Set-Top Box මෙරටදීම හදන්න සැලසුම්: ජපාන - ශ්‍රී ලංකා ඩිජිටල් සහයෝගීතාව අලුත් වෙයි
ශ්‍රී ලංකාවේ ඩිජිටල් පරිවර්තනයට ජපානයෙන් පුළුල් තාක්ෂණික සහයෝගයක්
ශ්‍රී ලංකාවේ ඩිජිටල් පරිවර්තන ක්‍රියාවලිය සහ කෘතිම බුද්ධි (AI) තාක්ෂණ යටිතල පහසුකම් පුළුල් කිරීමේ අරමුණින් ශ්‍රී ලංකාව සහ ජපානය අතර විශේෂ ද්විපාර්ශ්වික සාකච්ඡාවක් ඩිජිටල් ආර්ථික අමාත්‍යාංශයේදී පැවැත්විණි.
ඩිජිටල් ආර්ථික නියෝජ්‍ය අමාත්‍ය ඉංජිනේරු එරංග වීරරත්න සහ ජපාන ජාත්‍යන්තර සහයෝගිතා නියෝජිතායතනයේ (JICA) ජ්‍යෙෂ්ඨ උප සභාපති හාරා ෂොහෙයි (Hara Shohei) ප්‍රමුඛ ජපන් නියෝජිත පිරිස අතර පැවති මෙම සාකච්ඡාවේදී ප්‍රධාන ක්ෂේත්‍ර දෙකක් කෙරෙහි විශේෂ අවධානය යොමු විය.
ඩිජිටල් රූපවාහිනී ව්‍යාපෘතිය කඩිනම් කිරීම සහ දේශීය නිෂ්පාදන ඉලක්ක
දීර්ඝ කාලයක් තිස්සේ ක්‍රියාත්මක වෙමින් පවතින ඩිජිටල් භෞමික රූපවාහිනී විකාශන (Digital Terrestrial Television Broadcasting - DTTB) ව්‍යාපෘතිය කඩිනමින් අවසන් කිරීමේ අවශ්‍යතාව සහ එහි පවතින ප්‍රායෝගික ගැටලු නිරාකරණය කරගැනීම පිළිබඳව මෙහිදී දීර්ඝ වශයෙන් සාකච්ඡා කෙරිණි.
විශේෂයෙන්ම, රූපවාහිනී ඩිජිටල්කරණයේදී මෙරට පාරිභෝගික ජනතාවට සංඥා ලබාගැනීම සඳහා අවශ්‍ය වන 'Set-Top Box' උපාංග ආනයනය මත පමණක් යැපීම අවම කිරීමට යෝජනා වී තිබේ. ඒ අනුව දේශීය කර්මාන්ත ක්ෂේත්‍රය නංවාලීම සහ විදේශ විනිමය ඉතිරි කරගැනීම අරමුණු කරගනිමින්, එම උපාංග මෙරටදීම නිෂ්පාදනය කිරීමේ ශක්‍යතාව පිළිබඳව ද දෙපාර්ශ්වය අතර විශේෂ අවධානයක් යොමු විය.
ජාතික AI දත්ත මධ්‍යස්ථානයක් සහ තාක්ෂණික හුවමාරුව
ශ්‍රී ලංකාවේ අනාගත කෘතිම බුද්ධි (AI) යටිතල පහසුකම් සංවර්ධනය වෙනුවෙන් ජාතික AI දත්ත මධ්‍යස්ථානයක් (National AI Data Centre) ස්ථාපිත කිරීමේ මූලික සැලසුම් සම්බන්ධයෙන් ද මෙහිදී අදහස් හුවමාරු කර ගැනිණි.
ඊට අමතරව,
| ශ්‍රී ලාංකේය අවශ්‍යතාවලට ගැළපෙන දේශීය AI විසඳුම් නිර්මාණය කිරීම,
| මෙරට වෘත්තිකයන් ඉලක්ක කරගත් තාක්ෂණික ධාරිතා සංවර්ධන හා පුහුණු වැඩසටහන් ක්‍රියාත්මක කිරීම,
| කෘතිම බුද්ධි ක්ෂේත්‍රයේ ජාත්‍යන්තර ප්‍රමිතීන් සහ නවීන තාක්ෂණික දැනුම හුවමාරු කරගැනීම,
යන කරුණු කෙරෙහි ද දෙපාර්ශ්වයේම එකඟතාව පළ විය.
ද්විපාර්ශ්වික සහයෝගීතාව තවදුරටත් ශක්තිමත් කෙරේ
ශ්‍රී ලංකාවේ තොරතුරු හා සන්නිවේදන තාක්ෂණ ක්ෂේත්‍රයේ යටිතල පහසුකම් නැංවීම වෙනුවෙන් ජපාන ජාත්‍යන්තර සහයෝගිතා නියෝජිතායතනය (JICA) ලබාදෙන අඛණ්ඩ තාක්ෂණික දායකත්වය මෙහිදී ඩිජිටල් ආර්ථික අමාත්‍යාංශයේ ඇගයීමට ලක්විය. දෙරට අතර පවතින දීර්ඝකාලීන මිත්‍රත්වය පෙරදැරි කරගනිමින් සැලසුම්ගත ව්‍යාපෘතීන් නියමිත කාලරාමුව තුළ නිම කිරීමට කටයුතු කරන බව නියෝජ්‍ය අමාත්‍යවරයා අවධාරණය කළේය.
මෙම සාකච්ඡා අවස්ථාවට ඩිජිටල් ආර්ථික අමාත්‍යාංශයේ ලේකම් වරුණ ශ්‍රී ධනපාල, ඩිජිටල් ආර්ථිකය පිළිබඳ ජනාධිපති ජ්‍යෙෂ්ඨ උපදේශක සහ GovTech සභාපති ආචාර්ය හාන්ස් විජයසූරිය මෙන්ම JICA ශ්‍රී ලංකා ප්‍රධාන නියෝජිත ෂිගෙකි හොන්සු (Shigeki Honshu) ඇතුළු දෙපාර්ශ්වයේ ජ්‍යෙෂ්ඨ නිලධාරීහු සහභාගී වූහ.
