නීතිමය පසුබිම සහ ක්‍රියාත්මක වන ප්‍රධාන ක්ෂේත්‍ර
දේශීය ආදායම් (සංශෝධන) පනතේ ප්‍රතිපාදනවලට අනුව, දෛනික ජනජීවිතයට මෙන්ම ව්‍යාපාරික කටයුතුවලට අදාළ වන ප්‍රධාන සේවා අටක් වෙනුවෙන් මෙම රෙගුලාසිය ක්‍රියාත්මක වේ.
අදාළ නීතිමය විධිවිධාන යටතේ නිලධාරීන් විසින් TIN සහතිකය පරීක්ෂා කර තහවුරු කරගත යුතු සේවාවන් අට මෙසේය:
1- ඕනෑම බැංකුවක හෝ පිළිගත් මූල්‍ය ආයතනයක නව ගිණුමක් විවෘත කිරීම
2- ක්‍රෙඩිට් කාඩ්පතක් (ණයපත්) ලබාගැනීම
3- පළාත් පාලන ආයතන මගින් ගොඩනැගිලි සැලසුම් අනුමත කරවාගැනීම
4- මෝටර් රථ ප්‍රවාහන දෙපාර්තමේන්තුව හරහා වාහනයක් ලියාපදිංචි කිරීම
5- වාර්ෂික වාහන ආදායම් බලපත්‍රය අලුත් කිරීම
6- ඉඩම් හෝ ඉඩම් හිමිකම් ඔප්පුවක් ලියාපදිංචි කිරීම
7- ප්‍රාදේශීය ලේකම් කාර්යාල හරහා නව ව්‍යාපාරයක් ලියාපදිංචි කිරීම
8- මෙරට ලියාපදිංචි සමාගමක කොටස් පැවරීම (පවරන්නා සහ ලබන්නා යන දෙපාර්ශවයම)
මෙම ලේඛනය ඉදිරිපත් නොකරන කිසිදු ගනුදෙනුකරුවෙකුගේ ඉල්ලීමක් සම්පූර්ණ නොකරන ලෙස අදාළ බැංකු, මූල්‍ය ආයතන සහ රාජ්‍ය නිලධාරීන්ට දැඩි උපදෙස් ලබාදී ඇත.
ලියාපදිංචිය කාටද අදාළ වෙන්නේ? බදු ගෙවිය යුතුමද?
2023 මැයි මස නිකුත් කෙරුණු අංක 2334/21 දරන අතිවිශේෂ ගැසට් පත්‍රය අනුව වයස අවුරුදු 18 සම්පූර්ණ වූ සෑම පුරවැසියෙකුටම මෙම අංකය ලබාගැනීම අනිවාර්ය නීතියකි.
2023 දෙසැම්බර් 31 වන විට වයස අවුරුදු 18 සපිරුණු සියලු දෙනාට මෙන්ම, 2024 ජනවාරි 1 වනදායින් පසු වයස 18 පිරුණු සහ ඉදිරියේදී සපිරෙන ඕනෑම තරුණ තරුණියකටද මෙය අදාළ වේ.
මෙහිදී සැලකිය යුතු ප්‍රධාන කරුණක් වන්නේ, TIN අංකයක් හිමි වූ පමණින්ම සෑම අයෙකුම රජයට ආදායම් බදු ගෙවිය යුතු නොවීමයි. නීතියෙන් නියම කර ඇති බදු නිදහස් ආදායම් සීමාව ඉක්මවා නොයන සාමාන්‍ය වැටුප් ලබන්නන් හෝ ආදායම් නොලබන පුද්ගලයන් බදු ගෙවීමෙන් නිදහස් වන අතර, මෙහි මූලික අරමුණ වන්නේ රටේ විධිමත් මූල්‍ය දත්ත පද්ධතියක් ගොඩනැගීම පමණි.
සහතිකය නැතිනම් ගත හැකි විකල්ප ඩිජිටල් පියවර
නිල TIN සහතිකය තැපෑලෙන් හෝ අතට ලැබී නොමැති පුද්ගලයින්ට ඒ වෙනුවට භාවිත කළ හැකි කඩිනම් ඩිජිටල් විසඳුමක් දෙපාර්තමේන්තුව සකස් කර දී ඇත.
දේශීය ආදායම් දෙපාර්තමේන්තුවේ නිල e-Services වෙබ් අඩවියට (eservices.ird.gov.lk) පිවිස, තම ජාතික හැඳුනුම්පත් අංකය ඇතුළත් කර ලියාපදිංචිය තහවුරු කරගත හැකිය.
එහිදී තිරයේ දිස්වන, හැඳුනුම්පත් අංකය සහ TIN අංකය පැහැදිලිව සඳහන් ප්‍රතිඵල පිටුවේ මුද්‍රිත පිටපතක් (Verification Printout) ඉදිරිපත් කිරීමෙන්ද ඉහත ගනුදෙනු බාධාවකින් තොරව කරගැනීමට නීතිමය අවසරය හිමිවේ.
අනවශ්‍ය ප්‍රමාදයන් වළක්වා ගැනීමට සූදානම් වන්න
නොවැම්බර් මස ආරම්භයත් සමඟ බැංකු, පළාත් පාලන ආයතන, ප්‍රාදේශීය ලේකම් කාර්යාල හෝ මෝටර් රථ ප්‍රවාහන දෙපාර්තමේන්තුව වෙත යන පාඨකයින් තම TIN සහතිකය හෝ අදාළ මුද්‍රිත පිටපත ළඟ තබා ගැනීම අත්‍යවශ්‍ය වේ.
තවමත් ලියාපදිංචි වී නොමැති නම්, දෙපාර්තමේන්තු පරිශ්‍ර වෙත පෞද්ගලිකව නොගොස් නිල වෙබ් අඩවිය ඔස්සේ මාර්ගගතව (Online) අයදුම්පත් යොමු කර මිනිත්තු කිහිපයකින් ලියාපදිංචි වීමට අවස්ථාව පවතී.
ගනුදෙනු කිරීමේදී සිදුවිය හැකි අනවශ්‍ය ප්‍රමාදයන් සහ අපහසුතා වළක්වා ගැනීම සඳහා කල්වේලා ඇතිව මෙම ලියකියවිලි සූදානම් කරගන්නා ලෙස දේශීය ආදායම් කොමසාරිස් ජනරාල්වරයා මහජනතාවගෙන් ඉල්ලා සිටියි.
වැඩිදුර තොරතුරු සහ නිල සබැඳිය :
දේශීය ආදායම් දෙපාර්තමේන්තුවේ නිල e-Services පිවිසුම