"මාර්තු 8 වැනිදා සෝදිසි කිරීමක් සිදු වූ බව" අපරාධ පරීක්ෂණ දෙපාර්තමේන්තුව කොමිසම හමුවේ පවසයි.
සෝදිසි පටිපාටිවලට අදාළ නිල ලේඛන සහ සීසීටීවී දර්ශන වාර්තා කැඳවීමට මානව හිමිකම් කොමිසමෙන් පියවර.
ත්‍රස්තවාදය වැළැක්වීමේ පනත (PTA) යටතේ රඳවාගෙන සිටින හිටපු බුද්ධි ප්‍රධානී මේජර් ජෙනරාල් සුරේෂ් සලේ ට අදාළව, ඔහුගේ බිරිඳ වන මනෝරි සලේ කළ පැමිණිල්ල විභාග කිරීම සඳහා ශ්‍රී ලංකා මානව හිමිකම් කොමිෂන් සභාව (HRCSL) අද (16) දහවල් කටයුතු කර ඇත.
මින් පෙර අවස්ථාවලදී කොමිසම හමුවේ පෙනී සිටීම මඟහැර තිබූ අපරාධ පරීක්ෂණ දෙපාර්තමේන්තුවේ (CID) නිලධාරීන් අද දහවල් 2.00ට කොමිසම හමුවට කැඳවා තිබිණි.
මෙම විමර්ශනයේදී, සුරේෂ් සලේ රඳවා තබා ගැනීමේදී සිදුවූ බව කියන නෛතික සහ මානුෂීය ක්‍රියාපටිපාටීන් පිළිබඳව අතිශය තීරණාත්මක කරුණු රැසක් අනාවරණය වී තිබේ.
CID ස්ථානාධිපතිගෙන් (OIC) පළමු වරට පිළිගැනීමක්
සුරේෂ් සලේ ව අමානුෂික හෝ අවමන් සහගත සැලකීමකට ලක් කර ඇති බවට නැඟුණු චෝදනා සම්බන්ධයෙන් කොමිසම කළ ප්‍රශ්න කිරීම් හමුවේ, අපරාධ පරීක්ෂණ දෙපාර්තමේන්තුවේ ස්ථානාධිපතිවරයා (OIC CID) විසින් විශේෂ නෛතික හැරවුමක් සිදු කරමින් කරුණක් පිළිගෙන ඇත.
ඒ අනුව, ඉකුත් මාර්තු මස 08 වැනිදා අපරාධ පරීක්ෂණ දෙපාර්තමේන්තුව තුළදී සෙසු සියලුම රැඳවියන් ඉදිරිපිට මේජර් ජෙනරාල් සුරේෂ් සලේ ව විශේෂ සෝදිසි කිරීමකට (Subjected to search) ලක් කළ බව CID ස්ථානාධිපතිවරයා පළමු වරට මානව හිමිකම් කොමිසම හමුවේ නිල වශයෙන් පිළිගත්තේය.
ලේඛන සහ CCTV වහාම ඉල්ලයි
මෙම පිළිගැනීමත් සමඟ විමර්ශනය දැඩි කළ මානව හිමිකම් කොමිෂන් සභාව, එදින සිදුවූ ක්‍රියාවලියේ නීත්‍යානුකූලභාවය සහ ප්‍රමිතිය පරීක්ෂා කිරීම සඳහා අපරාධ පරීක්ෂණ දෙපාර්තමේන්තුව වෙත වහාම ක්‍රියාත්මක වන පරිදි නියෝග කිහිපයක් නිකුත් කළේය.
SOP සහ සෝදිසි වාර්තා:
සැකකරුවන් සෝදිසි කිරීම සම්බන්ධයෙන් පොලිසිය අනුගමනය කරන සම්මත මෙහෙයුම් පටිපාටිය (Standard Operating Procedures - SOP's) සහ මේ වසර තුළ එවැනි සෝදිසි කිරීම් සිදුකළ දින වකවානු ඇතුළත් නිල ලේඛන ඉදිරිපත් කළ යුතුය.
නිලධාරීන්ගේ නම්:
මාර්තු 08 වැනිදා අනෙක් රැඳවියන් ඉදිරිපිට සලේ ව සෝදිසි කිරීමට සෘජුවම දායක වූ නිලධාරීන්ගේ නාමලේඛනය කොමිසමට දිය යුතුය.
CCTV දර්ශන:
සුරේෂ් සලේ ට සිදුවූ බව කියන පීඩාවන් සම්බන්ධයෙන් සාක්ෂි සුරක්ෂිත කිරීම සඳහා, CID පරිශ්‍රයේ අදාළ දිනවල CCTV දර්ශන වහාම කොමිසම භාරයට දිය යුතුය.
නෛතික දින වකවානු පිළිබඳ ප්‍රශ්නය
මීට අමතරව, ත්‍රස්තවාදය වැළැක්වීමේ පනත යටතේ පුද්ගලයෙකු රඳවා ගැනීමේදී අනුගමනය කළ යුතු අනිවාර්ය නෛතික පියවර නිසි පරිදි සිදුවී ඇත්දැයි කොමිසම ප්‍රශ්න කර ඇත. ඒ අනුව, සුරේෂ් සලේ ගේ රැඳවුම් නියෝගය (Detention Order) නිකුත් කිරීමෙන් පසු, ඒ පිළිබඳව අදාළ මහේස්ත්‍රාත් අධිකරණය සහ මානව හිමිකම් කොමිෂන් සභාව නිල වශයෙන් දැනුවත් කළ නිශ්චිත දින වකවානු මොනවාදැයි ලිඛිතව ඉදිරිපත් කරන ලෙස ද පොලිස් නිලධාරීන්ට නියෝග කෙරිණි.
කොමිසම ඉල්ලා සිටි සීසීටීවී දර්ශන සහ නිල ලේඛන ඉදිරියේදී ලැබීමට නියමිත බැවින්, මෙම විමර්ශනයේ අවසන් නිර්දේශයන් සුරේෂ් සලේ විසින් අභියාචනාධිකරණය හමුවේ ගොනුකර ඇති රිට් පෙත්සමට ද තීරණාත්මක ලෙස බලපානු ඇතැයි නීති ක්ෂේත්‍රයේ ප්‍රවීණයෝ විශ්ලේෂණය කරති.
