*අඩු ආදායම්ලාභී පවුල් 2,000කට ලබන වසරේදී විශේෂ නිවාස ආධාර ලබාදීමේ වැඩපිළිවෙළක්
පසුගිය රජයන් සමයේ විවිධ හේතූන් මත අඩක් නිමකර අතහැර දමා තිබූ නිවාස 5,000කට ආසන්න සංඛ්‍යාවක් නැවත ඉදිකර අවසන් කිරීම සඳහා රජය සැලසුම් කර තිබේ. වාසයට සුදුසු මට්ටමේ පවතින සක්‍රීය නිවාස ව්‍යාපෘති හඳුනාගෙන, ඒවායේ වැඩ අවසන් කිරීම සඳහා අවශ්‍ය ප්‍රතිපාදන ඉදිරි 2027 අයවැය මගින් වෙන්කිරීමට අපේක්ෂා කරන බව නිවාස, ඉදි කිරීම් සහ ජල සම්පාදන අමාත්‍ය ආචාර්ය සුසිල් රණසිංහ ප්‍රකාශ කළේය.
පාර්ලිමේන්තුවේදී පැවැති නිවාස, ඉදි කිරීම් සහ ජල සම්පාදන කටයුතු පිළිබඳ අමාත්‍යාංශයීය උපදේශක කාරක සභාවේදී අමාත්‍යවරයා මේ බව සඳහන් කළේය. පසුගිය වසරවල ආරම්භ කරන ලද ඇතැම් නිවාස ව්‍යාපෘති සඳහා වෙන්කළ ණය සහ අනුග්‍රහක අරමුදල් පූර්ණ වශයෙන් නිදහස් නොකිරීම හේතුවෙන් ඒවා අතරමග නතර වී තිබූ බව හෙතෙම පෙන්වා දුන්නේය.
පස්පුද්ගල කමිටුව සහ අධ්‍යයන ක්‍රියාවලිය
මෙලෙස අතහැර දමා ඇති නිවාස ව්‍යාපෘතිවල වත්මන් තත්ත්වය නිරීක්ෂණය කර පදංචි වීමට සුදුසු මට්ටමේ පවතින නිවාස වෙන්කර හඳුනා ගැනීම සඳහා අමාත්‍යාංශයේ හිටපු ලේකම්වරුන් දෙදෙනෙකුගේ සහභාගීත්වයෙන් යුත් පස්පුද්ගල විශේෂ කමිටුවක් පත් කර ඇත.
අදාළ ව්‍යාපෘතිවල තොරතුරු රැස්කිරීම, ව්‍යුහාත්මක ලෙස ශක්තිමත් නිවාස හඳුනාගැනීම සහ ඒවායේ ඉතිරි වැඩ නිමකිරීමට ගතයුතු ක්‍රියාමාර්ග ඇතුළත් වාර්තාවක් සකස් කිරීමේ කටයුතු අදාළ කමිටුව විසින් මේ වන විටත් ආරම්භ කර තිබේ. එම කමිටු වාර්තාව ලැබුණු පසු අතහැර දැමූ ව්‍යාපෘතිවල ඉදිරි කටයුතු පිළිබඳ පූර්ණ තීරණ ගන්නා බව අමාත්‍යවරයා වැඩිදුරටත් පැවසීය.
අඩු ආදායම්ලාභීන්ට සහනයක් සහ කොළඹ නිවාස ගැටලුව
මීට අමතරව, අඩක් ඉදිකර ඇති සිය නිවාසවල ඉතිරි වැඩ නිමකර ගැනීමට නොහැකිව අසරණ වී සිටින පවුල් සඳහා ලබන වසරේ සිට විශේෂ මූල්‍ය හා ද්‍රව්‍යමය ආධාර ලබාදීමට ද අමාත්‍යාංශය සැලසුම් කර ඇත. මෙම වැඩසටහන යටතේ පවුල් 2,000කට ආසන්න සංඛ්‍යාවකට සෘජු ප්‍රතිලාභ හිමිවනු ඇතැයි අපේක්ෂා කෙරේ.
මේ අතර, උපදේශක කාරක සභා රැස්වීමට එක්වූ පාර්ලිමේන්තු මන්ත්‍රීවරුන් කිහිපදෙනෙකුම සිය බලප්‍රදේශවල පවතින නිවාස සහ ජල සම්පාදන ගැටලු පිළිබඳව අමාත්‍යවරයාගේ අවධානය යොමු කළහ. කොළඹ දිස්ත්‍රික්කයේ අඩු ආදායම්ලාභී පවුල්වල නිවාස ගැටලුව ඇතුළු ක්ෂේත්‍රයේ සියලු ගැටලු විසඳීම වෙනුවෙන් අදාළ පාර්ශ්වකරුවන්ගේ සහභාගීත්වයෙන් ඉදිරියේදී විශේෂ සාකච්ඡාවක් පැවැත්වීමට ද අමාත්‍යාංශය පියවර ගෙන තිබේ.
