කෘත්‍රිම බුද්ධිය (AI) සහ ඩිජිටල් තාක්ෂණය කොතරම් වේගයෙන් සෞඛ්‍ය ක්ෂේත්‍රය ආක්‍රමණය කළද, වෛද්‍යවරයා සහ රෝගියා අතර පවතින මානුෂීය බැඳීම කිසිසේත්ම තාක්ෂණයෙන් ආදේශ කළ නොහැකි බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස අවධාරණය කරයි.
ශ්‍රී ලංකාවේ පවුලේ වෛද්‍යවරුන්ගේ විද්‍යායතනය (CGPSL) විසින් සංවිධානය කරන ලද ‘GP Sri Lanka ’26’ 51 වැනි වාර්ෂික අධ්‍යයන සැසියේ ප්‍රධාන ආරාධිතයා ලෙස ඊයේ (19) එක්වෙමින් අමාත්‍යවරයා මේ බව කියා සිටියේය.
ලෝකය පුරා ජනගහනය වයස්ගත වීම, බෝ නොවන නිදන්ගත රෝග (NCDs) ඉහළ යාම සහ මානසික සෞඛ්‍ය ගැටලු බහුල වීම හමුවේ සමස්ත රෝහල් පද්ධතියම දැඩි පීඩනයකට ලක්ව ඇත. මෙම අර්බුදයට ඇති එකම විසඳුම තාක්ෂණයට වැඳ වැටීම නොව, ගම් මට්ටමින් ක්‍රියාත්මක වන ප්‍රාථමික සෞඛ්‍ය සේවාව සහ පවුලේ වෛද්‍ය (GP) ක්‍රමය ශක්තිමත් කිරීම පමණක් බව අමාත්‍යවරයා පෙන්වා දෙයි.
අමාත්‍යවරයාගේ කතාවේ ප්‍රධාන කරුණු 3ක්...
තාක්ෂණය මෙවලමක් පමණි:
ඩිජිටල් තාක්ෂණයෙන් රෝග විනිශ්චය සහ තීරණ ගැනීම වේගවත් කළ හැකි වුවත්, පරම්පරා ගණනාවක් තිස්සේ ගොඩනැඟුණු වෛද්‍ය-රෝගී විශ්වාසය AI මඟින් ප්‍රතිස්ථාපනය කළ නොහැක.
රෝහල්වල තදබදය පාලනය:
රෝග වළක්වා ගැනීම, කල්තියා හඳුනාගැනීම සහ නිදන්ගත රෝග කළමනාකරණය සඳහා පවුලේ වෛද්‍යවරයා පෙරමුණ ගත යුතුය. සියලුම බර රෝහල් පද්ධතිය මත පැටවීම ප්‍රායෝගික නැත.
අභියෝගය:
වර්තමාන සෞඛ්‍ය ක්ෂේත්‍රයේ ලොකුම අභියෝගය සේවාවන් ඩිජිටල්කරණය කිරීම නොව, එම ඩිජිටල් තාක්ෂණය ඇතුළතත් කරුණාව සහ මානුෂීය ගුණාංග ආරක්ෂා කර ගැනීමයි.
ජාත්‍යන්තර අවධානය සහ ඇගයීම්
කොළඹ Grand Maitland හෝටලයේදී පැවැත්වුණු මෙවර සැසිවාරය සඳහා දේශීය මෙන්ම ජාත්‍යන්තර වෘත්තිකයන් රැසක් එක්ව සිටියහ.
විශේෂ දේශන:
ඕස්ට්‍රේලියාවේ Royal Australian College of General Practitioners (RACGP) හි ජාතික සභාපති Dr. Michael Wright සහ WONCA දකුණු ආසියානු කලාපීය සභාපති (නේපාලය) Dr. Pramendra Prasad Gupta මෙහිදී විශේෂ දේශන පැවැත්වූහ.
ගෞරව සම්මාන:
වෛද්‍ය එම්.පී.එම්. කුරේ අනුස්මරණ පදක්කම සහ ගෞරව සාමාජිකත්වයන් Dr. Michael Wright, Dr. Pramendra Prasad Gupta, විශේෂඥ වෛද්‍ය ලක්ෂ්මි සෝමතුංග සහ වෛද්‍ය රුවන් චන්දන සිල්වා වෙත පිරිනමන ලදී.
1969 දී ආරම්භ කරන ලද ශ්‍රී ලංකා පවුලේ වෛද්‍යවරුන්ගේ විද්‍යායතනය, පවුල් වෛද්‍ය විද්‍යාව ස්වාධීන අධ්‍යයන විෂයයක් ලෙස ප්‍රවර්ධනය කරමින් වසර 50කට වැඩි කාලයක් මෙරට ප්‍රාථමික සෞඛ්‍ය සේවාවේ උන්නතිය වෙනුවෙන් සුවිශේෂී කාර්යභාරයක් ඉටුකරයි.
