ළමයින්ට Social Media තහනම් කරන්නැයි ෆයිසර් මුස්තාපාගෙන් හදිසි පනත් කෙටුම්පතක්!

ඔස්ට්‍රේලියාව සහ බ්‍රිතාන්‍යය අනුගමනය කරමින් ලංකාවටත් 'Social Media Minimum Age' නීතියක් ගේන්න සූදානම

අදහස් ප්‍රකාශ කිරීමේ නිදහස සහ ළමා ආරක්ෂාව අතර තුලනය උරගා බලන නවතම දේශපාලන හැරවුම


බාලවයස්කාර දරුවන් සමාජ මාධ්‍ය (Social Media) භාවිත කිරීම නියාමනය කරමින් අවම වයස් සීමාවක් පැනවීම සඳහා වන 'සමාජ මාධ්‍ය අවම වයස් සීමා පනත් කෙටුම්පත' (Social Media Minimum Age Bill) පුද්ගලික මන්ත්‍රී යෝජනාවක් ලෙස පාර්ලිමේන්තුවට ඉදිරිපත් කිරීමට ජනාධිපති නීතිඥ, පාර්ලිමේන්තු මන්ත්‍රී ෆයිසර් මුස්තාපා පියවර ගෙන තිබේ.

මේ පිළිබඳව දැනුම් දෙමින් මන්ත්‍රීවරයා විසින් අද (24) දිනැතිව පාර්ලිමේන්තු මහලේකම්වරයා වෙත නිල වශයෙන් ලිපියක් සහ අදාළ කෙටුම්පත භාර දී ඇත.

 

මෙරට තුළ ළමුන් ඉලක්ක කරගනිමින් සිදුවන සයිබර් අපරාධ, මාර්ගගත ලිංගික හිංසන (Cyberbullying & Online Grooming) සහ මානසික අවපීඩනයන් සීඝ්‍රයෙන් ඉහළ යමින් පවතින පසුබිමක මෙම යෝජනාව පැමිණේ. විශේෂයෙන්ම ඊයේ (23) දින කාන්තා හා ළමා කටයුතු අමාත්‍යාංශය විසින් මාස 4ක් තුළ දැරියන් 486ක් දූෂණය වී ඇති බවට කළ බිහිසුණු හෙළිදරව්ව ද මෙවැනි නීතිමය යාන්ත්‍රණයක අවශ්‍යතාව කෙරෙහි සමාජයේ දැඩි අවධානයක් යොමු වීමට ප්‍රධානතම හේතුවක් වී ඇත.

 

ජාත්‍යන්තර වශයෙන් ගෙන ඇති පියවර

ලෝකයේ ප්‍රමුඛ පෙළේ ප්‍රජාතන්ත්‍රවාදී රටවල් දැනටමත් බාලවයස්කාර දරුවන් සමාජ මාධ්‍යවලින් ආරක්ෂා කරගැනීම සඳහා දැඩි වාරණ සහ ප්‍රතිපත්ති හඳුන්වා දී තිබේ.

ඔස්ට්‍රේලියාවේ වයස් තහනම:
වයස අවුරුදු 16ට අඩු දරුවන්ට සමාජ මාධ්‍ය භාවිතය මුළුමනින්ම තහනම් කරමින් ඔස්ට්‍රේලියානු පාර්ලිමේන්තුව පසුගියදා ඓතිහාසික නීතියක් සම්මත කරන ලදී.

බ්‍රිතාන්‍යයේ 'Online Safety Act':
බාලවයස්කාර දරුවන්ට අහිතකර සහ ලිංගිකමය අන්තර්ගතයන් (Harmful content) පෙන්වන සමාජ මාධ්‍ය ජාලවලට බිලියන ගණනින් දඩ ගැසීමට හැකි වන පරිදි එක්සත් රාජධානිය දැඩි නීති පනවා ඇත.

ඇමරිකානු ප්‍රාන්ත නීති:
ෆ්ලොරිඩා ඇතුළු ඇමරිකාවේ ප්‍රාන්ත කිහිපයක්ම වයස අවුරුදු 14ට අඩු දරුවන්ට සමාජ මාධ්‍ය ගිණුම් (Accounts) විවෘත කිරීම නීති විරෝධී කර තිබේ.


ඩිජිටල් අයිතිවාසිකම් පිළිබඳ විද්වතුන් පෙන්වා දෙන පරිදි, දරුවන්ගේ ඩිජිටල් ආරක්ෂාව තහවුරු කිරීම (Digital Safety) අතිශය අත්‍යවශ්‍ය කරුණක් වුවද, එය ක්‍රියාත්මක කිරීමේදී ප්‍රායෝගික ගැටලු රැසක් මතු වේ. ප්‍රධානතම ගැටලුව වන්නේ සමාජ මාධ්‍ය ජාල හරහා දරුවන්ගේ "සැබෑ වයස තහවුරු කරගැනීමේ තාක්ෂණික ක්‍රමවේදය" (Age Verification Technology) ලංකාව වැනි රටක ක්‍රියාත්මක කිරීමේ පවතින අපහසුතාවයි.

එසේම, මීට පෙර සම්මත වූ මතභේදාත්මක 'මාර්ගගත ක්‍රමවල සුරක්ෂිතභාවය පිළිබඳ පනත' (OSA) හරහා සිදුවූවාක් මෙන්, ළමා ආරක්ෂාව මුවාවෙන් පොදු මහජනතාවගේ අදහස් ප්‍රකාශ කිරීමේ නිදහස සහ තොරතුරු දැනගැනීමේ අයිතිය වාරණය කිරීමට (Censorship) මෙම පනත දේශපාලනික අවිශ්වාසයක් ලෙස භාවිත වේද යන්න පිළිබඳව ඉදිරියේදී පාර්ලිමේන්තුව තුළ දැඩි විවාදයක් නිර්මාණය වනු ඇත.