*2025 අංක 17 දරන සූදු නියාමන අධිකාරී පනතේ නීතිමය තත්ත්වය සහ ශ්‍රී ලංකා ක්‍රිකට් පරිවර්තන කමිටුවේ ස්ථාවරය
සූදු වෙබ් අඩවි තහනම සහ LPL ප්‍රවර්ධන ගැටලුව
බලපත්‍ර ලබාගැනීමකින් තොරව ශ්‍රී ලංකාව තුළ නීතිවිරෝධී ලෙස ක්‍රියාත්මක වූ ඔන්ලයින් සූදු සහ ඔට්ටු ඇල්ලීමේ වෙබ් අඩවි 146කට පිවිසීම අත්හිටුවීමට විදුලි සංදේශ නියාමන කොමිෂන් සභාව (TRCSL) පියවර ගෙන තිබේ. 2025 අංක 17 දරන සූදු ක්‍රීඩා නියාමන අධිකාරිය පනතේ බලතල ප්‍රකාරව, මුදල් අමාත්‍යාංශය යටතේ පවතින සූදු ක්‍රීඩා නියාමන අධිකාරිය (GRA) කළ දැනුම්දීමකට අනුව මෙම පියවර ගෙන ඇති බව ඩිජිටල් ආර්ථික අමාත්‍යාංශය තහවුරු කරයි.
කෙසේ වෙතත්, මෙලෙස නීතිමය වශයෙන් තහනම් කිරීමට සහ නියාමනය කිරීමට පියවර ගෙන ඇති පසුබිමක, මේ දිනවල පැවැත්වෙන ලංකා ප්‍රීමියර් ලීග් (LPL) ක්‍රිකට් තරගාවලියේ ඇතැම් කණ්ඩායම්වල ඇඳුම්, ක්‍රීඩාංගණ සීමා රේඛා (Boundary boards) මෙන්ම රූපවාහිනී වෙළෙඳ දැන්වීම් ඔස්සේ ද අදාළ ඔන්ලයින් සූදු සහ ඔට්ටු ඇල්ලීමේ සේවාවන් වක්‍රව හා සෘජුව ප්‍රවර්ධනය වන ආකාරය නිරීක්ෂණය වේ.
ඔන්ලයින් සූදු නියාමනය සහ LPL ප්‍රවර්ධන පසුබිම
| තහනම් කළ වෙබ් අඩවි: බලපත්‍ර නොමැති ජාත්‍යන්තර හා දේශීය සූදු වෙබ් අඩවි 146ක් (TRCSL මගින් අත්හිටුවන ලදී)
| අදාළ පනත සහ දඩ: 2025 අංක 17 දරන පනත ප්‍රකාරව රු. මිලියන 10ක දඩයක් හෝ වසර 2ක සිරදඬුවම්
| LPL පිටියේ තත්ත්වය: '1Xbat', 'Betss', 'STBet' වැනි වෙබ් අඩවි අනුග්‍රාහකත්ව සහ දැන්වීම් ඔස්සේ ප්‍රචාරය වීම
| නීතිමය තත්ත්වය: මෙරට තුළ ඔන්ලයින් සූදු සඳහා මෙතෙක් කිසිදු ආයතනයකට නිල ලියාපදිංචියක් ලබාදී නොමැති බව මුදල් අමාත්‍යාංශය කියයි
වක්‍ර ප්‍රවර්ධනයන් සහ ක්‍රීඩකයින්ගේ ආවරණයන්
ජාත්‍යන්තර ක්‍රිකට් කවුන්සිලයේ (ICC) රෙගුලාසිවලට අනුව ඔට්ටු ඇල්ලීම සහ සූදු ක්‍රීඩා ප්‍රවර්ධනය තහනම් කර තිබුණ ද, LPL තරගාවලියේදී '1Xbet' සූදු වෙබ් අඩවියේ වක්‍ර නාමයක් වන '1Xbat' වැනි ප්‍රවර්ධන සීමා රේඛාවල සටහන් කර තිබීම විශේෂත්වයකි. එමෙන්ම තරග අතරතුර ප්‍රචාරය වන ඇතැම් රූපවාහිනී දැන්වීම් මගින් ද ඔන්ලයින් සූදු වෙබ් අඩවි ප්‍රසිද්ධ කෙරෙයි.
තරගාවලියට එක්වන ඇතැම් කණ්ඩායම්වල නිල ඇඳුම් සඳහා ද මෙම සූදු සමාගම් අනුග්‍රහකත්වය ලබාදී ඇති අතර, ඇතැම් ක්‍රීඩකයින් එම ලාංඡන නොපෙනෙන පරිදි ආවරණය කරගනිමින් තරග බිමට පිවිසෙන ආකාරය ද නිරීක්ෂණය විය. මුදල් අමාත්‍යාංශයේ නිලධාරියෙකු තහවුරු කළේ මේ දක්වා ඔන්ලයින් ඔස්සේ සූදු ක්‍රීඩාවේ නිරත වන කිසිදු වෙබ් අඩවියක් මෙරට නිල වශයෙන් ලියාපදිංචි කර නොමැති බවයි.
ශ්‍රී ලංකා ක්‍රිකට් පාලක මණ්ඩලයේ සහ පනතේ ස්ථාවරය
මේ පිළිබඳව අදහස් දක්වමින් ශ්‍රී ලංකා ක්‍රිකට් පරිවර්තන කමිටුවේ සභාපති එරාන් වික්‍රමරත්න සඳහන් කළේ, LPL තරගාවලිය වෙනුවෙන් මීට පෙර අත්සන් කර ඇති ගිවිසුම් පිළිබඳව ඉදිරියේදී නැවත සොයා බලන බවයි. ශ්‍රී ලංකා ක්‍රිකට් ආයතනය කිසිදු විටෙක සූදු සමාගම් හරහා අනුග්‍රාහකත්වයන් ලබා නොගන්නා බවත්, පවතින නීතිමය රාමුවට අනුකූල වන පරිදි අතීත ගිවිසුම් සමාලෝචනය කරන බවත් ඔහු වැඩිදුරටත් පැවසීය.
2025 අංක 17 දරන සූදු නියාමන අධිකාරී පනතට අනුව බලපත්‍ර ලබාගැනීමකින් තොරව නීතිවිරෝධී ලෙස ඔන්ලයින් සූදු පවත්වාගෙන යාම මෙන්ම ප්‍රවර්ධනය කිරීම ද දණ්ඩනීය වරදකි. ඊට රුපියල් මිලියන 10 නොඉක්මවන දඩයක් හෝ වසර 2ක සිරදඬුවමක් හෝ එකී දඬුවම් දෙකම නියම කිරීමට නීතිමය ප්‍රතිපාදන සලසා ඇත.
නව සූදු නියාමන රාමුව සහ ඉදිරි පියවර
නව පනත මගින් විදේශීය සූදු සමාගම්වලට මෙරට තුළ ක්‍රියාත්මක වීමට නම් සමාගම් ලියාපදිංචි කිරීමේ දෙපාර්තමේන්තුවේ ලියාපදිංචි වීම, දේශීය නියෝජිතයෙකු පත් කිරීම, ශක්තිමත් මූල්‍ය පසුබිමක් පෙන්වීම සහ අනිවාර්ය පාරිභෝගික ආරක්ෂණ කොන්දේසි (KYC පරීක්ෂණ, වයස් සීමා, තැන්පතු සීමා) සපිරීම අනිවාර්ය කර තිබේ.
අවසර නොලද සූදු වෙබ් අඩවි 146ක් අත්හිටුවීමට TRCSL පියවර ගැනීමත් සමඟ, මෙරට අන්තර්ජාල සූදු ක්ෂේත්‍රය මෙන්ම ක්‍රීඩා අනුග්‍රාහකත්වයන් ද දේශීය නීතිමය රාමුවට යටත් කිරීමේ කඩිනම් වැඩපිළිවෙලක් ආරම්භ වී ඇත.
සබැඳි පුවත් :
අවසර නොලත් නීතිවිරෝධී අන්තර්ජාල සූදු වෙබ් අඩවි 122ක් ශ්‍රී ලංකාව තුළ තහනම් කෙරෙයි!
