ගිනිඅවි 301ක්, පතුරම් 1800ක් සහ DVD තැටි 32ක් ඇතුළු නඩු භාණ්ඩ තොගයක් අධිකරණයට; පුද්ගලයන් 1,608කගෙන් ප්‍රකාශ සටහන්
ප්‍රධාන ජේලර්ගේ සාක්ෂිය සහ මාධ්‍ය තහනම
මීගමුව බන්ධනාගාරය තුළ සිදු වූ ලේවැකි ගැටුම සම්බන්ධයෙන් වන නඩුකරය මීගමුව ප්‍රධාන මහේස්ත්‍රාත් සීලනී පෙරේරා හමුවේ කැඳවූ අවස්ථාවේදී, සිද්ධිය වූ අවස්ථාවේ එහි ප්‍රධාන ජේලර් ලෙස කටයුතු කළ වික්‍රම ජයන්ත කුමාර පැය 2ක කාලයක් රහසිගත සාක්ෂි ලබා දී තිබේ.
අපරාධ පරීක්ෂණ දෙපාර්තමේන්තුවේ සාක්ෂි මෙහෙයවීම මත ලබා දුන් එම සාක්ෂිය තුළ ජාතික ආරක්ෂාවට අදාළ අතිශය සංවේදී තොරතුරු අන්තර්ගත වන බැවින්, එහි කිසිදු කරුණක් මාධ්‍ය ඔස්සේ පළ නොකරන ලෙස මහේස්ත්‍රාත්වරිය නියෝග කළාය. එම තොරතුරු ප්‍රකාශයට පත් වීමෙන් රටේ ජාතික ආරක්ෂාව බරපතළ අවදානමකට ලක්විය හැකි බව පෙන්වා දුන් මහේස්ත්‍රාත්වරිය, අදාළ සාක්ෂි සම්පිණ්ඩනය සුරක්ෂිතව අධිකරණ සේප්පුවේ තැන්පත් කිරීමට පියවර ගත්තාය.
5 වන සැකරු හඳුනාගැනීමේ පෙරෙට්ටුවට සහ රක්ෂිත බන්ධනාගාරගත කිරීම
32 දෙදෙනෙකුට මරණය කැඳවූ මෙම ගැටුම සම්බන්ධයෙන් තවත් සැකකරුවෙකු නම් කිරීමට අපරාධ පරීක්ෂණ දෙපාර්තමේන්තුව කළ ඉල්ලීමට අධිකරණ අවසරය හිමි විය. ඒ අනුව, සිද්ධිය වන අවස්ථාවේ බන්ධනාගාරය තුළ සිටි අංක 3163 දරන පල්ලේගමගේ දිනුක ලක්මාල් හෙවත් 'ලැම්බා' නමැති රැඳවියා 5 වන සැකකරු ලෙස නම් කෙරිණි.
පල්ලන්සේන බන්ධනාගාරයේ රඳවා සිටි අදාළ සැකකරු එදිනම පස්වරුවේ අධිකරණයට ඉදිරිපත් කිරීමෙන් අනතුරුව, ලබන අගෝස්තු 07 වන දින හඳුනාගැනීමේ පෙරෙට්ටුවකට ඉදිරිපත් කිරීමට නියෝග කෙරුණු අතර එදින දක්වා ඔහු රක්ෂිත බන්ධනාගාරගත කෙරිණි.
විමර්ශන ප්‍රගතිය, නඩු භාණ්ඩ සහ නීතිමය පියවර
නඩුවේ වැඩිදුර විමර්ශන වාර්තාව ඉදිරිපත් කරමින් අපරාධ පරීක්ෂණ දෙපාර්තමේන්තුව සදහන් කළේ, සිද්ධිය සම්බන්ධයෙන් බන්ධනාගාර නිලධාරීන්, රැඳවියන්, විශේෂ කාර්ය බලකා නිලධාරීන් සහ සිවිල් වැසියන් ඇතුළු පුද්ගලයන් 1,608 දෙනෙකුගෙන් මේ වන විට ප්‍රකාශ සටහන් කරගෙන ඇති බවයි.
එමෙන්ම, විශේෂ කාර්ය බළකා නිලධාරීන් සිද්ධිය වූ දින භාවිත කළ ගිනි අවි 301ක්, පතුරම් 1800ක්, මැගසින් 9ක්, ඡායාරූප අඩංගු DVD තැටි 32ක් සහ මියගිය අයගේ ඇඳුම් පැළඳුම් අධිකරණයට නඩු භාණ්ඩ ලෙස භාර දෙන ලදී. බන්ධනාගාර රෝහලට සිදු වූ අලාභය සම්බන්ධයෙන් සෞඛ්‍ය සේවා අධ්‍යක්ෂ ජනරාල්වරයා ලවා තක්සේරුවක් ලබා ගැනීමටද නියෝග කෙරිණි.
සැකකරුවන්ට එරෙහිව මිනීමැරුම්, ගිනිඅවි පනත සහ පොදු දේපළ පනත යටතේ නඩු පැවරීමට කටයුතු කරන බව පෙන්වා දුන් අපරාධ පරීක්ෂණ දෙපාර්තමේන්තුව, අදාළ නඩු භාණ්ඩ සම්බන්ධයෙන් රජයේ රස පරීක්ෂක වාර්තා ලබා ගැනීමට නියමිත බවද අධිකරණයට දැනුම් දුන්නේය.
