ජෙනරාල් ලසන්ත රොද්‍රිගෝ විශ්‍රාම යාමත් සමඟ කාලතුවක්කු රෙජිමේන්තුවේ ජ්‍යෙෂ්ඨ නිලධාරියෙකු යුද හමුදා ඉහළම ධුරයට
නව යුද හමුදාපති පත්වීම සහ නිල උසස්වීම
ශ්‍රී ලංකා යුද හමුදාවේ 26 වන යුද හමුදාපතිවරයා ලෙස යුද හමුදා මාණ්ඩලික ප්‍රධානී ලෙස කටයුතු කළ මේජර් ජෙනරාල් කේ.වී.එන්.පී. (නිලන්ත) ප්‍රේමරත්න පත්කර තිබේ. සේනාධිනායක, ජනාධිපති අනුර කුමාර දිසානායක ගේ නිර්දේශය මත සිදුකෙරුණු මෙම පත්වීමට අදාළව, ඔහුව ලුතිනන් ජෙනරාල් නිලයට උසස් කර ඇත.
අගෝස්තු මස 01 වනදා සිට බලපැවැත්වෙන පරිදි සිදුකර ඇති මෙම පත්වීමට අදාළ ලිපිය ජනාධිපති ලේකම් ආචාර්ය නන්දික සනත් කුමානායක විසින් ජනාධිපති ලේකම් කාර්යාලයේදී භාරදෙන ලදී. ශ්‍රී ලංකා යුද හමුදාවේ 25 වන හමුදාපතිවරයා ලෙස සේවය කළ ජෙනරාල් ලසන්ත රොද්‍රිගෝ සිය ධුර කාලය අවසන් කරමින් විශ්‍රාම යෑමත් සමඟ මෙම නව පත්කිරීම සිදුකර තිබේ.
වසර 36ක හමුදා සේවා දිවිය සහ අධ්‍යාපනික පසුබිම
මාතර ශාන්ත සර්වේශස් විද්‍යාලයේ ආදි ශිෂ්‍යයෙකු වන ලුතිනන් ජෙනරාල් නිලන්ත ප්‍රේමරත්න, 1990 වසරේදී පාඨමාලා අංක 34 යටතේ ආධුනික කැඩෙට් නිලධාරියෙකු ලෙස ශ්‍රී ලංකා යුද හමුදාවට එක්විය. 1992 දී දියතලාව ශ්‍රී ලංකා යුද හමුදා විද්‍යාපීඨයෙන් මූලික යුද පුහුණුව අවසන් කර දෙවන ලුතිනන්වරයෙකු ලෙස අධිකාරියට පත් වූ ඔහු, පසුව ශ්‍රී ලංකා කාලතුවක්කු රෙජිමේන්තුවට අනුයුක්ත කෙරිණි.
හමුදා සේවා කාලය තුළ යුද හමුදා මාධ්‍ය ප්‍රකාශක ඇතුළු ජ්‍යෙෂ්ඨ තනතුරු රැසක් හොබවා ඇති නිලන්ත ප්‍රේමරත්න, ඇමෙරිකානු එක්සත් ජනපදයේ කැලිෆෝනියා හි නාවික පශ්චාත් උපාධි පාසලෙන් සහ කැලණිය විශ්වවිද්‍යාලයෙන් ආරක්ෂක අධ්‍යයනය පිළිබඳ ශාස්ත්‍රපති උපාධි (M.Def.S) ලබාගත් විද්වතෙකි.
දේශීය හා ජාත්‍යන්තර ඇගයීම්
වසර 36කට අධික සිය විශිෂ්ට හමුදා සේවා දිවිය තුළ දෙස් විදෙස් පාඨමාලා රැසක් හදාරා ඇති ලුතිනන් ජෙනරාල් ප්‍රේමරත්න, උතුරේ මෙහෙයුම් සමයේ දැක්වූ නිර්භීතභාවය වෙනුවෙන් 'රණශූර පදක්කම' දෙවරක්ම දිනා ගැනීමට සමත් විය.
ඊට අමතරව, යුද හමුදා දිවිය තුළ දැක්වූ විශිෂ්ට සේවය සහ චරිතවත්භාවය අගයමින් ඔහු වෙත 'උත්තම සේවා පදක්කම' (USP) ඇතුළු පදක්කම් සහ සම්මාන ගණනාවක් හිමිව තිබේ.
