*වනජීවී ආරක්ෂාව සහ උද්‍යාන නඩත්තුව වෙනුවෙන් සැප්. 14 සිට ඔක්. 15 දක්වා යාල පළමු කලාපය වසා දැමීමට පියවර
ගෝලීය කාලගුණික විපර්යාසයන්හි ප්‍රබල සාධකයක් වන 'එල්-නිනෝ' (El Niño) සක්‍රීය වීම හමුවේ එළඹෙන සැප්තැම්බර් මාසයේදී මෙරට වියළි කලාපයේ උෂ්ණත්වය සෙල්සියස් අංශක 40 සීමාව ඉක්මවා යාමේ දැඩි අවදානමක් මතුව ඇතැයි කාලගුණ විද්‍යා දෙපාර්තමේන්තුව පෙන්වා දෙයි. මෙම ආන්තික කාලගුණික තත්ත්වය සහ පවතින දැඩි වියළි කාලගුණය හේතුවෙන් යාල ජාතික උද්‍යානයේ වන සතුන් දැඩි අර්බුදයකට මුහුණ දී සිටින අතර, සතුන්ගේ ආරක්ෂාව වෙනුවෙන් සැප්තැම්බර් 14 වැනිදා සිට ඔක්තෝබර් 15 දක්වා යාල අංක 01 කලාපය සංචාරකයින් සඳහා තාවකාලිකව වසා දැමීමට වනජීවී සංරක්ෂණ දෙපාර්තමේන්තුව තීරණය කර තිබේ.
උෂ්ණත්වය සෙල්සියස් 40 ඉක්මවා යාමේ දැඩි අවදානමක්
කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අජිත් විජේමාන්න සඳහන් කරන්නේ, වර්තමානය වන විට ආරම්භ වී ඇති එල්-නිනෝ තත්ත්වය තවදුරටත් තීව්‍ර වීමේ සම්භාවිතාව සියයට 95ක් බවට ජාත්‍යන්තර කාලගුණ විද්‍යා නිරීක්ෂණ මධ්‍යස්ථාන තහවුරු කර ඇති බවයි.
පසුගිය කාලසීමාවේදී ත්‍රිකුණාමලය ඇතුළු දිස්ත්‍රික්ක කිහිපයක උෂ්ණත්වය සෙල්සියස් අංශක 39 සීමාව ඉක්මවා ගිය බව සිහිපත් කළ අධ්‍යක්ෂ ජනරාල්වරයා, එළඹෙන සැප්තැම්බර් මාසයේදී වැසි රහිත වියළි කාලගුණයක් සමඟ උෂ්ණත්වය සෙල්සියස් අංශක 40 ද ඉක්මවා ඉහළ යා හැකි බව පෙන්වා දුන්නේය. බස්නාහිර, සබරගමුව, වයඹ පළාත්වලට මෙන්ම මහනුවර, නුවරඑළිය, ගාල්ල සහ මාතර දිස්ත්‍රික්කවලට පවතින වැසි තත්ත්වය ක්‍රමයෙන් පහව යනු ඇතැයි ද පුරෝකථනය කර ඇත.
කෙසේ වෙතත්, මෙම තත්ත්වය ඔක්තෝබර් සහ නොවැම්බර් මාසවලදී වෙනස් වෙමින් දිවයින පුරා සක්‍රීය වැසි බලාපොරොත්තු විය හැකි බවත්, ඉන්දියානු සාගර ද්විධ්‍රැව (IOD) තත්ත්වයේ බලපෑම මත දෙසැම්බර් සහ 2027 ජනවාරි මාසවලදී උතුරු හා නැගෙනහිරට සාමාන්‍යයෙන් ලැබෙන වර්ෂාපතනයේ යම් වෙනස්කම් ඇතිවිය හැකි බවත් කාලගුණ විද්‍යා අංශ වාර්තා කරයි.
යාලේ සතුන්ට දැඩි පීඩනයක්: පළමු කලාපය මාසයකට වැසේ
මේ අතර පවතින වියළි කාලගුණයටත් වඩා දහවල් කාලයේ පවතින දැඩි උෂ්ණත්වය හමුවේ යාල ජාතික උද්‍යානයේ වන සතුන්ගේ ස්වභාවික චර්යා රටාවන්ට දැඩි බලපෑම් එල්ල වී ඇති බව වනජීවී අධ්‍යක්ෂ ජනරාල් රන්ජන් මාරසිංහ ප්‍රකාශ කළේය.
"වැසි නොමැතිකමට වඩා දහවල් කාලයේ පවතින අධික රස්නය සතුන්ට දරාගැනීම අපහසු වී තිබෙනවා. කෙසේ හෝ ජලය සොයා සපයා ගත්තත්, අධික උෂ්ණත්වය නිසා සතුන් දැඩි පීඩාවකට පත්ව සිටිනවා. සතුන්ගේ ආරක්ෂාව වෙනුවෙන් ගතහැකි උපරිම ක්‍රියාමාර්ග මේ වනවිට ගනිමින් සිටින්නේ," යනුවෙන් ඔහු සඳහන් කළේය.
තත්ත්වය තවදුරටත් සැලකිල්ලට ගනිමින් සැප්තැම්බර් 14 වැනිදා සිට ඔක්තෝබර් 15 වැනිදා දක්වා යාල කලාප අංක 01 (Block 01) කොටස පමණක් වසා දැමීමට පියවර ගෙන ඇත. කෙසේ වෙතත් සංචාරක කර්මාන්තයට වන බලපෑම අවම කරමින් යාල අංක 02 සහ 03 කලාප සංචාරකයින් සඳහා විවෘතව තැබෙනු ඇත.
සංචාරක කර්මාන්තය සහ පරිසර කළමනාකරණය
කොවිඩ් වසංගත සමයට පෙර වාර්ෂිකව නියං කාලසීමාවන්හිදී මෙලෙස යාල උද්‍යානය වසා දැමීම සාමාන්‍ය නඩත්තු සහ සංරක්ෂණ ක්‍රමවේදයක් ලෙස අඛණ්ඩව ක්‍රියාත්මක වූවකි. උද්‍යානයේ අභ්‍යන්තර මාර්ග ප්‍රතිසංස්කරණය, ජල මූලාශ්‍ර නඩත්තුව මෙන්ම වන සතුන්ට බාධාවකින් තොරව ස්වභාවික පරිසරයේ සැරිසැරීමට ඉඩ සැලසීම මෙම තීරණයේ ප්‍රධාන අරමුණයි.
මේ සම්බන්ධයෙන් ප්‍රදේශයේ සංචාරක ක්ෂේත්‍රයේ පාර්ශ්වකරුවන් දැනුවත් කර සාකච්ඡා පවත්වා ඇති අතර, නියමිත කාලයට පෙර ප්‍රමාණවත් වර්ෂාපතනයක් ලැබී උෂ්ණත්වය පහළ ගියහොත් ඔක්තෝබර් 15 දිනට පෙර යාල පළමු කලාපය නැවත විවෘත කිරීම කෙරෙහි අවධානය යොමුකරන බව වනජීවී දෙපාර්තමේන්තුව වැඩිදුරටත් තහවුරු කරයි.
