හිටපු ඇමැතිවරයා අත්අඩංගුවට ගැනීමේ විවෘත වරෙන්තුව ඔක්තෝබර් 27 දක්වා දීර්ඝ කෙරේ
මාතර, බ්‍රවුන්ස් හිල් ප්‍රදේශයේ පිහිටි අක්කර එකහමාරක පොල් ඉඩමක් රුපියල් මිලියන 60කට මිලදී ගැනීම සම්බන්ධයෙන් විභාග වන නඩුවට අඛණ්ඩව පෙනී නොසිටීම හේතුවෙන් හිටපු ආර්ථික සංවර්ධන අමාත්‍ය බැසිල් රාජපක්ෂ ගේ ඇප මුදල් රාජසන්තක කිරීමට මාතර ප්‍රධාන මහේස්ත්‍රාත් චතුර දිසානායක නියෝග කළේය.
ඊට අමතරව, සැකකාර හිටපු අමාත්‍යවරයා වෙනුවෙන් පෙනී සිටි ඇපකරුවන් තිදෙනාගෙන් එම ඇප මුදල් අය කර ගැනීමට ද මහේස්ත්‍රාත්වරයා පියවර ගත්තේය.
ඇපකරුවන්ට ලබාදුන් නියෝගය සහ මුදල් ගෙවීම
අදාළ නඩු විභාගය සඳහා බැසිල් රාජපක්ෂ අවස්ථා කිහිපයකදීම අධිකරණය හමුවේ පෙනී නොසිටීම සැලකිල්ලට ගත් ප්‍රධාන මහේස්ත්‍රාත්වරයා, ඔහු වෙනුවෙන් ඉදිරිපත්ව සිටි ඇපකරුවන් තිදෙනාට දැඩි ලෙස අවවාද කරමින් නියෝග කළේ නියමිත ඇප මුදල් නොගෙවන්නේ නම් එය දඩයක් ලෙස සලකා එක් අයෙකුට මාස 06 බැගින් වූ සිර දඬුවම් නියම කරන බවයි.
ඒ අනුව, සැකකරු වෙනුවෙන් රුපියල් ලක්ෂ 10 බැගින් වූ ශරීර ඇප තුනකට අත්සන් තබා තිබූ ඇපකරුවන් තිදෙනා, නියමිත රුපියල් ලක්ෂ තිහක (රු. 3,000,000) සම්පූර්ණ මුදල එදිනම අධිකරණය වෙත ගෙවා බේරුම් කිරීමට කටයුතු කළහ.
විවෘත වරෙන්තුව ඔක්තෝබර් 27 දක්වා දීර්ඝයි
මෙම ඉඩම් ගනුදෙනුව සම්බන්ධ විමර්ශනවලට අදාළව අධිකරණය හමුවේ පෙනී නොසිටින සැකකාර බැසිල් රාජපක්ෂ අත්අඩංගුවට ගැනීම සඳහා මීට පෙර නිකුත් කර තිබූ විවෘත වරෙන්තුව එළඹෙන ඔක්තෝබර් මස 27 වැනි දින දක්වා යළි දීර්ඝ කිරීමට ද ප්‍රධාන මහේස්ත්‍රාත් චතුර දිසානායක නියෝග කරනු ලැබීය.
පැමිණිල්ල වෙනුවෙන් පොලිස් මූල්‍ය අපරාධ විමර්ශන කොට්ඨාසය (FCID) සහ නීතිපති දෙපාර්තමේන්තුවේ නිලධාරීන් අධිකරණය හමුවේ කරුණු දැක්වූ අතර, සැකකාර බැසිල් රාජපක්ෂ වෙනුවෙන් ජනාධිපති නීතිඥ අනිල් ද සිල්වා ගේ උපදෙස් මත නීතිඥ මණ්ඩලයක් පෙනී සිටියේය. නඩුව වැඩිදුර විභාගය සඳහා ඔක්තෝබර් 27 වනදා යළි කැඳවීමට නියමිතය.
