ඉදිරිපත් කර ඇති නිර්දේශ ක්‍රියාවේ යොදවන ලෙස දේශීය සහ ජාත්‍යන්තර මානව හිමිකම් සංවිධාන එකතුවක් ආණ්ඩුවට යෝජනා කරයි..
බරපතල මානව හිමිකම් උල්ලංඝනය කිරීම් විමර්ශනය කිරීම සඳහා පිහිටුවා ඇති රජයේ කොමිෂන් සභා සංඛ්‍යාව ශ්‍රී ලාංකිකයන්ට ගණන් කළ හැකි වින්දිතයින් සංඛ්‍යාව ඉක්මවා ඇති බව පවසන මානව හිමිකම් හා සංවර්ධනය සඳහා වන මධ්‍යස්ථානය (CHRD), අතුරුදහන් පවුල් එකමුතුව (FOD) කාන්තා ක්‍රියාකාරී ජාලය (WAN) සහ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) මින් පෙර ප්‍රකාශයට පත් නොකළ වාර්තා සහ පසුගිය වාර්තා සියල්ල ජනාධිපති වෙබ් අඩවියේ පළ කරන ලෙස ශ්‍රී ලංකා රජයෙන් ඉල්ලා සිටී.
“සත්‍යය, සමගිය සහ ප්‍රතිසන්ධානය සඳහා වූ කොමිෂන් සභාව (CTUR) නමින් හැඳින්වෙන නව කොමිෂන් සභාව, සත්‍යය සෙවීම සඳහා ශ්‍රී ලංකා රජය විසින් අවම වශයෙන් පිහිටුවා ඇති කොමිෂන් සභා 36 ක් අතරට එක් වේ. කෙසේ වෙතත්, වින්දිතයින් පවසන්නේ යුක්තිය සහ වගවීම තවදුරටත් තමන් මගහැර ගොස් ඇති බවයි. අතුරුදන්වූවන්ගේ පවුල්වල සාමාජිකයන් පියවර ගන්නා ලෙස ඉල්ලා වීදියේ අභීත අරගල අරඹා අදට වසර අටක් ගතවී ඇත. වයෝවෘද්ධ ඥාතීන් 240 කට වැඩි පිරිසක් තම ආදරණීයයන්ට සිදුවූයේ කුමක්දැයි නොදැන මිය ගොස් ඇත,” යි සංවිධාන හතර නිවේදනයක් නිකුත් කරමින් පවසයි.
රජය විසින් යෝජනා කර ඇති නව කරුණු සෙවීමේ කොමිසම ප්‍රතික්ෂේප කරමින් සිවිල් සමාජ සංවිධාන 37ක් සහ ක්‍රියාකාරීන් 19ක් දැනටමත් වෙන වෙනම ප්‍රකාශ නිකුත් කර ඇති බව එම නිවේදනය සිහිපත් කර දෙයි.
“අතීත යාන්ත්‍රණවල අසාර්ථක අසාර්ථකත්වය, ලේඛන ප්‍රසිද්ධ නොකිරීම, නව රාමුව සඳහා ප්‍රමාණවත් අධිකාරියක් නොමැතිකම, ජාත්‍යන්තර නියෝජිතයින්ගේ මැදිහත්වීම නොමැතිකම, සුදුසු අධිකරණ යාන්ත්‍රණයක් නොමැතිකම සහ පසුගිය කොමිෂන් සභාවල දිගුකාලීන නිර්දේශ ක්‍රියාත්මක නොකිරීම” ඊට හේතු වශයෙන් ඔවුන් විසින් පෙන්වා දී ඇති බව සංවිධාන හතර ප්‍රකාශ කරයි.
පසුගිය කාලය තුළ ශ්‍රී ලංකා රජය විසින් පිහිටුවන ලද බවට එම සංවිධාන විසින් හඳුනාගෙන ඇති කොමිෂන් සභා 36 ක ලැයිස්තුවක් නිවේදනය සමග ප්‍රකාශයට පත් කර තිබේ.
කොමිෂන් සභා 36 ක ලැයිස්තුව මෙතනින්
“කම්පනයට කරුණ නම්, මෙම කොමිෂන් සභා තුනෙන් එකක, එනම් 14 ක වාර්තා කිසිදා ප්‍රකාශයට පත් කර නොතිබීමයි. බොහෝ ලිපි ලේඛන ඩිජිටල් කර ඇතත් රජයේ වෙබ් අඩවියට ඇතුළත් කර ඇත්තේ අල්පයක් පමණි. ඇත්ත වශයෙන්ම, පසුගිය කොමිෂන් සභා මගින්; ප්‍රකාශිත වාර්තා 22 න් අපට සොයා ගත හැකි වූයේ වාර්තා 11 ක පිටපත් පමණි.”
එසේම පසුගිය කාලයේ පැවති විමර්ශනවල රටාව වූයේ සිදුවූයේ කුමක්ද යන්න තහවුරු කර ගැනීමට මිස කිසිවකුත් අපරාධ සම්බන්ධයෙන් වගකිවයුත්තන් බවට පත් කිරීමට නොවන නිසා එම පුද්ගලයන් නැවත නැවතත් බරපතළ අපරාධ සිදු කළ බවට සංවිධාන හතරේ නිවේදනය දැඩි ලෙස චෝදනා කරයි.
“මෙය ශ්‍රී ලංකා ජනාධිපතිවරයා විසින් මෑතකදී යෝජනා කරන ලද වගවීමට මුලපිරීම සම්බන්ධයෙන් බරපතල කනස්සල්ලක් ඇති කරයි. සත්‍යයේ මුල් පියවර වන්නේ පසුගිය කොමිෂන් සභා වාර්තා ජනාධිපතිවරයාගේ වෙබ් අඩවියට ඇතුළත් කර ඒවායේ අන්තර්ගතය අනුමත කිරීමයි. සත්‍යයේ නාමයෙන් කළ යුතුව ඇත්තේ, බටලන්ද වධ කඳවුරේ වධ බන්ධනවලට ලක් කර රඳවා තබා ගැනීම රනිල් වික්‍රමසිංහගේ දැනුවත් කමින් තොරව කළ නොහැක්කක් බව සඳහන් බටලන්ද කොමිෂන් සභා වාර්තාව වැනි ජනාධිපතිවරයාගේ නමින් සඳහන් කෙරෙන වාර්තා ඊට ඇතුලත් කිරීමයි.”
