වද්දී ආණ්ඩුවේ ස්ථාවරය කුමක්ද?" යනුවෙන් නාමල් රාජපක්ෂ සභාවේදී විමසා සිටියේය.
විගණකාධිපති ධුරය පත් කිරීම සම්බන්ධයෙන් මහා නායක හිමිවරුන් කළ ඉල්ලීම් පවා නිසි පැහැදිලි කිරීමකින් තොරව බැහැර කර ඇති පසුබිමක, අධිකරණ පද්ධතිය සම්බන්ධයෙන් ගන්නා තීන්දු පිළිබඳවද සමාජය තුළ සැක සංකා මතුව ඇති බව ඔහු අවධාරණය කළේය.
ජනතා ප්‍රශ්න සහ නීතියේ ආධිපත්‍යය
රට තුළ උග්‍ර රැකියා හිඟයක්, කර්මාන්ත ශාලා වැසී යාමක්, ගොවි-ධීවර ගැටලු සහ රෝහල්වල පිළිකා ඖෂධ ඇතුළු අත්‍යවශ්‍ය බෙහෙත් හිඟයක් පවතින මොහොතක ආණ්ඩුව ප්‍රමුඛතාව ලබා දිය යුත්තේ ජනතා ගැටලු විසඳීමට බව මන්ත්‍රීවරයා පෙන්වා දුන්නේය.
| වරාය හරහා බහාලුම් මුදාහැරීම හා සම්බන්ධ සිදුවීම් සහ මූල්‍ය අක්‍රමිකතා පිළිබඳ පරීක්ෂණ.
| ප්‍රධාන නඩු විභාගයන් ආසන්නයේ තිබියදී අධිකරණ පද්ධතියේ ඉහළ ස්ථරයන්හි වෙනස්කම් සිදුකිරීමේ පසුබිම.
| විපක්ෂ මන්ත්‍රීවරුන් පාර්ලිමේන්තුවේදී මතු කරන මහජන ගැටලු හැන්සාඩ් වාර්තාවෙන් ඉවත් කිරීම වෙනුවට තේරීම් කාරක සභා පත් කර විමර්ශනය කිරීමේ අවශ්‍යතාව.
විශේෂයෙන් පාර්ලිමේන්තු මන්ත්‍රීනී රෝහිණී කවිරත්න මතු කරන කරුණු සම්බන්ධයෙන් පාර්ලිමේන්තු තේරීම් කාරක සභාවක් පත් කර සාධාරණ සොයා බැලීමක් සිදු කළ යුතු බවද ඔහු යෝජනා කළේය. ව්‍යවස්ථා සංශෝධන හරහා සැබෑ ආර්ථික හා සමාජීය අර්බුද යටපත් නොකර, මැතිවරණ කල් දැමීමකින් තොරව ජනතා පරමාධිපත්‍යයට ඉඩ ලබා දිය යුතු බව විපක්ෂය වෙනුවෙන් අදහස් දක්වමින් නාමල් රාජපක්ෂ වැඩිදුරටත් කියා සිටියේය.
