කොරෝනා රෝග ලක්ෂණ පෙන්නුම් කළ සේවක සේවිකාවන් නොසලකා හැරීමෙන්
දහස් සංඛ්‍යාත කම්කරු පිරිසක් අනතුරේ හෙලීම ගැන චෝදනා ලබන බ්‍රැන්ඩික්ස් සමාගමේ ක්‍රියාකලාපය නිසා රට පුරා වසංගතය පැතිරෙනු ඇති බවට බිය පලවී තිබේ.
වෛරසය ආසාදිතයැයි සනාථ වූ පළමු සේවිකාවගේ රෝග ලක්ෂණ සැප්තැම්බර් 28 දින හදුනා ගැනීමට සතියකටත් වැඩි කාලයක සිටම ශ්වසන පද්ධතියේ රෝග තිබූ සේවකයන් කම්හලේ සේවයේ නිරතව සිටියත් ඇමරිකාවට පවා මුවවැසුම් යවන ආයතනය කම්කරුවන්ගේ ආරක්ෂාව සම්බන්ධයෙන් කිසිදු සාධනීය පියවරක් ගෙන නොමැති බවට වෘත්තිය සමිති නායකයෝ චෝදනා කරති.
වසරේ විශිෂ්ටතම අපනයනකරු ලෙස කිහිපවර ජනාධිපති සම්මාන දිනාගෙන ඇති බ්‍රැන්ඩික්ස් සමාගම නිසි වේලාවට අවශ්‍ය සෞඛ්‍යාරක්ෂක පියවර අනුගමනය කර තිබුනේ නම් දැනට රෝගාතුර වී සිටින සේවකයන්ගෙන් අඩක්ම වයිරසයෙන් ගලවා ගැනීමට හැකියාව තිබු බව නිදහස් වෙළද කලාප සහ පොදු සේවා සේවක සංගමයේ සභාපති ඇන්ටන් මාර්කස් පෙන්වා දෙයි.
වසංගත රෝග විද්‍යා අංශයේ අධ්‍යක්ෂ විශේෂඥ වෛද්‍ය සුදත් සමරවීර ඔක්තෝබර් 7 බදාදා කොළඹදී පැවැති මාධ්‍ය හමුවකදී අනාවරණය කළ තොරතුර මගින්ද වෘත්තිය සමිති නායකයන් නගන චෝදනා සනාථ වී තිබේ.
"ආසාදිතයැයි සනාථ වූ පළමු සේවිකාවගේ රෝග ලක්ෂණ සැප්තැම්බර 28 වන දින හඳුනා ගත්තත් සැප්තැම්බර 20 වන දින සිට ශ්වසන පද්ධතියේ රෝග තිබූ සේවකයින් කම්හලේ සිටිය බව සේවකයින්ගේ විස්තර පරීක්ෂා කිරීමේදී අපට දැන ගැනීමට ලැබුණා."
සැප්තැම්බර් 20 වන දින සිට පළමු වරට ඔක්තෝම්බර 04 වන ඉරිදා පළමු සේවිකාව රෝහලේදී පී.සී.ආර් පරීක්ෂණයට ලක් කරන තෙක් බ්‍රැන්ඩික්ස් සමාගම රෝග ලක්ෂණ තිබූ කිසිදු සේවකයකු සම්බන්ධයෙන් කිසිදු වැදගත් පියවරක් නොගත් බව විශේෂඥ වෛද්‍ය සුදත් සමරවීරගේ එම ප්‍රකාශයෙන් තහවුරු වන බව ජ්‍යෙෂ්ඨ වෘත්තිය සමිති නායකයා පෙන්වා දෙයි.
ඔක්තෝබර් 07 දිනට යෙදී තිබු "ලෝක ගෞරවනීය රැකියා දිනය" නිමිත්තෙන් නිදහස් වෙළෙඳ කලාප සහ පොදු සේවා සේවක සංගමය නිකුත් කළ නිවේදනයක් මගින් අවධාරණය කර ඇත්තේ මනුෂ්‍ය ජීවිත පිළිබඳව දක්වන මේ බරපතල නොසැළකිල්ල ඇගළුම් කර්මාන්තයේ අනෙක් කම්හල්වලද එසේම යැයි තම සංගමය සිතන බවයි.
''නිදහස් වෙළෙඳ කලාප සහ පොදු සේවා සේවක සංගමය නිකුත් කළ නිවේදනයක් මගින් අවධාරණය කර ඇත්තේ මනුෂ්‍ය ජීවිත පිළිබඳව දක්වන මේ බරපතල නොසැළකිල්ල ඇගළුම් කර්මාන්තයේ අනෙක් කම්හල්වලද එසේම යැයි තම සංගමය සිතන බවයි.''
කෙසේ වෙතත්, මුල්ම ආසාදිතයා හඳුනා ගත් පසු සමාගම පවසා ඇත්තේ නිසි සෞඛ්‍යාරක්ෂක ක්‍රම වැඩපලේ යොදවා තිබුණු බවයි.
“බ්‍රැන්ඩික්ස් සමාගමේ සියලු මෙහෙයුම් අංශ තුළ දැඩි සෞඛ්‍ය ආරක්ෂණ ක්‍රමවේද ක්‍රියාත්මක කර ඇති අතර මහජන සෞඛ්‍ය පරීක්ෂක ඇතුළු අදාළ සෞඛ්‍ය බලධාරීන්ගේ කඩිනම් ක්‍රියාමාර්ග සහ සහයෝගය හේතුවෙන් එම ආසාදන තත්ත්වය කලින් ම හඳුනාගෙන එම සාමාජිකාව වහාම ප්‍රතිකාර සඳහා IDH රෝහලට ඇතුළත් කර තවදුරටත් වෛරසය ව්‍යාප්ත වීම පාලනය කර ගැනීමට හැකි වී ඇත.”
නිදහස් වෙළෙඳ කලාපය:
වයිරසය “තවදුරටත් වෛරසය ව්‍යාප්ත වීම” වෙනුවට වෙනත් බ්‍රැන්ඩික්ස් ශාඛා මෙන්ම තවත් ආයතන කරාද වසංගතය පැතිරීම මේ වනවිට සිදුවී ඇති බව කම්කරු සංවිධාන පෙන්වා දේ.
මිනුවන්ගොඩ බ්‍රැන්ඩික්ස් කෝවිඩ් පොකුරින් ආරම්භවී දිනපතා සිය ගණනින් රෝගාතුර වන දෙවැනි වසංගත රැල්ල ආරම්භ වීමත් සමග කටුනායක නිදහස් වෙළෙඳ කලාපය සහ ඒ අවට බරපතල අවදානමක් පවතින බව පෙන්වා දෙන 'ඩාබිඳු සාමූහිකයේ' වැඩසටහන් සම්බන්ධීකාරිකා චමිලා තුෂාරි අවධාරණය කරන්නේ බ්‍රැන්ඩික්ස් ආයතනයට අනුබද්ධිත ආයතන හතරක් කටුනායක අවට පවතින බවයි.
පළමු රෝගියා වාර්තාවීමට පෙර මිනුවන්ගොඩ බ්‍රැන්ඩික්ස් ආයතනයේ සේවකයන් අසනීප තත්වයන් මත පසුගිය දිනවල නිවාඩු ඉල්ලා සිටියද බලධාරීන් විසින් ඔවුන්ට නිවාඩු ලබා දී නොමැති බව පවසන චමිලා තුෂාරි වැඩි දුරටත් පෙන්වා දෙන්නේ පසුගිය බ්‍රහස්පතින්දා පොහොය දිනයත් සමග නිවාඩු ලබාගත් ඔවුන් ගම් බිම් බලා පිටත්ව ගොස් ඇත්තේ රෝග ලක්ෂණ සහිතවම බවයි.
''පළමු රෝගියා වාර්තාවීමට පෙර මිනුවන්ගොඩ බ්‍රැන්ඩික්ස් ආයතනයේ සේවකයන් අසනීප තත්වයන් මත පසුගිය දිනවල නිවාඩු ඉල්ලා සිටියද බලධාරීන් විසින් ඔවුන්ට නිවාඩු ලබා දී නොමැති බව පවසන චමිලා තුෂාරි වැඩි දුරටත් පෙන්වා දෙන්නේ පසුගිය බ්‍රහස්පතින්දා පොහොය දිනයත් සමග නිවාඩු ලබාගත් ඔවුන් ගම් බිම් බලා පිටත්ව ගොස් ඇත්තේ රෝග ලක්ෂණ සහිතවම බවයි.''
සමාගමේ අනිකුත් ආයතන
මිනුවන්ගොඩ බ්‍රැන්ඩික්ස් ආයතනයේ මානව සම්පත් අංශයේ සේවයේ නිරත වුවන්ටත් මේ වන විට වෛරසය ආසාදනය වී ඇති බව පෙන්වා දෙන ඇය අවධාරණය කරන්නේ මෑන් පවර් ක්‍රමය හරහා සේවයට ගන්නා සේවකයන් බ්‍රැන්ඩික්ස් ආයතනයට අනුබද්ධ ආයතන කිහිපයේම සේවයට යොදවන බැවින් එම ආයතනද අවදානම් තත්වයට මුහුණ දී සිටින බවයි.
"අද මිනුවන්ගොඩ නම් හෙට කටුනායක, ඊලග දවසේ සීදුව, ඒකල හා වැලිසරට යොමු වෙලා තියනවා ඒ ගොල්ලෝ. ඒ වගේම තමයි මානව සම්පත් අංශයත් මේ ෆැක්ටරි හතරෙම තමන්ගේ රාජකාරි සදහා යොමු වෙලා තියනවා. "
බිරිද සහ සැමියා බ්‍රැන්ඩික්ස් ආයතනයේ ශාඛා දෙකක සේවයේ නිරත අවස්ථාද පවතින බව පෙන්වා දෙන 'ඩාබිඳු සාමූහිකයේ' වැඩසටහන් සම්බන්ධීකාරිකා චමිලා තුෂාරි එහිදී මතුවිය හැකි අවදානමද පෙන්වා දෙයි.
"ඒ වගේම තමයි තවත් ඉන්නවා මේ මොහොත වෙද්දී, විවාහ වෙච්ච අය. විවාහ වෙලා එයාගේ හස්බන්ඩ් මිනුවන්ගොඩ බ්‍රැන්ඩික්ස් එකේ වැඩ කරන්නේ. වයිෆ් වැඩ කරන්නේ කටුනායක බ්‍රැන්ඩික්ස් එකේ. එතකොට ඒ දෙන්නා ජීවත් වෙන්නේ එකට. එතකොට තවත් පැත්තකින් අවදානමක් තියනවා. "
මෙවැනි තත්වයක් යටතේ කටුනායක නිදහස් වෙලද කළාපයේ සේවයේ නිරත කම්කරුවන් රාජකාරි සදහා වාර්තා කිරීමට දැඩි බියක් දක්වද්දී ඔවුන්ට නිවාඩු ලබා නොදී බලධාරීන් බලහත්කාරයෙන් වැඩ ගන්නා බව චමිලා තුෂාරි පවසන්නීය.
'' මෙවැනි තත්වයක් යටතේ කටුනායක නිදහස් වෙලද කළාපයේ සේවයේ නිරත කම්කරුවන් රාජකාරි සදහා වාර්තා කිරීමට දැඩි බියක් දක්වද්දී ඔවුන්ට නිවාඩු ලබා නොදී බලධාරීන් බලහත්කාරයෙන් වැඩ ගන්නා බව චමිලා තුෂාරි පවසන්නීය.''
වසංගත රෝග ඒකකයේ අධ්‍යක්ෂ විශේෂඥ වෛද්‍ය සුදත් සමරවීර පවසන්නේ මිනුවන්ගොඩ කොවිඩ් පොකුරේ පළමු රෝගියා බ්‍රැන්ඩික්ස් ආයතනයෙන් පළමුව හදුනාගත් කාන්තාව නොවන අතර ඇය අතරමැදියෙක් විය හැකි බවයි.
රෝගීන් අටසිය ගණනක් අතුරින් පළමු රෝගියා සෙවීම දුෂ්කර කර්තව්‍යයක් බව අවධාරණය කරන ඔහු කොළඹදී පැවැති මාධ්‍ය හමුවකදී පෙන්වා දී තිබුනේ මෙම කොවිඩ් පොකුරෙන් අනුරාධපුර, බදුල්ල, ගාල්ල, කුරුණෑගල, මොනරාගල, පුත්තලම, කෑගල්ල, කලුතර, නුවර, මාතර, පොළොන්නරුව, යාපනය හා රත්නපුර ආදී දිස්ත්‍රික්ක වලින් මේ වන විට රෝගීන් හමුවී ඇති බවයි.
මිනුවන්ගොඩ බ්‍රැන්ඩික්ස් ආයතනයෙන් පළමු රෝගියා හමුවීමෙන් අනතුරුව කාසල් රෝහල, සීදුව බ්‍රැන්ඩික්ස් ආයතනය, එයිට්කන් ස්පෙන්ස් ආයතනය, ගම්පහ මහ රෝහල, මිනුවන්ගොඩ කොමර්ෂල් ලීසිං ආයතනය, ICBT පුද්ගලික විශ්ව විද්‍යාලය, ශාන්ත ජෝසප් විද්‍යාලය, ශාන්ත බ්‍රිජට් විද්‍යාලය, කොළඹ මහ නගර සභාව, පාර්ලිමේන්තු කටයුතු අමාත්‍යාංශය, කටුනායක ගුවන් තොටුපල හා හලාවත මහ රෝහල ආශ්‍රිතව තවත් ආසාදිතයන් හඳුනාගෙන තිබේ.
මිනුවන්ගොඩ කෝවිඩ් ආසාදිත පොකුරෙහි ඇතැමුන් රෝග ලක්ෂණ පෙන්නුම් කළද බහුතරයක් රෝග ලක්ෂණ නොපෙන්වන බව පවසන විශේෂඥ වෛද්‍ය සුදත් සමරවීර මෙම පොකුරෙහි විශේෂත්වයක් ලෙස පෙන්වා දෙන්නේ මීට පෙර හමුවූ පොකුරු වලට සාපේක්ෂව, එම පී සී ආර් පරීක්ෂණ දත්ත වලට වඩා මෙම පොකුර තුළ ආසාදිතයන්ගේ වෛරස් ප්‍රමාණය වැඩි අගයක් ගන්නා බවයි.
රෝගීන් අලුත් වීම සහ වෛරසයේ හැසිරීමෙහි වෙනසක් හේතුවෙන් වෛරසයේ වැඩි ප්‍රමාණයක් කෙනෙකුගේ ශරීරයෙහි පැවතිය හැකි බවට වසංගත රෝග ඒකකයේ අධ්‍යක්ෂ විශේෂඥ වෛද්‍ය සුදත් සමරවීර බිය පළ කරයි.
සබැඳි පුවත් :
බ්‍රැන්ඩික්ස් කොරෝනා පොකුරෙන් හෙළිවන "නූතන වහල් සේවය"
කොරෝනා පුපුරායාම: රාජපක්ෂ ආන්ඩුවේ සහ ධනපති සමාගම්වල සාපරාධීභාවයේ නිර්මිතයක් - පානිනී විජේසිරිවර්ධන
බ්‍රැන්ඩික්ස් කම්හලේ ආරක්ෂන ක්‍රමවේදයන් තිබී නැහැ - කම්කරුවෝ කියති
