ලෝකය පුරා විසිරී සිටින ශ්‍රී ලාංකික සංක්‍රමණික ශ්‍රමිකයන්ගේ ආරක්ෂාව සහ පැමිණිලි කළමනාකරණය සඳහා නව ජංගම යෙදවුමක් (App) හඳුන්වා දී තිබේ.
ජාත්‍යන්තර ගෘහ සේවක දිනය නිමිත්තෙන් එළිදැක්වුණු මෙම යෙදවුම නම් කර ඇත්තේ “LankaKonect” යනුවෙනි. විදේශ කටයුතු, විදේශ රැකියා සහ සංචාරක අමාත්‍ය විජිත හේරත් ගේ ප්‍රධානත්වයෙන් කොළඹදී මෙහි නිල කටයුතු ආරම්භ විය.
ආයතන තුනක් එකම ඩිජිටල් වේදිකාවකට
මෙම ව්‍යාපෘතිය හුදෙක් එක් ආයතනයක උත්සාහයක් නොවේ. විදේශ කටයුතු අමාත්‍යාංශය, විදේශ සේවා නියුක්ති කාර්යාංශය (SLBFE) සහ ජාත්‍යන්තර කම්කරු සංවිධානය (ILO) එකතුව මෙම පද්ධතිය නිර්මාණය කර ඇත.
ශ්‍රී ලංකා ටෙලිකොම් ආයතනය මෙයට තාක්ෂණික දායකත්වය සපයයි. මෙතෙක් වෙන වෙනම ක්‍රියාත්මක වූ ආයතනික ව්‍යුහයන් මේ හරහා එකම ඩිජිටල් ජාලයකට සම්බන්ධ කෙරේ.
බිම් මට්ටමේ ඇත්ත සහ පද්ධතියේ අභියෝගය
ඕනෑම රටක සිටින ශ්‍රමිකයෙකුට තම පැමිණිලි සෘජුවම රජයට ඉදිරිපත් කිරීමට සහ එහි ප්‍රගතිය නිරීක්ෂණය කිරීමට මෙමඟින් අවස්ථාව ලැබෙයි. එය සාධනීය පියවරකි. එහෙත්, මැදපෙරදිග ඇතුළු රටවල වෙසෙන ගෘහ සේවිකාවන්ට ජංගම දුරකථන සහ අන්තර්ජාලය භාවිත කිරීමට ඇති ප්‍රායෝගික බාධා මෙහිදී අමතක කළ නොහැක.
ඇප් එකක් නිර්මාණය කිරීම මෙන්ම, එය බිම් මට්ටමේ පීඩාවට පත්වන ශ්‍රමිකයා අතට සැබවින්ම පත්වන්නේද යන්න ඉදිරියේදී දැකගත යුතු වේ.
