ශ්‍රී ලංකාවේ හිටපු ජනාධිපතිවරයකු මෙන්ම දශක ගණනාවක් රට වෙනුවෙන් සුවිශේෂී සේවාවක් ඉටුකළ නන්දසේන ගෝඨාභය රාජපක්ෂ ගේ 77 වැනි උපන්දිනය අදට (20) යෙදී තිබේ.
1949 ජූනි 20 වැනිදා උපත ලැබූ ඔහු සිය උපන්දිනය සමරන මේ මොහොතේ, ඔහු වටා යළිත් වරක් දැඩි දේශපාලන කුණාටුවක් නිර්මාණය වෙමින් පවතින බව දේශපාලන ආරංචි මාර්ග සඳහන් කරයි.
අත්අඩංගුවට ගැනීමේ සූදානමක්?
දේශපාලන කරළියේ අභ්‍යන්තර ආරංචි මාර්ගවලට අනුව, හිටපු ජනාධිපතිවරයාව නුදුරේදීම අත්අඩංගුවට ගැනීම සඳහා පසුබිම සකස් වෙමින් පවතී. ජනප්‍රිය නායකයකු ලෙස තවමත් සමාජයේ පවතින බලපෑම සහ දේශපාලන ස්ථාවරත්වය ඉලක්ක කරගනිමින්, මෙම ක්‍රියාවලිය පිටුපස දැඩි දේශපාලන න්‍යාය පත්‍රයක් ක්‍රියාත්මක වන බව විශ්ලේෂකයෝ පෙන්වා දෙති.
මේ අතර, ජනතා විමුක්ති පෙරමුණට (ජවිපෙ) හිතවත් "ලංකා ටෘත්" වෙබ් අඩවිය අද දිනයේ විශේෂ වාර්තාවක් පළ කරමින් හිටපු ජනාධිපතිවරයාට එරෙහිව පවතින නීතිමය ක්‍රියාමාර්ග සහ පැරණි චෝදනා යළි කරළියට ගෙනවිත් ඇත.
චෝදනාවේ ස්වභාවය:
මහජන මුදල් වැය කර දෙමාපියන්ගේ සොහොන් කොත් ඉදිකිරීමේ සිද්ධියට අදාළව ගෝඨාභය රාජපක්ෂ ට එරෙහිව ඇති චෝදනා එහි ප්‍රධාන කොට දක්වා තිබේ.
අධිකරණය මඟහැරීමේ චෝදනා:
2016 සහ 2019 අතර කාලසීමාවේදී ඔහු අවස්ථා 15කට වැඩි වාර ගණනක් විවිධ හේතු දක්වමින් අධිකරණය හමුවේ පෙනී සිටීම මඟහැර ඇති බව එම වෙබ් අඩවිය ප්‍රකාශ කරයි.
ගෝඨාභය රාජපක්ෂ යනු එල්.ටී.ටී.ඊ. සංවිධානය යුධමය වශයෙන් පරාජය කිරීම සඳහා ආරක්ෂක ලේකම්වරයා ලෙස ඍජු ලෙස නායකත්වයක් දුන් කෙනෙකි. එවැනි තත්වයක් තුල පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් ඔහුට එරෙහිව සිදුකරන විමර්ශන පිළිබඳව ජනතාවගේ විශේෂ අවදානයක් යොමුව පවතී.
