* අධික බලශක්ති පිරිවැය, නීතිමය ප්‍රමාදයන් සහ ණය හිඟකම මැද දේශීය සුළු ව්‍යවසායකයන්ට කලාපීය දැවැන්තයන් සමඟ හැරෙන්න පුළුවන් වෙයිද?
* තේ, පොල්, නිෂ්පාදන සහ ඩිජිටල් සේවා ඉදිරියට ගැනීමට සැලසුම්; එහෙත් ආරක්ෂණ පියවර (Safeguards) මදි බවට ආර්ථික විද්‍යාඥයන්ගෙන් රතු එළියක්.
ලෝකයේ විශාලතම නිදහස් වෙළඳ කලාපයක් වන RCEP (Regional Comprehensive Economic Partnership) ඇතුළු කලාපීය ආර්ථික බලවේග සමඟ සෘජුව බද්ධ වීම සඳහා ශ්‍රී ලංකා රජය සිය වෙළඳ උපායමාර්ග කඩිනම් කරමින් සිටී. කෙසේ වෙතත්, මෙම විවෘත වෙළඳ ප්‍රතිපත්තිය හරහා මෙරට සමස්ත ව්‍යාපාරවලින් 76%ක් නියෝජනය කරන සහ රටේ ප්‍රධානතම රැකියා උත්පාදකයා වන සුළු හා මධ්‍ය පරිමාණ ව්‍යාපාර (SME) ක්ෂේත්‍රයට එල්ල විය හැකි බරපතල තරඟකාරී තෙරපුම පිළිබඳව ආර්ථික විශ්ලේෂකයෝ අනතුරු අඟවති.
පාත්ෆයින්ඩර් පදනම විසින් සංවිධානය කරන ලද ප්‍රතිපත්ති සංසදයකදී අදහස් දැක්වූ වෙළඳ අමාත්‍යාංශයේ ලේකම් කේ.ඒ. විමලෙන්තිරරාජා ද පිළිගත්තේ මෙම කලාපීය ඒකාබද්ධතාවය තුළ නීතිමය ප්‍රමාදයන්, ඉහළ මෙහෙයුම් පිරිවැය, ශ්‍රම බලකායේ කුසලතා හිඟකම සහ ජාත්‍යන්තර ප්‍රමිතීන්ට හැඩගැසීමේ බරපතල අභියෝග පවතින බවයි.
නිදහස් වෙළඳාමේ ‘දෙපැත්ත කැපෙන’ කඩුව
ආණ්ඩුවේ නිලධාරීන් පෙන්වා දෙන්නේ ගෝලීය වෙළඳ රටාවන් වේගයෙන් වෙනස් වන බැවින් ලංකාවට හුදෙකලාව පැවතිය නොහැකි බවත්, ආයෝජන දිනා ගැනීමට, අපනයන ශක්තිමත් කිරීමට සහ ගෝලීය සැපයුම් දාමයන්ට එකතු වීමට නම් RCEP වැනි ගිවිසුම් ක්‍රියාත්මක කිරීම අත්‍යවශ්‍ය බවත්ය. මෙමඟින් දේශීය නිෂ්පාදකයන්ට අවශ්‍ය අමුද්‍රව්‍ය, තාක්ෂණය සහ ආයෝජන අඩු මිලට ලබා ගැනීමට අවස්ථාව හිමිවන අතර, අපේ සුළු ව්‍යවසායකයන්ට ජාත්‍යන්තර වෙළඳපොළේ සැපයුම්කරුවන් වීමට මඟ පෑදෙන බව පාලන පක්ෂයට හිතවාදී පාර්ශව පෙන්වා දෙයි.
කෙසේ වෙතත්, ආර්ථික විශේෂඥයන් පෙන්වා දෙන්නේ දේශීය ව්‍යවසායකයන්ට සහනදායී ණය, තාක්ෂණික පුහුණුව, යටිතල පහසුකම් දියුණු කිරීම සහ නීතිමය සරල කිරීම් වැනි අභ්‍යන්තර ප්‍රතිසංස්කරණ (Complementary measures) මුලින්ම ලබා නොදී වෙළඳපොළ මුළුමනින්ම විවෘත කළහොත් බරපතල විපාක විඳීමට සිදුවන බවයි. මහා පරිමාණ විදේශීය සමාගම්වල ලාභ භාණ්ඩ දේශීය වෙළඳපොළ ආක්‍රමණය කිරීමෙන් (Market Dumping) තාක්ෂණික හා මූල්‍ය ප්‍රාග්ධන හිඟයෙන් පෙළෙන දේශීය කර්මාන්ත මුළුමනින්ම විනාශ වීමේ අවදානමක් පවතී.
විශේෂයෙන්ම SME දායකත්වය ඉහළින්ම පවතින තේ, පොල් ආශ්‍රිත නිෂ්පාදන, නිෂ්පාදන කර්මාන්ත සහ ඩිජිටල් සේවා යන ක්ෂේත්‍රවල පැවැත්ම, ආණ්ඩුව විසින් සපයනු ලබන ආරක්ෂණ යාන්ත්‍රණයන්හි (Safeguards) ශක්තිමත්භාවය මත තීරණය වනු ඇත. ලංකාවේ වරාය සහ භූගෝලීය පිහිටීම වැදගත් වුවද, දේශීය ව්‍යාපාර ශක්තිමත් නොකර ලබා ගන්නා වෙළඳ තීන්දු හරහා සියල්ල ආපස්සට කැරකැවිය හැකි බව ආර්ථික විද්‍යාඥයෝ අනතුරු අඟවති.
අදහස සහ යෝජනා :
දේශීය ව්‍යාපාර ශක්තිමත් නොකර ජාත්‍යන්තර නිදහස් වෙළඳ ගිවිසුම්වලට හදිසියේ ඇතුළු වීම දේශීය නිෂ්පාදන පද්ධතිය බිඳ දැමිය හැක. ඇතැම් ආර්ථික විශේෂඥයින් ඒ සඳහා පහත පියවර යෝජනා කරමි.
* 'Anti-Dumping' සහ දේශීය ආරක්ෂණ නීති දැඩි කිරීම:
විදේශීය රටවලින් අතිශය ලාභදායී බාල නිෂ්පාදන ලංකාවට ගලා ඒම (Dumping) වැළැක්වීම සඳහා පවතින වෙළඳ ආරක්ෂණ නීතිමය රාමුව (Trade Safeguards) උපරිමයෙන් ශක්තිමත් කළ යුතුය. දේශීය කර්මාන්ත අනතුරේ වැටෙන විට තාවකාලිකව බදු පැනවීමේ අයිතිය (Safety Valve) ලංකාව සතුව තබාගත යුතුය.
* SME ක්ෂේත්‍රය සඳහා 'ප්‍රාග්ධන සහ තාක්ෂණික අරමුදලක්':
දේශීය ව්‍යවසායකයන්ට ජාත්‍යන්තර ප්‍රමිතීන්ට (International Standards) අනුකූල වීමට සහ ඉහළ බලශක්ති පිරිවැයට මුහුණ දීමට නම්, සහනදායී පොලී අනුපාත යටතේ "තාක්ෂණික නවීකරණ ණය" (Technology Upgradation Loans) ලබා දීමට රජය සහ දේශීය බැංකු පද්ධතිය විශේෂ වැඩපිළිවෙලක් සකස් කළ යුතුය.
* ගෝලීය සැපයුම් දාමයන්ට කුඩා ව්‍යාපාර බද්ධ කිරීම (Supply Chain Integration):
සුළු ව්‍යවසායකයන්ට ඍජුවම අපනයනය කිරීමට අපහසු නම්, ලංකාවේ සිටින මහා පරිමාණ අපනයනකරුවන්ගේ (Large Exporters) "උප-සැපයුම්කරුවන්" (Sub-contractors) ලෙස මෙම කුඩා ව්‍යාපාර සම්බන්ධ කරන ජාතික ජාලයක් (B2B Matchmaking Platform) වෙළඳ අමාත්‍යාංශය හරහා නිර්මාණය කළ යුතුය.
(වාර්තාව - සම්පත් ධීරසේකර)
