කොළඹ සරසවියේ සල්ලිවලට Degree දෙන විභාග ජාවාරමක් ! - අල්ලස් කොමිසමෙන් දැඩි විමර්ශනයක්

වංචා ගැන කියද්දීත් බලධාරීන් හොර රහසේම උපාධි ප්‍රදානය කර ඇති බවට බරපතළ චෝදනා

උපකුලපති මහාචාර්ය ඉන්දික කරුණාතිලක සහ ලේඛකාධිකාරී කාර්යාලය නිශ්ශබ්ද පිළිවෙතක

ලංකාවේ ප්‍රමුඛතම රාජ්‍ය විශ්වවිද්‍යාලයක් වන කොළඹ විශ්වවිද්‍යාලයේ ඇතැම් උසස් ඩිප්ලෝමා විභාග මුදලට සමත් කිරීම සහ ප්‍රශ්න පත්‍ර කලින්ම පිටකිරීම ඇතුළු මහා පරිමාණ විභාග අක්‍රමිකතා රැසක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව (CIABOC) විසින් පුළුල් විමර්ශනයක් ආරම්භ කර තිබේ.

විශ්වවිද්‍යාලයේ කළමනාකරණ උසස් ඩිප්ලෝමා පාඨමාලාව හදාරන සිසුන් පිරිසක් විසින් ඉදිරිපත් කරන ලද, සාක්ෂි සහිත ලිඛිත පැමිණිල්ලක් මූලික අධ්‍යයනයකට ලක් කිරීමෙන් අනතුරුව අල්ලස් කොමිසම මෙම පියවර ගෙන ඇත.

නිදහස් අධ්‍යාපනයේ මුදුන්මල්කඩ බඳු රාජ්‍ය විශ්වවිද්‍යාල පද්ධතියේ ඉහළම ඇගයීමක් ඇති කොළඹ සරසවියේ "විභාග සහ උපාධි මුදලට විකිණීමේ" (Cash-for-grades scandal) ජාවාරමක් කරළියට පැමිණීම මෙරට සමස්ත උසස් අධ්‍යාපනයේ විශ්වාසනීයත්වයට මෙන්ම ජාත්‍යන්තර කීර්තිනාමයට එල්ල වූ මරුපහරකි. පාලකයන්ගේ දූෂිත ක්‍රියා නිසා සුදුසුකම් සහිත දක්ෂ සිසුන් අධෛර්යමත් වීම සහ සමස්ත අධ්‍යාපන පද්ධතියේ ගුණාත්මකභාවය (Academic integrity) බිඳ වැටීම මෙහි ඇති බරපතළම අනතුරයි.

සිසුන් ඉදිරිපත් කළ ප්‍රධාන චෝදනා

මුදලට ලකුණු දීම සහ ප්‍රශ්න පත්‍ර පිටකිරීම:
ඇතැම් ආචාර්යවරුන් තමන්ට හිතවත් සිසුන්ට විභාගයට පෙර ප්‍රශ්න පත්‍ර හෙළිදරව් කර ඇති අතර, තවත් පිරිසකගෙන් මුදල් ලබාගෙන විභාග ලකුණු ලබා දී තිබීම.

සිසුන්ගෙන් පළිගැනීම:
ආචාර්යවරුන්ගේ විවිධ අනිසි හා අනාචාර වෘත්තීය වුවමනාවලට අනුගත නොවන සිසුන්ව විභාගවලින් අසමත් කරමින් ලකුණු දීමේ සම්මත පටිපාටි හිතාමතාම උල්ලංඡනය කිරීම.

ව්‍යාජ ප්‍රතිඵල ලේඛන:
විභාග අසමත් කළ සිසුන් පිරිසක් ඒ පිළිබඳව ප්‍රශ්න කිරීමෙන් අනතුරුව, ඔවුන්ව යළි සමත් කරමින් ව්‍යාජ ලෙස සකස් කළ ප්‍රතිඵල ලේඛන නිකුත් කර තිබීම.

බලධාරීන්ගේ අනුග්‍රහය:
මෙම දූෂණ පිළිබඳව සිසුන් විශ්වවිද්‍යාල පාලනාධිකාරිය වෙත පැමිණිලි කර තිබුණද, ඒවා විභාග කිරීම වෙනුවට අදාළ චෝදනා ලත් පාර්ශවයන් ආරක්ෂා කරමින් හොර රහසේම උපාධි ප්‍රදානය කිරීමට කටයුතු කර තිබීම.

අධ්‍යාපන ක්ෂේත්‍රයේ ප්‍රවීණයන් පෙන්වා දෙන පරිදි, පශ්චාත් උපාධි සහ බාහිර ඩිප්ලෝමා පාඨමාලා හරහා විශ්වවිද්‍යාල අරමුදල් උපයන ව්‍යාපාරික ව්‍යුහයන් බවට පත්වීමත් සමඟ, ඇතැම් ආචාර්යවරුන් සහ පරිපාලන නිලධාරීන් මෙවැනි මූල්‍ය වංචාවලට නැඹුරු වීමේ ප්‍රවණතාවක් පවතී.

මෙම සිදුවීම සම්බන්ධයෙන් කොළඹ විශ්වවිද්‍යාලයේ නිල ස්ථාවරය විමසීමට උපකුලපති මහාචාර්ය ඉන්දික මහේෂ් කරුණාතිලක සහ ලේඛකාධිකාරී සංජීවනී පෙරේරා ගේ කාර්යාල දුරකථන මාර්ගයෙන් සම්බන්ධ කර ගැනීමට උත්සාහ කළද, ඔවුන් විශේෂ සාකච්ඡාවල සිටින බව පවසමින් විශ්වවිද්‍යාල පාර්ශ්වය මේ දක්වා නිල ප්‍රකාශයක් දීම මඟහැර සිටී.

මෙවැනි පසුබිමක, අල්ලස් කොමිසම ස්වාධීනව මැදිහත් වී අදාළ සියලුම ලේඛන කැඳවා, මෙම ජාවාරමට සම්බන්ධ ඉහළ පුටු වහාම නීතියේ රැහැනට හසුකර නොගතහොත්, රාජ්‍ය විශ්වවිද්‍යාලවලින් නිකුත් කරන සහතික පත්‍රවල ජාත්‍යන්තර පිළිගැනීම (International Accreditation) මුළුමනින්ම අහිමි වී යාමේ දැඩි අවදානමක් පවතී.


මුලාශ්‍රය : ceylonwire.lk