තුළින් නැවත වතාවක් එම ගෞරවය සහ අභිමානය ශ්‍රී ලංකාවට අත්කර දීමට අපි සියලු දෙනා පුරවැසියන් වශයෙන් කටයුතු කළ යුතු බැව් අග්‍රාමාත්‍ය, අධ්‍යාපන, උසස් අධ්‍යෘපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය පැවසුවා ය.
අගමැතිනිය මෙම අදහස් පළ කළේ අද (30) ශ්‍රී ලංකා විභාග දෙපාර්තමේන්තුවේ නව බහුකාර්ය ගොඩනැගිල්ල විවෘත කිරීමේ උත්සවයට සහභාගී වෙමිනි.
රුපියල් මිලියන 478ක් වියදම් කරමින් ඉදිකළ මෙම ගොඩනැගිල්ල තට්ටු 06කින් සමන්විත වන අතර රජයේ නිලධාරීන්ගේ කාර්යක්ෂමතා කඩයිම් විභාග පැවැත්වීමට සහ වෙනත් එවැනි විභාග පැවැත්වීම සඳහා ශාලා පහසුකම්, නවීනතම තාක්ෂණික සහ ශ්‍රවණ උපකරණ සහිත එකවර ශ්‍රාවකයින් 175කට පමණ පහසුකම් සැලසිය හැකි අංග සම්පූර්ණ ශ්‍රවණාගාරයක්, ශබ්ද පරිපාලනය කරන ලද අංග සම්පූර්ණ බහු කාර්ය ශබ්දාගාරයක් (විශේෂ අවශ්‍යතා සහිත දරුවන්ගේ විභාග කටයුතු, ශබ්දාගාර කටයුතු, පටිගතකිරීම් ආදිය සහිත), පුද්ගලයින් සඳහා නේවාසිකාගාර පහසුකම්, පොදු සන්නිවේදන ජාලයක්, අන්තර්ජාල විභාග පැවැත්වීම සඳහා වන පහසුකම් සහිත කාමර, විභාග රහස්‍ය කටයුතු සඳහා පහසුකම් සහිත කාමර සහ CCTV කැමරා පද්ධතිය ඇතුළු පහසුකම් රැසකින් ද සමන්විත ය.
මෙම උත්සවයේ දී වැඩි දුරටත් අදහස් දැක්වූ අගමැතිනිය...
ආයතනයක වැදගත් ම කාර්ය
''මේ අවස්ථාවේ දී විශේෂ ස්තූතියක් කරන්නට මම මුලින් ම කැමතියි. ඒ තමයි අමිත් ජයසුන්දර විභාග කොමසාරිස් ජෙනරාල්තුමාට. එතුමා විශ්‍රාම ගිය පසුවත් අපේ ඉල්ලීම මත නැවත සේවය ලබාදීමට කටයුතු කළා. පසුගිය උසස් පෙළ විභාගය පැවැත්වීම සහ එහි ප්‍රතිඵල නිකුත් කිරීම කිසිදු බාධාවකින් තොරව සිදු වුණා. ඒ සම්බන්ධයෙන් ඔබ සියලු දෙනාට ම ස්තූතිවන්ත වෙනවා. වැදගත් ම දේ ආයතනයක දැක්ම.
අධ්‍යයනය කළ යුතු ඇගයීම් ක්‍රමවේද
2026 ක්‍රියාත්මක කිරීමට නියමිත නව අධ්‍යාපන ප්‍රතිසංස්කරණවල ප්‍රධාන කුලුනු පහෙන් එක් කුලුනක් තමයි ඇගයීම් ක්‍රමය. අධ්‍යාපන ක්‍රමයේ විශ්වසනීයත්වය රැකගන්නා ප්‍රධානත ම කරුණ තමයි ඇගයීම් ක්‍රමය. පවතින විභාග ක්‍රමය පවත්වාගෙන යන අතරතුර ම නව්‍ය වෙනස්කම්වලට අදාළ ක්‍රියාමාර්ග සඳහා සූදානම් විය යුතු යි. යටිතල පහසුකම්වලින් පමණක් නොවෙයි, ලෝකයේ ඇගැයීම් ක්‍රමවේදයන් සහ නව ඇගැයීම් ක්‍රමවේදයන් අධ්‍යයනය කළ යුතු යි. ඒවා අපේ පද්ධතියට ඇතුළත් කරගත යුතු යි. ඇගැයීම් සම්බන්ධ ලෝක මට්ටමේ සම්මන්ත්‍රණවලට සහභාගී වීම, ඒවා අධ්‍යයනය සහ ඒ තුළින් ලැබෙන ප්‍රතිඵල අධ්‍යයනය මගින් අපේ ක්‍රමවේදයන් අලුත් මගට අවතීර්ණ කරන්නට අපට පුළුවන්. එතුළින් ලොව හොඳ ම අධ්‍යාපන ක්‍රමයක් බිහි කරන්නට අපට පුළුවන්.''
මෙම අවස්ථාව සඳහා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශයේ ලේකම් නාලක කලුවැව, විභාග කොමසාරිස් ජනරාල් අමිත් ජයසුන්දර, ජාතික අධ්‍යාපන ආයතනයේ අධ්‍යක්ෂ ජනරාල් මහාාචාර්ය මංජුලා විදානපතිරණ, අධ්‍යාපන ප්‍රකාශන කොමසාරිස් ජනරාල් සුභාෂිණී දෙමටගොඩ, රාජ්‍ය ඉංජිනේරු සංස්ථාවේ සභාපතිතුමා, හිටපු විභාග කොමසාරිස් ජනරාල්වරුන්, අමාත්‍යංශ සහ විභාග දෙපර්තමේන්තුවේ නිලධාරීන් ඇතුළු පිරිසක් ද එක් වූහ.