* සේවාදායකයාගේ ජීවිතය රැකගැනීම ‘රාජ්‍යයේ පැවරිය නොහැකි වගකීමක්’: නීතිඥ අසිත සිරිවර්ධන සිහිපත් කරයි!
* දේශපාලන කුණාටු සහ ආරක්ෂක අංශ ගැටුම් මැද, මානුෂීය සහ මානව හිමිකම් මානයෙන් කොටුව උසාවිය දෙසට දෑස් යොමුවෙයි!
සලේගේ ‘අන්තිම කැමැත්ත’ සහ රඳවාගැනීමේ නියෝග මැද පරීක්ෂාවට ලක්වන ‘රාජ්‍යයක වගකීම’!
අපරාධ පරීක්ෂණ දෙපාර්තමේන්තුවේ (CID) රැඳවුම් භාරයේ පසුවන රාජ්‍ය බුද්ධි සේවයේ හිටපු ප්‍රධානී, විශ්‍රාමික මේජර් ජෙනරාල් සුරේෂ් සලේ ගේ ශාරීරික තත්ත්වය අතිශය අසාධ්‍ය මට්ටමකට පත්ව ඇති බැවින්, ඔහුව වහාම රෝහල් ගත කරන ලෙස බල කරමින් ඔහුගේ නීතිඥ අසිත සිරිවර්ධන විසින් CID අධ්‍යක්ෂ ශානි අබේසේකර වෙත අද (07) දින අතිශය තීරණාත්මක ලිඛිත නිවේදනයක් යොමු කර තිබේ.
හිටපු බුද්ධි ප්‍රධානියාගේ ජීවිතාරක්ෂාව සහ මූලික මානව හිමිකම් සම්බන්ධයෙන් සමාජය තුළ දැඩි අවධානයක් යොමුව ඇති මොහොතක මෙම ලිපිය නීති ක්ෂේත්‍රය තුළ ප්‍රබල මානුෂීය සංවාදයක් මතු කර ඇත.
අද දින පැවැති පවුලේ සාමාජිකයන්ගේ හමුවීමේදී, නිලධාරීන් දෙදෙනෙකුගේ ශාරීරික සහය නොමැතිව සුරේෂ් සලේ ට ඇවිදීමට පවා නොහැකි වී ඇති බව නීතිඥවරයා පෙන්වා දෙයි. ආහාර, ජලය මෙන්ම ඖෂධ සහ සේලයින් ලබා ගැනීම පවා ප්‍රතික්ෂේප කර ඇති සලේ, තමන්ගේ මරණය ආසන්න බව පවසමින් සිය ඇස් දන් දීමට (Eye donation) කටයුතු සූදානම් කරන ලෙසත්, තමන්ගේ ‘අන්තිම කැමැති පත්‍රය’ (Last Will) සකස් කිරීම සඳහා වහාම නීතිඥවරයා කැඳවන ලෙසත් පවුලේ අයට දන්වා තිබේ.
මෙම නීතිමය නිවේදනය මඟින් කිසිදු පාර්ශ්වයකට පුද්ගලිකව චෝදනා එල්ල නොකරන අතර, ඒ වෙනුවට ජාත්‍යන්තර මානව හිමිකම් ප්‍රඥප්තීන්ට සහ ශ්‍රී ලංකා නීතියට අනුව, රාජ්‍ය භාරයේ සිටින ඕනෑම පුරවැසියෙකුගේ ජීවිතය, සෞඛ්‍යය සහ යහපැවැත්ම ආරක්ෂා කිරීම "රාජ්‍යය සතු පැවරිය නොහැකි නීතිමය වගකීමක්" (Non-delegable duty of care) බව අවධාරණය කරයි.
යම් හෙයකින් මෙම අසාධ්‍ය තත්ත්වය නොසලකා හැරීමෙන් සිදුවන අනතුරකදී, සිවිල් හා අපරාධ නීතිය යටතේ පුද්ගලික මෙන්ම ආයතනික වගකීමක් මතු විය හැකි බව ලිපියේ දැක්වේ.
අධිකරණයේ පවතින නඩුකරයන්ට හෝ විමර්ශන ආයතනවල ස්වාධීනත්වයට කිසිදු බලපෑමක් නොකර, හුදෙක් සැකකරුවෙකුගේ "ජීවත්වීමේ අයිතිය" සහ මූලික මානුෂීය අවශ්‍යතා සැපයීම පමණක් ඉල්ලා සිටින මෙම ලිපිය, ලබන 10 වැනිදා කොටුව මහේස්ත්‍රාත් අධිකරණය ලබා දීමට නියමිත තීන්දුවට පෙර, සමස්ත යුක්තිගරුක සමාජයේම හෘද සාක්ෂිය අවදි කරවන සංවේදී සන්ධිස්ථානයක් බවට පත්ව තිබේ.
