*ජීවිතය වින්දනය කිරීමට මෙන්ම සමාජයීය වෙනසක් වෙනුවෙන් 'ද ලීඩර්' වෙතින් නව මාධ්‍ය භාවිතාවට සුබපැතුම්
ගවේෂණාත්මක පුවත්පත් කලාවේ ප්‍රශස්ත භාවිතාවන් අභ්‍යාස කරමින්, දේශපාලනය, ආර්ථිකය, කලාව සහ සංස්කෘතිය ඇතුළු ක්ෂේත්‍ර රැසක් ආවරණය වන පරිදි ජ්‍යෙෂ්ඨ මාධ්‍යවේදී කේ. සංජීව විසින් 'knews.lk' නමින් නව පුවත් වෙබ් අඩවියක් ආරම්භ කර තිබේ. සමාජයීය වෙනසක් සහ විචාරාත්මක සංවාදයක් උදෙසා ගුණාත්මක තොරතුරු මූලාශ්‍රයක් ලෙස පවත්වාගෙන යාමට අපේක්ෂිත මෙම නව මාධ්‍ය ප්‍රයත්නයට 'ද ලීඩර්' සමූහයේ උණුසුම් සුබපැතුම් හිමිවේ.
මතු පලවන්නේ ඒ සම්බන්ධයෙන් ඔහුගේ ෆේස්බුක් පිටුවේ පළකර තිබු සටහනකි.
knews.lk ගැන යමක්..!
ගවේෂණාත්මක පුවත්පත් කලාවේ භාවිතාවන් අභ්‍යාස කරමින්, ප්‍රශස්ත මට්ටමේ විශේෂාංග සපිරි ප්‍රවෘත්ති ද අඩු නැති වෙබ් අඩවියක් නිර්මාණය කර පවත්වාගෙන යාම අපගේ බලාපොරොත්තුවයි.
ගවේෂණාත්මක මාධ්‍ය වාර්තාවන්ට අමතරව අපි එදිනෙදා සිදුවන වැදගත් සිදුවීම් ද ජීවිතයේ නෙක රසයන් ද ඔබ හමුවට ගෙන එන්නෙමු.
දේශපාලනය, ආර්ථිකය, කලාව, සංස්කෘතිය, ක්‍රීඩාව, ජීවිතය ආදී කලාප විශාල ප්‍රමාණයක එකවිට වැඩකරමින් වැදගත් තොරතුරු මූලාශ්‍රයක් ඔන්ලයින් අවකාශයේ වෙබ් අඩවියක ස්වරූපයෙන් ස්ථාපනය කර පවත්වාගෙන යන්නට අප උත්සාහ කරමු.
ජීවිතය වින්දනය කරමින් ජීවිතය සොයාගෙන යාම සඳහා ද සාකච්ඡාවෙන් විචාරයෙන් සමාජය තේරුම් ගැනීම සඳහා ද උද්ඝෝෂණයෙන් මැදිහත් වීමෙන් සමාජය වෙනස් කරගැනීම සඳහා ද හොඳ තොරතුරු මූලාශ්‍රයක් පවත්වාගන්නට අප හට සහාය වන්න.
(කේ. සංජීව)
