ශ්‍රී ලංකා රජය ත්‍රස්තවාදය වැළැක්වීමේ පනත (PTA) අහෝසි කිරීමට කැපවී සිටින බව ප්‍රකාශ කර තිබුණද, එම පනත යටතේ පුද්ගලයන් අත්අඩංගුවට ගැනීම සහ රඳවා තබා ගැනීම තවදුරටත් අඛණ්ඩව සිදුවීම පිළිබඳව තමන් දැඩි ලෙස කනස්සල්ලට පත්වන බව ඇම්නෙස්ටි ඉන්ටර්නැෂනල් (Amnesty International) ආයතනය නිවේදනයක් නිකුත් කරමින් පවසයි.
ජාත්‍යන්තර මානව හිමිකම් නීති සහ ප්‍රමිතීන්ට පටහැනි, අතිශය පුළුල් ප්‍රතිපාදන සහිත මෙම පනත ක්‍රියාත්මක කිරීමේදී මතුවන ගැටලුකාරී තත්ත්වයන් මෑතකදී සිදු වූ සිදුවීම් දෙකක් හරහා යළිත් තහවුරු වී ඇතැයි එම සංවිධානය පෙන්වා දෙයි.
"දෙමළ ඊළම" වචනය නිසා හිප්-හොප් කලාකරුවා රිමාන්ඩ් එකට
ඇම්නෙස්ටි ආයතනය ඉස්මතු කරන පළමු සිදුවීම වන්නේ, සමාජ මාධ්‍ය ඔස්සේ ප්‍රචාරය වූ ප්‍රසංගයක ගීතයක් හරහා එල්.ටී.ටී.ඊ. (LTTE) සංවිධානය ප්‍රශංසාවට ලක් කළ බවට චෝදනා කරමින්, ජූනි 2 වැනිදා අත්අඩංගුවට ගත් 24 හැවිරිදි දෙමළ හිප්-හොප් කලාකරුවෙකු වන සංගීතන් ගනේෂ්කුමාර් ජූනි 17 වැනිදා දක්වා රක්ෂිත බන්ධනාගාර ගත කිරීමයි.
මෙම පනතේ ඇති අපැහැදිලි වැරදි නිර්වචන ජාත්‍යන්තර නීති ප්‍රමිතීන්ට අනුකූල නොවන බව පවසන ඇම්නෙස්ටි ආයතනය, ජාත්‍යන්තර සාධාරණ නඩු විභාග ප්‍රමිතීන්ට අනුකූලව ඔහුට එරෙහිව පිළිගත හැකි චෝදනාවක් ඉදිරිපත් නොකරන්නේ නම් ඔහුව වහාම නිදහස් කරන ලෙස බලකර සිටියි.
අත්අඩංගුවේ පසුවන සුරේෂ් සාලිගේ උපවාසය සහ මානුෂීය අයිතීන්
අනෙක් අතින්, පාස්කු ඉරිදා බෝම්බ ප්‍රහාරය සම්බන්ධයෙන් පසුගිය පෙබරවාරි 25 වැනිදා PTA පනත යටතේ අත්අඩංගුවට ගත් රාජ්‍ය බුද්ධි සේවයේ හිටපු ප්‍රධානී සුරේෂ් සාලි සම්බන්ධයෙන් ද ඇම්නෙස්ටි ආයතනය සිය අවධානය යොමු කර ඇත. මේ වන විට අත්අඩංගුවේ පසුවෙමින් සුරේෂ් සලේ විසින් ආරම්භ කර ඇති උපවාසයක් හේතුවෙන් ඔහු රෝහල්ගත කර ඇති අතර, ඔහුගේ පවුලේ අය සහ නීතිඥයන් මතු කරන මානුෂීය අයිතීන් හා සැලකීම් පිළිබඳ ගැටලුව ද මෙහිදී අවධාරණය කෙරේ.
පාස්කු ප්‍රහාරයේ වින්දිතයන්ට සාධාරණය ඉටුකිරීම රජයේ වගකීමක් වන අතරම, සැකකරුවන්ට ද නිසි නීතිමය ක්‍රියාවලිය (Due process) සහ සාධාරණ නඩු විභාගයක අයිතිය හිමිවිය යුතු බව ඇම්නෙස්ටි ආයතනය සිහිපත් කරයි.
මානව හිමිකම් සුරැකීමට PTA වහාම අත්හිටුවන්න
මේ අනුව බලන කල, දේශපාලන ක්‍රියාකාරීන්, කලාකරුවන් මෙන්ම සුළුතර ප්‍රජාවන් ඉලක්ක කරගනිමින් මෙම පනත අවභාවිත වීමේ බරපතල ඉඩකඩක් පවතින බව පෙන්වා දෙන ඇම්නෙස්ටි සංවිධානය, වහාම ක්‍රියාත්මක වන පරිදි PTA පනත භාවිත කිරීම අත්හිටුවන ලෙසත් (Moratorium), එය ප්‍රමාදයකින් තොරව සම්පූර්ණයෙන්ම අහෝසි කරන ලෙසත් රජයෙන් ඉල්ලා සිටී.
