ජාතික ජන බලවේගය සමග විශ්‍රාමික ත්‍රිවිධ හමුදා සාමූහිකයේ ‘අදිටන සාමූහිකය’ තුළ දිවයින පුරා හතළිස් දාහක් පමණ ක්‍රියාකාරීව වැඩ කරන බව අදිටන
ත්‍රිවිධ හමුදා සාමූහිකයේ ප්‍රධානි විශ්‍රාමික මේජර් ජනරාල් අරුණ ජයසේකර පැවසී ය.
හෙතෙම එලෙස පැවසුවේ ඊයේ (02) පැවති ජාතික ජන බලවේගයේ විශ්‍රාමික ත්‍රිවිධ හමුදා සාමූහිකයේ මාධ්‍ය හමුව අමතමිනි.
එහි දී වැඩි දුරටත් තරුණු දැක්වූ විශ්‍රාමික මේජර් ජනරාල් අරුණ ජයසේකර...
අනෙකුත් පක්ෂ සහ රජය නොසිතූ කම්පනයකට ලක්වෙලා
අපේ හමුදා සාමාජිකයින් යුද, නාවික, ගුවන් හමුදාවල සාමාජිකයන් ලෙස දීර්ඝ කාලයක් රාජකාරි කර, උසස් නිපුණත්වයක් ලබා හැකියාවන් වර්ධනය කරගෙන සමාජයේ හොඳ පුරවැසියන් ලෙස ජීවත් වෙනවා. ජාතික ජන බලවේගය සමග විශ්‍රාමික ත්‍රිවිධ හමුදා සාමූහිකයේ අදිටන සාමූහිකය තුළ දිවයින පුරා හතළිස් දාහක් පමණ ක්‍රියාකාරීව වැඩ කරනවා. මේ රට වෙනුවෙන් විනයගරුකව වගකීම් සාර්ථකව ඉටුකර විශ්‍රාමිකව සිටින අතර, මේ රටට අත්වී තිබෙන ඛේදනීය තත්ත්වය අපට පැහැදිලිව දැක ගන්න ලැබුණා. මේ තත්වයෙන් ගොඩ එන්න අපෙන් සිදුකළ යුතු කාර්ය භාරය ඉටුකිරීම වෙනුවෙන් සොයා බලන විට ජාතික ජන බලවේගය ඉදිරියට එන ආකාරය අපි දැක්කා. ඔවුන් සමග දීර්ඝ ලෙස සාකච්ඡා කර, අපගේ දෙවන මෙහෙවර ලෙස දෙදහස විසි එක අවසානයේ දී ඉතාමත් සැලසුම් සහගතව අදිටන සාමූහිකය නිර්මාණය කළා.
ගෙවී ගිය වසර දෙකක කාලය තුළ එතෙර සිටින අපේ විශ්‍රාමිකයන් පවා විශේෂ කැපකිරීම් කළා. අප අත්පත් කරගෙන තිබෙන වෘත්තිමය දැනුම හා හැකියාව රට ගොඩනැගීම වෙනුවෙන් ජාතික ජන බලවේගය සමග එක්වී ලබාදීමට යොමු වුණා. අපේ තරුණ පරපුරට වගේම සමස්ත ජනතාවටම අපි ආදරෙයි. අප සක්‍රීය සේවයේ සිටි කාලයේ මානුෂීය ගුණාංගවලින් යුක්තව මානුෂීය මෙහෙයුමක් සිදුකළ අත්දැකීම් උපරිමයෙන් සිදුකර, මේ විශේෂ කටයුත්ත වෙනුවෙන් අද ලබාදී සිටිනවා. ඒ නිසාම අනෙකුත් පක්ෂ සහ රජය නොසිතූ කම්පනයකට ලක්වුණා. ජාතික ජන බලවේගයට විරුද්ධව දේශපාලනයේ යෙදී සිටින පක්ෂ සහ කණ්ඩායම් අදිටන ත්‍රිවිධ හමුදා සාමූහිකය සම්බන්ධයෙන් නොයෙකුත් මඩ අවලාද එල්ල කරන වීඩියෝ පට සහ පෝස්ට් සමාජ මාධ්‍යයේ පළ කරනවා. මාලිමාවට එරෙහිව කටයුතු කරන දේශපාලන පක්ෂ පවා මාධ්‍ය හමු පවත්වමින් අදිටන සාමූහිකයේ ක්‍රියාකාරකම් පිළිබඳව ව්‍යාජ සහ බොරු ප්‍රචාර ගෙනයනවා.
සාමකාමී මැතිවරණයකට ඉඩ සලසනවා
ඒ නිසයි, මම මුලින්ම අවධාරණය කළේ පසුගිය යුද්ධය පැවැති කාලයේ මෙම සාමාජිකයන් විශාල මානුෂීය මෙහෙයුමක් කළ අය බව. අපිට ජාතික ජන බලවේගය විශ්වාසයි. ඒ වගේම අපි කරන ක්‍රියාකාරකම් ගැන අපට විශ්වාසයි. පොහොසත් රටක් ලස්සන ජීවිතයක් හැදීමේ අරමුණෙන් ක්‍රියාකරනවා වගේම ප්‍රතිපත්තිමය වශයෙන් සැප්තැම්බර් විසි එක්වන දින ජනාධිපතිවරණයට උපරිම සහයෝගය ලබා දී ඉතාමත් සාමකාමී මැතිවරණයකට ඉඩ සලසනවා. ඉන් පසුවත් සාමකාමී වාතාවරණයක් ඇති කිරීම අපේ පරම වගකීම සහ යුතුකමයි. එය අපි ඉතාමත් විශ්වාසනීය ලෙස ජාතික ජන බලවේගයත් සමග එක්වී ක්‍රියාකරනවා. ජනාධිපති ලෙස තෝරා පත්වෙන අනුර කුමාර දිසානායක මහතාගේ නායකත්වයෙන් මේ රට සාමකාමී ලෙස පවත්වාගෙන යාමට ඇප කැපවී ක්‍රියාකරනවා. අපි රටවැසියාට බොරු පොරොන්දු දෙන්න හදාගත් සාමූහිකයක් නොවෙයි. දිවයිනේ සෑම දිස්ත්‍රික්කයකම අස්සක් මුල්ලක් නෑර යමින් ජාතික ජන බලවේගයේ අපේක්ෂක අනුර කුමාර දිසානායක මහතා විජයග්‍රහණය කරවීම සඳහා අපි ඇප කැපවී ක්‍රියාකරනවා.
සැප්තැම්බර් විසි එක්වෙනිදායින් පසු රට තුළ මහත් කලබලයක් ඇති කරන බවටත් එයට අදිටන විශ්‍රාමික සාමූහිකයේ අය සම්බන්ධ වෙන බවටත් මඩ අවලාද යවමින් තිබෙනවා. මම ඉතාමත් වගකීමෙන් ජනතාවගෙන් ඉල්ලා සිටින්නේ එවැනි අවලාදවලට ඇහුම්කන් නොදෙන ලෙසයි. එවැනි තත්ත්වයක් ඇති වෙන්න කිසිසේත්ම ඉඩක් නැහැ.
තැපැල් ඡන්දය පාවිච්චි කිරීමේ දී බුද්ධිමත් වන්න
අපි මෙම සාමූහිකය ගොඩනඟා ගත්තේ බිම් මට්ටමේ සිට ත්‍රිවිධ හමුදා විශ්‍රාමිකයන් හමුවී සාකච්ඡා කිරීමෙන් පසුවයි. ඒ නිසා මෙම සාමූහිකය පොළොවේ පැළවුණු මුදුන් මුල් සහිත මහා වෘක්ෂයක් වූ ජාතික ජන බලවේගයට එක්වී සිටිනවා. එළඹෙන පස්වැනිදා සහ හය වැනිදා තැපැල් ඡන්දය පාවිච්චි කිරීමේදී ත්‍රිවිධ හමුදා සාමාජිකයන්ට ද එම අයිතිය හිමිව තිබෙනවා. අප සමග රාජකාරි කළ අය හැටියට මේ රටට අත්වී තිබෙන ඛේදවාචකය ගැන සියලු දෙනාටම හොඳ අවබෝධයක් තිබෙනවා. ඒ නිසා තැපැල් ඡන්දය පාවිච්චි කිරීමේ දී බුද්ධිමත්ව හොඳින් සිතා බලා කටයුතු කරන ලෙස ඉල්ලා සිටිනවා.
ත්‍රිවිධ හමුදා සාමාජිකයන්ට මෙතෙක් නීත්‍යානුකූලව ලබාදී තිබෙන පහසුකම් කිසිවක් අඩු නොවන බවත් විශේෂයෙන්ම ප්‍රතිපත්තිමය වශයෙන් ජාතික මහ සමුළුවේදී ප්‍රකාශයට පත්කර තිබෙනවා. ත්‍රිවිධ හමුදාවේ ගරුත්වය, අනන්‍යතාව සහ නීත්‍යානුකූලව රජයෙන් ලබාදී තිබෙන පහසුකම් කිසිම කප්පාදුවක් නොවෙන බව සහතික කර කියා සිටිනවා. අප ප්‍රකාශ කරන කරුණු විකෘති කරමින් ප්‍රචාරය කිරීමට තරම් ඇතැම් පිරිස් බිය වී සිටිනවා. රට විනාශයට වගකිව යුතු පිරිස් ඒ ආකාරයෙන් ක්‍රියාකරන බව අපි දන්නවා.
අසත්‍ය කරුණුවලට මුළා වෙන්න එපා
සිවිල් ආරක්ෂක බළකාය ඉතාමත් හැකියාවෙන් යුක්තව තිස් දාහකක පමණ සාමාජිකත්වයකින් රට පුරා ක්‍රියාත්මක වෙනවා. ඔවුන්ගේ ගරුත්වය රැකෙන පරිදි කාලීනව අවශ්‍ය පුහුණුවීම ලබාදී රටට වැඩදායී ලෙස යොදවා ගන්නවා. ඔවුන්ගේ රැකියාවේ ස්ථාවරභාවය ආරක්ෂා කරනවා. මියගිය සහ අතුරුදහන් වූ ත්‍රිවිධ හමුදා සාමාජිකයන්ගේ පවුල්වල සාමාජිකයන් සමග ජාතික ජන බලවේගය දීර්ඝ වශයෙන් සාකච්ඡා කර වැඩපිළිවෙළක් සකස්කර තිබෙනවා. ඒ වගේම විශ්‍රාම වැටුප්වල පවතින විෂමතාවය අවසන් කිරීමට කටයුතු කරනවා.
සැප්තැම්බර් දහ අටවැනිදා රාත්‍රියේ ඡන්ද ප්‍රචාරක කටයුතු අවසන් කිරීමත් සමග ඡන්ද පවත්වා අවසන් වන තුරු අපගේ ටී ෂර්ට් පලඳින්න බැහැ. එම කාලය තුළ අදිටන ටී ෂර්ට් පැලඳගෙන කටයුතු කරනවා නම්, ඔවුන් අපගේ සාමාජිකයන් නොවෙයි. අදිටන ටී ෂර්ට් භාවිතා කර, වීඩියෝ ක්ලිප්ස් සකස්කර, ව්‍යාජ මත ඉදිරිපත් කර තිබුණා. සැප්තැම්බර් දහ අටවන දින දක්වා අප යම් විශේෂිත කටයුත්තක් කරනවා නම් මේ ආකාරයෙන් ප්‍රසිද්ධ මාධ්‍ය හමුවක් පවත්වා ජනතාවට කරුණු හෙළි කරනවා. ඒ අනුව ජනතාවට අප කරන ක්‍රියාකාරකම් ගැන විනිවිද භාවයකින් යුතුව තේරුම් ගැනීම පහසු වෙනවා. ජාතික ජන බලවේගය ජනතාව අතරේ අත්පත් කරගෙන තිබෙන මහා ප්‍රසාදය ඉදිරියේ පසුබැස ඇති පිරිස් ඔවුන්ගේ බලය රැකගැනීමට ක්‍රියාකරන ආකාරය ගැන මහජනතාවට මේ දිනවල හොඳින් දැකගන්න පුළුවන්. ඒ නිසා සමාජ මාධ්‍ය භාවිතා කරමින් ඉදිරියේදී හුවාමාරු වන අසත්‍ය කරුණුවලට මුළා නොවෙන ලෙස ඕනෑකමින් ඉල්ලා සිටිනවා.’’
විශ්‍රාමික ත්‍රිවිධ හමුදාවට ගෞරවනීය විශ්‍රාම ජීවිතයක්
අදිටන ත්‍රිවිධ හමුදා සාමූහිකයේ විශ්‍රාමික එයාර් වයිස් මාෂල් සම්පත් තුයියකොන්තා
‘‘ජාතික ජන බලවේගය ලෙස අපි ප්‍රතිපත්ති ප්‍රකාශනයක් නිකුත් කර තිබෙනවා. එහි දෙසිය විසි තුන්වන පිටුවේ ‘උසස් ජාතික ආරක්ෂාවක් - සුරක්ෂිත රාජ්‍යයක්’ යන පරිච්ඡේදය යටතේ අපේ ප්‍රතිපත්තිය ඉදිරිපත් කර තිබෙනවා. ඒ සම්බන්ධ විස්තර එන්.පී.පී. ඩොට් එල්කේ වෙබ් අඩවියට පිවිස ඕනැම කෙනෙකුට බලා ගන්න පුළුවන්. ඒ සම්බන්ධයෙන් දැනුවත් වෙන ලෙස ඉල්ලීමක් කරනවා. අපේ ත්‍රිවිධ හමුදාවේ දැනට සිටින නිලයන්ට අදාළව රජයෙන් නීත්‍යානුකූලව ලබාදී තිබෙන සියලුම පහසුකම් ඒ ආකාරයෙන්ම ලබා දෙනවා. පොදු ජනතාවට ලැබෙන වෛද්‍ය සහ ප්‍රවාහන පහසුකම් වැඩිදියුණු කිරීමෙනුත් ප්‍රයෝජනයක් ලැබෙනවා. විශ්‍රාමික සාමාජිකයන් සඳහා පවතින නිවාඩු නිකේතන ඇතුළු පහසුකම් ඒ ආකාරයෙන්ම පවත්වාගෙන යනවා. ත්‍රිවිධ හමුදාවේ වෘත්තිය පුහුණුවක් ලැබූ අය, විශ්‍රාම ගියාට පසුව යෙදීමට වෘත්තීන් අහිමිවීම නිසා යුක්රේනයේ හෝ රුසියාව වැනි යුද්ධ භූමිවලට ගොස් ජීවිත පවා අනතුරට ලක්ව තිබෙනවා. ගෞරවනීය විශ්‍රාම ජීවිතයක් ගෙවීමට ආදායම් නොමැතිවීම නිසා ඔවුන් එවැනි අවදානමකට මුහුණ දී සිටිනවා.
පාස්කු ප්‍රහාරය සිද්ධ වුණේ දුර්වල නායකත්වය නිසා
‘‘ත්‍රිවිධ හමුදාව පොලීසිය සමග එක්ව ජාතික ආරක්ෂාව වෙනුවෙන් කැපවී ඉහළ ම ආකාරයෙන් යුද්ධය කාලයේ පවා ක්‍රියාකර තිබෙනවා. ත්‍රස්තවාදය, පාස්කු ප්‍රහාරය ඇති වුණේ මේ රට පාලනය කළ දේශපාලනඥයන්ගේ දුර්වල නායකත්වය නිසා බව කනගාටුවෙන් වුවත් කියන්න සිදුවෙනවා. අදටත් පාලකයන් ජාතික ආරක්ෂාව සම්බන්ධයෙන් ඒ ආකාරයෙන්ම ක්‍රියාකරනවා. උදාහරණයක් හැටියට ශ්‍රේෂ්ඨාධිකරණය නියෝග කළ පරිදි තාමත් වැඩ බලන පොලිස්පතිවරයෙක් පත්කර නැහැ. පටු දේශපාලන සිතුවිලි නිසා පාලකයන් ඒ වගකීම පැහැර හැර තිබෙනවා. පටු දේශපාලන වාසි තකා පාලකයන් ක්‍රියාකරන ආකාරය මැනවින් තේරුම් ගන්නා ලෙසත් ඔවුන් රට ගැන සිතා කටයුතු නොකරන ආකාරයත් තේරුම් ගන්නා ලෙස ඉල්ලා සිටිනවා. අපි ජාතික ජන බලවේගයට එක්වී සිටින්නේ මේ තත්ත්වය වෙනස් කරන්නයි. අපි සිවිල් වැසියන් හැටියට නීත්‍යානුකූල ලෙස ජාතික ජන බලවේගයට සම්බන්ධ වී ක්‍රියාකරමින් සිටිනවා. අපි කිසිම ලෙසකින් රට තුළ ප්‍රචණ්ඩත්වයක් ඇති වීමට ක්‍රියා නොකරන බව අවධාරණය කරනවා. ඒ පමණක් නොවෙයි සක්‍රීය සේවයේ යෙදී සිටියේ දී වගේම මේ අවස්ථාවේදීත් ක්‍රියා කරන්නේ සාමකාමී රටක මහජනතාවගේ ආරක්ෂාව වෙනුවෙනුයි.’’
අපි, පුද්ගලික ප්‍රතිලාබ බලාපොරොත්තු වෙන්නෙනෑ
රියර් අද්මිරාල් ෆ්‍රෙඩ් සෙනෙවිරත්න
‘‘අපි විශ්‍රාමික ත්‍රිවිධ හමුදා සාමූහිකයට සම්බන්ධ වී සිටින්නේ කිසිදු පෞද්ගලික ප්‍රතිලාභයක් අපේක්ෂාවෙන් නොවෙයි. සිදුවෙමින් පවතින සමාජ අසාධාරණය ඉදිරියේ තවදුරටත් නිහඬව සිටිය නොහැකි නිසා අපි ජාතික ජන බලවේගය සමග එක්වී රට ගොඩනඟන්න ක්‍රියාකරනවා. අනෙකුත් දේශපාලන පක්ෂත් විශ්‍රාමික හමුදා සාමූහිකයන් එක්කරගෙන සංවිධාන ගොඩනගන්න උත්සාහ කළා. දූෂිත දේශපාලකයන් සහ ඔවුන් සමග ගහට පොත්ත මෙන් බද්ධ වී ක්‍රියා කළ සමහර නිලධාරීන් අපට විරුද්ධව පසුගිය කාලයේ අභූත චෝදනා ඉදිරිපත් කළා.
අදිටනට සම්බන්ධ ජ්‍යෙෂ්ඨ නිලධාරීන් සියලු දෙනා දේශපාලනයට කිසිදු සම්බන්ධතාවයක් නොමැතිව ගෞරවාන්විතව රාජකාරි කර සක්‍රීය සේවයෙන් විශ්‍රාම ගත් අයයි. හතළිස් දහසකට වැඩි විශ්‍රාමික ත්‍රිවිධ හමුදා සාමාජිකයන් පිරිසක් අප වටා එකතු වී සිටින්නේ මේ තත්ත්වය නිසයි. ජාතික ජන බලවේගය තුළ අපගේ දේශපාලන භාවිතය ජනතාව තුළ ඉතාමත් ඇගයීමට ලක්වී තිබෙනවා. දේශපාලන වේදිකාවල අපට අභූත චෝදනා නගන දේශපාලකයන් සහ විශ්‍රාමික හමුදා නිලධාරීන් සම්බන්ධයෙන් සානුකම්පිතව කල්පනා කරන අතර, ඔවුන් සක්‍රීය දේශපාලනයේ යෙදී සිටි සමයේ ක්‍රියාකළ ආකාරය සම්බන්ධයෙන් සලකා බලන ලෙස සමාජයෙන් ඉල්ලා සිටිනවා. විශේෂ ප්‍රභූ ආරක්ෂක කටයුතුවල යෙදි සිටින ආරක්ෂක අංශ සාමාජිකයන්ගේ නීත්‍යානුකූල අයිතිවාසිකම් කිසිවක් වෙනස් නොවෙන බව අවධාරණය කරනවා. ඒ වගේම මෙතෙක් අප හා එක් නොවූ විශ්‍රාමික හමුදා සාමාජිකයන් හට අප හා එක්වන ලෙසටත් ජනතාවාදී රජයක් බිහි කිරීමට දායක වන ලෙසත් ඉල්ලා සිටිනවා.’’
ජනතාව කිසිසේත්ම බිය විය යුතු නැහැ
ජනාධිපති නීතිඥ උපුල් කුමරප්පෙරුම
‘‘ජාතික ජන බලවේගයේ ජයග්‍රහණය වෙනුවෙන් ජනතාව පෙළ ගැසෙන ආකාරය දැකීමෙන් විරුද්ධ පිරිස් කලබල වී ඉතාමත් තිරස්චීන මඩ ප්‍රහාරයන් එල්ල කරමින් සිටිනවා. ඊයේ (01) අපි අපරාධ පරීක්ෂණ දෙපාර්තමේන්තුවට පාර්ලිමේන්තු මන්ත්‍රී තුෂාර ඉඳුනිල්ට එරෙහිව පැමිණිල්ලක් ඉදිරිපත් කළා. ඔහු විසි දෙවනදා ජනතා විමුක්ති පෙරමුණේ සාමාජිකයන් විසින් මිනිසුන්ගේ දේපළ කොල්ලකෑම, වාහන අත්පත් කර ගැනීම ආදී ක්‍රියා කරනු ඇති බවට විශාල භීතියක් සමාජයේ වපුරන්න උත්සාහ කරනවා. ඒ වගේම ශ්‍රේෂ්ඨාධිකරණය විසින් මන්ත්‍රී ධුරයෙන් පහකළ මනුෂ නානායක්කාර හිටපු ඇමතිවරයා තවත් භීතියක් හදමින් ජාතික ජන බලවේගයේ ජයග්‍රහණයත් එක්ක විශාල මිනිස් ඝාතන සිදුවිය හැකි බවට ප්‍රචාරය කරනවා. එක්දහස් නමසිය හැත්තෑ හතේ මැතිවරණයෙන් පසුව ජනතාවට භීතියක් ඇති කළේ කවුද කියලා අපි දැකලා තිබෙනවා.
එක්දහස් නමසිය අනූ හතරේ සිට අද දක්වාම ඒ ආකාරයේ මැතිවරණ ප්‍රචණ්ඩ ක්‍රියා ලංකාවේ සිදුවී නැහැ. චන්ද්‍රිකා බණ්ඩානායක කුමාරතුංග ජනාධිපති ධුරයට පත්වීමෙන් පසුව අද දක්වාම ඔය කියන ආකාරයේ මැතිවරණ ප්‍රචණ්ඩ ක්‍රියා ඇති වී නැහැ. ඒ නිසා විසි දෙවන දා හෝ ඊට පසුව ඔය කියන ආකාරයේ සිදුවීම් පිළිබඳව ජනතාව කිසිසේත්ම බිය විය යුතු නැහැ. ඒ වගේම තැපැල් ඡන්දදායකයාගේ මනස විකෘති කරන ආකාරයේ පණිවිඩ සමාජ මාධ්‍ය යොදා ගනිමින් පතුරුවා හරිමින් සිටිනවා. ජාතික ජන බලවේගය ඉදිරියේ ඇතිවී තිබෙන ජනතා ප්‍රසාදය යම් තරමකින් හෝ අඩු කරන්න මේ මගින් උත්සාහ කරනවා.
බොරු ප්‍රචාරවලට රැවටෙන්න එපා
අපේ ජනතාවගේ ස්ථාවර තැන්පතු රජයට පවරා ගන්නා බව හඳුන්නෙත්ති සහෝදරයා කීවා කියලා ඊයේ ඉංග්‍රීසි පුවත්පතක පළ කර තිබුණා. මේ රටේ මිනිසුන්ට දේපළ තබා ගැනීමේ අයිතිය නීතියෙන් තහවුරු කර තිබෙනවා. සල්ලි කියන්නෙත් මිනිසුන්ගේ දේපළක්. යම් නීතියක් පනවනවා නම්, ඊට කලින් ශ්‍රේෂ්ඨාධිකරණයට පනත් කෙටුම්පත යනවා. ශ්‍රේෂ්ඨාධිකරණය සලකා බැලීමෙන් පසුවයි ඒ සම්බන්ධයෙන් ඉදිරි ක්‍රියාමාර්ග ගන්නේ. ආණ්ඩුවක් පත්වුණා කියලා හිතෙන හිතෙන ආකාරයට නීති සම්මත කරගන්න බැහැ, බොරු ප්‍රචාරවලට රැවටෙන්න එපා. අපේ රටේ ජනතාවට ඉතාමත් ආදරයෙන් සහ ගෞරවයෙන් මම ඒ බව සඳහන් කරනවා. දේශපාලනය සම්බන්ධයෙන් සාතිශය බහුතර ජනතාව මේ වන විට ගෙන තිබෙන තීරණය ඒ ආකාරයෙන්ම ක්‍රියාත්මක කර, ඉතිහාසයේ පළමු වතාවට ජනතාවගේ ජනාධිපති ලෙස අනුර කුමාර දිසානායක සහෝදරයා පත්කර ගන්නා මෙන් ඉල්ලා සිටිනවා.’’
මාධ්‍යවේදීන් නැගූ ප්‍රශ්නවලට පිළිතුරු
ප්‍රශ්නය:
මනුෂ නානායක්කාර සම්බන්ධයෙන් අනුගමනය කරන ක්‍රියාමාර්ගය මොකක්ද?
පිළිතුර:
අපි දැනටමත් තුෂාර ඉඳුනිල් මන්ත්‍රීවරයාට විරුද්ධව පැමිණිලිකර තිබෙනවා. මනුෂ නානායක්කාරට විරුද්ධව පැමිණිලි කරනවා. සැප්තැම්බර් දහ අටවන දින දක්වා ගෙනයන සියලු ම අසත්‍ය ප්‍රචාර සහ මඩ අවලාදවලට එරෙහිව නීතිමය පියවර ගන්නවා.
(සටහන - ජයසිරි අලවත්ත)
