ප්‍රකාශයක් ලබාදීමට පැමිණි අවස්ථාවේ අත්අඩංගුවට ගෙන කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමට පියවර
අත්අඩංගුවට ගැනීම සහ මූල්‍ය අවභාවිත චෝදනා
එක්සත් ජාතික පක්ෂයේ හිටපු මහලේකම්වරයකු මෙන්ම හිටපු අධ්‍යාපන අමාත්‍යවරයකු වන ගොඩගේ අකිල විරාජ් කාරියවසම් අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අද (05) පස්වරු 1.45ට පමණ අත්අඩංගුවට ගෙන තිබේ.
හිටපු ජනාධිපති රනිල් වික්‍රමසිංහ ගේ ජ්‍යෙෂ්ඨ උපදේශකවරයෙකු (විමධ්‍යගත පරිපාලන) ලෙස කටයුතු කළ සමයේ සිදු වූ බව කියන රුපියල් 2,768,836.14ක (රුපියල් ලක්ෂ 27කට අධික) රාජ්‍ය මුදල් අවභාවිතයක් සහ දූෂණ චෝදනාවක් සම්බන්ධයෙන් සිදු කෙරෙන විමර්ශනයකට අදාළව මෙම අත්අඩංගුවට ගැනීම සිදු කර ඇත.
විමර්ශනවලදී අනාවරණය වූ කරුණු
අල්ලස් කොමිසම විසින් සිදු කරන ලද විමර්ශනවලට අනුව, ජනාධිපති ජ්‍යෙෂ්ඨ උපදේශක කාර්යාලයේ සේවය සඳහා බව පවසමින් බඳවා ගන්නා ලද සේවකයන් සිව්දෙනෙකු අතුරින් තිදෙනෙකු (03) හිටපු අමාත්‍යවරයාට අයත් පෞද්ගලික ඉන්ධන හලක සේවය සඳහා යොදවා තිබේ. එමෙන්ම, අනෙක් සේවකයා අදාළ තනතුරට වෙන් කර තිබූ කාර්යාලීය රාජකාරී සඳහා යොදවා නොගත් බවට ද තොරතුරු අනාවරණය වී ඇත.
මෙලෙස රාජ්‍ය රාජකාරි සඳහා යොදවා නොගත් සේවකයන් වෙනුවෙන් රජයේ අරමුදල්වලින් රුපියල් 2,768,836.14ක වැටුප් හා දීමනා ගෙවීමට සැලැස්වීම මගින් රජයට පාඩුවක් සිදු කරමින් 'දූෂණය' නමැති වරද සිදු කිරීම සම්බන්ධයෙන් අකිල විරාජ් කාරියවසම් ට එරෙහිව චෝදනා එල්ල වී තිබේ.
ඉදිරි නෛතික ක්‍රියාමාර්ග
අල්ලස් හෝ දූෂණ චෝදනා විමර්ශන කොමිෂන් සභාව මගින් කළ දැනුම් දීමකට අනුව අද පෙරවරුවේ එම කොමිසම හමුවේ පෙනී සිටි හිටපු අමාත්‍යවරයාගෙන් ප්‍රකාශ සටහන් කරගැනීමෙන් අනතුරුව මෙම අත්අඩංගුවට ගැනීම සිදු කර ඇත.
අත්අඩංගුවට ගත් සැකකාර හිටපු අමාත්‍යවරයා නීතිමය පියවර සඳහා කොළඹ ප්‍රධාන මහේස්ත්‍රාත් අධිකරණය හමුවට ඉදිරිපත් කිරීමට අල්ලස් කොමිසමේ විමර්ශන නිලධාරීන් කටයුතු යොදා තිබේ.
