පළාත් පාලන බලප්‍රදේශය, ඡන්ද අයිතිය සහ මහනගර සභා සේවාවන්හි ගාස්තු අයකර ගැනීම සම්බන්ධයෙන් පවතින නීතිමය ගැටලු හෙළිවෙයි
ක්‍රමෝපායික සංවර්ධන කාරක සභාව හමුවේ හෙළිවූ තොරතුරු
කොළඹ වරාය නගරය (Port City Colombo) විදේශීය ආයෝජන ආකර්ෂණය කරගන්නා ජාත්‍යන්තර මූල්‍ය හා වාණිජ මධ්‍යස්ථානයක් ලෙස ප්‍රචාරය කෙරුණද, එහි සමස්ත ඉඩම් ප්‍රමාණයෙන් 51%ක්ම වෙන් කර ඇත්තේ නේවාසික (Residential) කටයුතු සඳහා බව හෙළි වී තිබේ.
පාර්ලිමේන්තු මන්ත්‍රී එස්.එම්. මරික්කාර් ගේ සභාපතිත්වයෙන් රැස්වූ යටිතල පහසුකම් සහ ක්‍රමෝපායික සංවර්ධනය පිළිබඳ පාර්ලිමේන්තු රංග සභා කාරක සභාව (Sectoral Oversight Committee) හමුවේ කොළඹ වරාය නගර ආර්ථික කොමිෂන් සභාවේ නිලධාරීන් කරුණු දක්වමින් මේ බව තහවුරු කර ඇත. නේවාසික සංවර්ධනය මුල සිටම සැලැස්මේ පැවති බව නිලධාරීන් ප්‍රකාශ කළද, ප්‍රචාරණ උපායමාර්ග හේතුවෙන් මෙය සෘජුවම වාණිජ මධ්‍යස්ථානයක් පමණක්ය යන මතය සමාජය තුළ ගොඩනැගී තිබූ බව ඔවුහු පිළිගෙන තිබේ.
කොළඹ වරාය නගරයේ පාලන හා සංවර්ධන රාමුව
| ඉඩම් වෙන්කිරීමේ ප්‍රතිශතය: සමස්ත භූමි ප්‍රමාණයෙන් 51%ක් නේවාසික/කොන්ඩෝමිනියම් කලාප ලෙස
| පරිපාලන අධිකාරිය: කොළඹ කොටුව 120 ග්‍රාම නිලධාරී වසමට අයත් වුවද කොළඹ මහනගර සභාවට (CMC) අයත් නොවේ
| පවතින ගැටලු: අනාගත පදිංචිකරුවන්ගේ පළාත් පාලන ඡන්ද අයිතිය සහ නීතිමය රාමුව අවිනිශ්චිත වීම
| නගර සභා සේවාවන්: කැලිකසල, අපද්‍රව්‍ය බැහැර කිරීම සහ ගිනි නිවීමේ සේවා සඳහා පිරිවැයට වඩා ලාභ ලබන ගාස්තු ක්‍රමවේදයක්
| ආයෝජන අපේක්ෂාව: වසර තුළ ඇමරිකානු ඩොලර් මිලියන 700ක සෘජු විදේශ ආයෝජන (FDI) ඉලක්කයක්
පළාත් පාලන බල ප්‍රදේශය, ඡන්ද අයිතිය සහ මහජන සේවා
කොළඹ කොටුව 120 ග්‍රාම නිලධාරී වසම තුළ පිහිටා තිබුණද, වරාය නගර භූමිය කොළඹ මහනගර සභාවේ (CMC) බල ප්‍රදේශයට අයත් නොවන බව කාරක සභාව හමුවේ අනාවරණය විය.
මේ හේතුවෙන් එහි පදිංචි වන අනාගත වැසියන්ගේ පළාත් පාලන ඡන්ද අයිතිය ක්‍රියාත්මක වන ආකාරය සහ ඔවුන් අදාළ වන පරිපාලන ව්‍යුහය පිළිබඳව කාරක සභා සභාපති එස්.එම්. මරික්කාර් ප්‍රශ්න කළේය. පදිංචිකරුවන්ට පළාත් පාලන මැතිවරණවලදී ඡන්ද අයිතිය හිමිවන්නේද නැද්ද යන්න පිළිබඳව සෘජු පිළිතුරක් ලබාදීමට අපොහොසත් වූ කොමිෂන් සභාවේ නිලධාරීන්, ඒ පිළිබඳව ඉදිරියේදී පැහැදිලි වාර්තාවක් ලබාදෙන බව සඳහන් කළහ.
මීට අමතරව, කොළඹ මහනගර සභාව මගින් සැපයෙන කැලිකසල ඉවත් කිරීම, අපද්‍රව්‍ය කළමනාකරණය සහ ගිනි නිවීමේ සේවා වැනි අත්‍යවශ්‍ය නගර සභා සේවාවන් වරාය නගරයට ලබාදීමේදී අයකරන ගාස්තු ක්‍රමවේදය පිළිබඳවද කාරක සභාවේ අවධානය යොමු විය. කොළඹ නගරයේ වෙසෙන බහුතරයක් සාමාන්‍ය ජනතාවගේ ආර්ථික තත්ත්වය සැලකිල්ලට ගනිමින්, වරාය නගරයේ අපද්‍රව්‍ය බැහැර කිරීම වැනි සේවාවන් සඳහා අයකරනු ලබන ගාස්තු හුදෙක් පිරිවැය පියවා ගැනීමට පමණක් සීමා නොවී මහනගර සභාවට ලාභයක් ලබගත හැකි ආකාරයෙන් සකස් විය යුතු බව සභාපතිවරයා පෙන්වා දුන්නේය.
ආයෝජන ඉලක්ක සහ ඉදිරි නීතිමය විගණනය
විශේෂ ආර්ථික කලාප (SEZ) නීතිමය රාමුව යටතේ විදේශීය ආයෝජකයන් සහ අධි-ආදායම්ලාභීන් ආකර්ෂණය කරගැනීමේ මූලික අරමුණින් මෙම ව්‍යාපෘතිය ක්‍රියාත්මක වේ. වත්මන් වසර තුළ පමණක් ඇමරිකානු ඩොලර් මිලියන 700ක පමණ සෘජු විදේශ ආයෝජන (FDI) ගෙන ඒමට අපේක්ෂා කරන බව නිලධාරීන් ප්‍රකාශ කළද, ඊට අදාළ නිශ්චිත ආයෝජන සැලසුම්වල (Investment Pipeline) සම්පූර්ණ තොරතුරු කාරක සභාව හමුවේ ඉදිරිපත් කිරීමට ඔවුන්ට හැකි වූයේ නැත.
විශාල නේවාසික ප්‍රජාවක් ගොඩනැගෙන නගරයක් බවට පත්වෙමින් පවතින පසුබිමක, එහි පාලන ව්‍යුහය, සේවා සැපයීම, නීතිමය වගවීම සහ ජනතාවගේ දේශපාලන අයිතිවාසිකම් පිළිබඳ තීරණාත්මක කරුණු පැහැදිලි කරමින් කාරක සභාව වෙත විධිමත් වාර්තාවක් සපයන ලෙස කාරක සභාව විසින් උපදෙස් ලබාදී ඇත.
මුලාශ්‍රය :
Port City’s Residential Reality Raises Questions Over Governance
