*“අපේ පරමාධිපත්‍යය ආරක්ෂා කරමු!” සංවිධානයෙන් පුරවැසි ප්‍රජාවට විවෘත ආරාධනයක්
ජාතික ජන බලවේග රජය විසින් පාර්ලිමේන්තුවට ඉදිරිපත් කර තිබෙන 22 වන ආණ්ඩුක්‍රම ව්‍යවස්ථා සංශෝධනය, අධිකරණයේ ස්වාධීනත්වය සහ ජනතා පරමාධිපත්‍යය කෙරෙහි එල්ල කරන බලපෑම පිළිබඳ ගැඹුරු සංවාදයක් ගොඩනැගීමේ අරමුණින් විශේෂ මහජන සභාවක් කොළඹදී පැවැත්වීමට කටයුතු යොදා තිබේ.
“අපේ පරමාධිපත්‍යය ආරක්ෂා කරමු!” (Save our Sovereignty – SOS) ස්වාධීන ජනතා ව්‍යාපාරය විසින් සංවිධානය කරනු ලබන මෙම මහජන සභාව “22 වන සංශෝධනය එන්නේ උසාවිය හීලෑ කරගන්නද?” යන තේමාව යටතේ දෙවන වරටත් පැවැත්වේ.
මෙම සම්මන්ත්‍රණය අගෝස්තු 21 වන සිකුරාදා පස්වරු 3.30 ට කොළඹ 07, ශ්‍රීමත් අනගාරික ධර්මපාල මාවතේ (අංක 62) පිහිටි 'කැප්රි ක්ලබ්' (Capri Club) සම්මන්ත්‍රණ ශාලාවේදී ආරම්භ වීමට නියමිතය.
නීති ක්ෂේත්‍රයේ ප්‍රවීණයන්ගේ සහභාගිත්වය
ව්‍යවස්ථා සංශෝධනය පිළිබඳ විවිධ පැතිකඩ ඔස්සේ කරුණු පැහැදිලි කිරීම සඳහා මෙරට ප්‍රමුඛ පෙළේ නීතිවේදීන් සහ විද්වතුන් පිරිසක් සම්පත් දායකත්වය සපයති:
* ජනාධිපති නීතිඥ සාලිය පීරිස් (ශ්‍රී ලංකා නීතිඥ සංගමයේ හිටපු සභාපති)
* ආචාර්ය නීතිඥ කුමාරවඩිවේල් ගුරුපරන් (යාපනය විශ්වවිද්‍යාලයේ නීති අංශයේ හිටපු අංශාධිපති)
* නීතිඥ නුවන් බෝපගේ
* සමස්ත සංවාදය මෙහෙයවීම ප්‍රවීණ නීතිඥ සුදර්ශන ගුණවර්ධන විසින් සිදු කරනු ලබයි.
සංවාදයට පසුබිම් වූ කරුණු සහ ප්‍රජාතන්ත්‍රවාදී අවකාශය
ශ්‍රී ලංකාවේ ආණ්ඩුක්‍රම ව්‍යවස්ථාවට ගෙන එනු ලබන ඕනෑම සංශෝධනයක් රටේ මූලික නීතිය, බලතල බෙදීමේ න්‍යාය සහ අධිකරණයේ ස්වාධීනත්වය කෙරෙහි සෘජුවම බලපාන සාධකයකි. විධායකය, ව්‍යවස්ථාදායකය සහ අධිකරණය අතර පවතින තුලනය ප්‍රජාතන්ත්‍රවාදී පාලන තන්ත්‍රයක මූලික පදනම ලෙස සැලකේ.
රජය විසින් ඉදිරිපත් කිරීමට යන නව සංශෝධන ක්‍රියාවලියේ අරමුණු, එහි ඇතුළත් වගන්තිවල ප්‍රායෝගික හා නෛතික අර්ථකථන සහ එමගින් පුරවැසි අයිතිවාසිකම්වලට සිදුවිය හැකි බලපෑම් පිළිබඳව මහජනතාව දැනුවත් කිරීමේ අරමුණින් මෙම කතිකාව සංවිධානය කර ඇතැයි සංවිධායක මණ්ඩලය පවසයි.
මහජන සහභාගිත්වය සඳහා විවෘතයි
නීති වෘත්තිකයන්, විශ්වවිද්‍යාල ආචාර්ය-මහාචාර්යවරුන්, සිවිල් ක්‍රියාකාරීන් මෙන්ම ප්‍රජාතන්ත්‍රවාදය සහ නීතියේ ආධිපත්‍යය කෙරෙහි උනන්දුවක් දක්වන සමස්ත පුරවැසි ප්‍රජාවටම මෙම මහජන සභාව විවෘතව පවතී.
ශාලාවේ ආසන පහසුකම් සීමිත බැවින් පළමුව පැමිණෙන අනුපිළිවෙල අනුව අසුන් පැනවීම සිදු කෙරෙන අතර, කොල්ලුපිටිය ලිබර්ටි වටරවුමේ සිට පුරහල දෙසට ගමන් කරන විට දකුණු පසින් කැප්රි ක්ලබ් පරිශ්‍රය පිහිටා ඇත.
