චමින්ද කුලරත්නගේ පෙත්සම යළි අධිකරණය හමුවට

වරප්‍රසාද පලිහක් කර විනය බලය උදුරාගැනීම නීත්‍යනුකූලද?

පාර්ලිමේන්තුවේ නියෝජ්‍ය මහ ලේකම් මෙන්ම කාර්ය මණ්ඩල ප්‍රධානී ජ්‍යෙෂ්ඨ නීතිඥ චමින්ද කුලරත්න මහතාගේ වැඩ තහනම් කිරීම අභියෝගයට ලක්කරමින් ගොනුකළ CA (Writ) 109/2026 දරන රිට් පෙත්සම අද අභියාචනාධිකරණ සභාපති විනිසුරු රොහාන්ත අබේසූරිය සහ විනිසුරු කේ. පී. ප්‍රනාන්දු යන ද්විපුද්ගල විනිසුරු මඬුල්ල හමුවේ විභාගයට ගැනිණි.

කථානායකවරයා වෙනුවෙන් පෙනී සිටි නීතිඥ කණ්ඩායම මතුකළ මූලික විරෝධතාවලට එරෙහිව පෙත්සම්කාර පාර්ශ්වය සිය තර්ක දැක්වීම ආරම්භ කළ අතර, වැඩිදුර කරුණු තහවුරු කිරීම සිකුරාදා (නොවැම්බර් 06) දිනට කල් තැබිණි.

මෙම නඩුවේ කේන්ද්‍රීය සාකච්ඡාව බවට පත්ව ඇත්තේ රටේ උත්තරීතර නීතිය වන ආණ්ඩුක්‍රම ව්‍යවස්ථාව අභිබවා යමින්, පරිපාලනමය ක්‍රියාමාර්ග සඳහා පාර්ලිමේන්තු වරප්‍රසාද යටතේ අසීමිත නීතිමය මුක්තියක් ලබාගත හැකිද යන්නයි.

මහලේකම් සතු බලතල උදුරාගැනීමක්ද?

පෙත්සම්කරු වෙනුවෙන් පෙනී සිටින ජනාධිපති නීතිඥ සංජීව ජයවර්ධන මහතා අධිකරණයට පෙන්වා දෙන්නේ පාර්ලිමේන්තු කාර්ය මණ්ඩල පනත අනුව සේවක විනය බලය නීත්‍යනුකූලව පවතින්නේ පාර්ලිමේන්තු මහලේකම්වරයා සතුව පමණක් බවයි.

කථානායකවරයාට හෝ කාර්ය මණ්ඩල උපදේශක කාරක සභාවට අදාළ විනය බලය අභිමතය පරිදි තමන් වෙත පවරාගත නොහැකි බව පෙත්සම්කරුගේ ස්ථාවරයයි.

පාර්ලිමේන්තු කාර්ය මණ්ඩල උපදේශක කාරක සභාව ව්‍යවස්ථාපිත නීති සම්පාදක මණ්ඩලයක් නොව හුදු පරිපාලන ඒකකයක් බැවින්, එහි සෑම ක්‍රියාමාර්ගයක්ම සාමාන්‍ය නීතිය හමුවේ අධිකරණ පරීක්ෂාවට (Judicial Review) විවෘත විය යුතු බව නීතිඥ කණ්ඩායම අවධාරණය කරයි.

මහලේකම්වරියගේ දිවුරුම් ප්‍රකාශය දුන් පෙරළිය

මෙම නඩුවේ වඩාත්ම කැපීපෙනෙන හැරවුම් ලක්ෂ්‍යය වන්නේ පාර්ලිමේන්තු මහලේකම්වරිය විසින් අධිකරණය වෙත ඉදිරිපත් කර ඇති දිවුරුම් ප්‍රකාශයයි.

කාර්ය මණ්ඩලයේ විනය පාලනය තමන් සතු වුවද, අදාළ චෝදනා පත්‍රය ලබාදීම හා වැඩ තහනම ක්‍රියාත්මක කළේ කථානායකවරයාගේ නියෝග මත බව එම ප්‍රකාශයෙන් සනාථ කර තිබේ. පෙත්සම්කරු ඉල්ලා ඇති අතුරු සහනයට තමන්ගේ කිසිදු විරෝධයක් නොමැති බවද මහලේකම්වරිය එහි සඳහන් කර ඇත.

ස්වාභාවික යුක්තියේ මූලධර්ම මුළුමනින්ම උල්ලංඝනය කරමින් පරීක්ෂණ නිලධාරියා පත්කිරීම හා ඒකපාර්ශ්විකව සිදුකළ වැඩ තහනම බලරහිත කරන මෙන් චමින්ද කුලරත්න මහතා අභියාචනාධිකරණයෙන් ඉල්ලා සිටී.