අධිකරණයේ ස්වාධීනත්වය සහ විනිසුරුවරුන්ගේ රැකවරණය උදෙසා BASL විධායක කමිටුවේ විශේෂ සාකච්ඡාවක් ඉල්ලයි
අගවිනිසුරුවරයා ඉලක්ක කරගත් ප්‍රකාශ සහ නීතිඥ සංගමයේ කාර්යභාරය
විනිසුරුවරුන්ගේ විශ්‍රාම යෑමේ වයස් සීමාව දීර්ඝ කිරීම සඳහා වන 22 වැනි ආණ්ඩුක්‍රම ව්‍යවස්ථා සංශෝධන කෙටුම්පත සහ යෝජිත අධිකරණ සංවිධාන සංශෝධන පනත් කෙටුම්පත සම්බන්ධයෙන් පැවැත්වෙන සංවාදයන්හිදී, වර්තමාන අගවිනිසුරුවරයා පෞද්ගලිකව ඉලක්ක කරගනිමින් ඇතැම් පාර්ශ්වයන් ද්වේෂසහගත ප්‍රකාශ සිදු කිරීම පිළිබඳව ශ්‍රී ලංකා නීතිඥ සංගමයේ (BASL) අවධානය යොමු කරමින් සභාපති නීතිඥ රජීව් අමරසූරිය වෙත විශේෂ ලිපියක් යොමු කර තිබේ. නීතිඥ සංගමයේ විධායක කමිටු සාමාජික නීතිඥ ජගත් අබේනායක විසින් 2026 අගෝස්තු 10 වන දිනැතිව මෙම ලිපිය යොමු කර ඇත.
අදාළ සංශෝධන මගින් සමස්ත විනිසුරුවරුන්ගේම විශ්‍රාම වයස දීර්ඝ කිරීමට යෝජනා කර තිබියදී, ඇතැම් දේශපාලනඥයන් සහ පිරිස් මෙය වත්මන් අගවිනිසුරුවරයාට පමණක් ලබා දෙන සේවා දිගුවක් ලෙස අර්ථ දක්වමින් මහජනතාව සහ පූජ්‍ය පක්ෂය නොමඟ යවන සුළු ප්‍රචාරයන්හි නිරත වන බව අදාළ ලිපිය මගින් පෙන්වා දී තිබේ.
නීතිඥ ජගත් අබේනායක ගේ ලිපියට අදාළ ප්‍රධාන කරුණු
| ලිපිය යොමු කර ඇති පාර්ශ්වය: ශ්‍රී ලංකා නීතිඥ සංගමයේ (BASL) සභාපති නීතිඥ රජීව් අමරසූරිය
| BASL ස්ථාවරය : සංශෝධනවලට එරෙහිව පවතින ප්‍රතිපත්තිමය විවේචනය පෞද්ගලික විරෝධයක් බවට පත් නොකර ගැනීම
| අධිකරණ ආරක්ෂාව: නිල මට්ටමින් ප්‍රතිචාර දැක්වීමට නොහැකි විනිසුරුවරුන් වෙනුවෙන් නීතිඥ සංගමය පෙනී සිටීමේ සම්ප්‍රදාය
| ඉල්ලීම: ඉදිරි විධායක කමිටු රැස්වීමේදී මේ පිළිබඳ සාකච්ඡා කර නිල ස්ථාවරය පැහැදිලි කිරීම
පාර්ලිමේන්තු වරප්‍රසාද සහ අධිකරණයේ ස්වාධීනත්වය
පාර්ලිමේන්තු වරප්‍රසාද භාවිත කරමින් ඇතැම් විපක්ෂ පාර්ලිමේන්තු මන්ත්‍රීවරුන් සහ මන්ත්‍රීවරියන් විසින් අගවිනිසුරුවරයා පෞද්ගලිකව ඉලක්ක කරගනිමින් ප්‍රකාශ සිදු කිරීම සම්බන්ධයෙන් ද අදාළ ලිපියේ දැක්වේ. සාමාන්‍යයෙන් ධුරය දරන විනිශ්චයකාරවරයෙකු ඉලක්ක කරගනිමින් මෙවැනි ප්‍රකාශ සිදුවන අවස්ථාවලදී, ශ්‍රී ලංකා නීතිඥ සංගමය විසින් එය සමස්ත අධිකරණයට සහ නීතියේ ආධිපත්‍යයට කෙරෙන පහරක් ලෙස සලකා දැඩි ලෙස විරෝධය පළකිරීමේ සම්ප්‍රදායක් පැවැති බව එහි සඳහන් වේ.
එහෙත් මෙවර නීතිඥ සංගමය පවත්වාගෙන යන දැඩි නිහඬතාව හේතුවෙන්, එකී ප්‍රකාශයන් නීතිඥ සංගමය විසින් ද අනුමත කරන්නේදැයි මහජනතාව තුළ සැකයක් මතුවීමේ අවදානමක් පවතින බව නීතිඥ ජගත් අබේනායක පෙන්වා දෙයි.
විනිසුරුවරුන් වෙනුවෙන් පෙනී සිටීමේ සම්ප්‍රදාය සහ ඉදිරි පියවර
ස්වයං ආරක්ෂණය වෙනුවෙන් මාධ්‍ය හමුවේ හෝ ප්‍රසිද්ධියේ අදහස් දැක්වීමට විනිසුරුවරුන්ට පවතින සීමාවන් හේතුවෙන්, මෙවැනි අවස්ථාවලදී ඔවුන් වෙනුවෙන් සහ අධිකරණයේ ස්වාධීනත්වය උදෙසා ඉදිරිපත් වීම නීතිඥ සංගමයේ මූලික වගකීමක් වේ. පෞද්ගලික දේශපාලන මතිමතාන්තරවලින් මිදී සංගමයක් ලෙස වෘත්තීයභාවය සහ ගෞරවය ආරක්ෂා කරගැනීම අත්‍යවශ්‍ය කරුණක් බව මෙහිදී අවධාරණය කර ඇත.
මේ අනුව, යෝජිත ව්‍යවස්ථා සංශෝධන හමුවේ නීතිඥ සංගමයේ වෘත්තීයමයභාවය ආරක්ෂා කරගැනීම සහ අගවිනිසුරුවරයා ඇතුළු අධිකරණ පද්ධතිය ඉලක්ක කරගනිමින් සිදුවන ප්‍රකාශ සම්බන්ධයෙන් කටයුතු කිරීම උදෙසා, ඉදිරි විධායක කමිටු රැස්වීමකදී මෙම කරුණ සාකච්ඡාවට ගන්නා ලෙස නීතිඥ ජගත් අබේනායක BASL සභාපතිවරයාගෙන් ඉල්ලා සිටියි.
